ग्रन्थप्रस्तावनाश्रियं सरस्वतीं गौरीं गणेशं स्कन्दमीश्वरम् । (१।१)

ब्रह्माणं वह्निमिन्द्रादीन् वासुदेवं नमाम्यहम् ॥ (१।२)

नैमिषे हरिमीजाना ऋषयः शौनकादयः । (२।१)

तीर्थयात्राप्रसङ्गेन स्वागतं सूतमब्रुवन् ॥ (२।२)

ऋषय ऊचुः । (३।१)

सूत त्वं पूजितो ऽस्माभिः सारात्सारं वदस्व नः । (३।२)

येन विज्ञानमात्रेण सर्वज्ञत्वं प्रजायते ॥ (३।३)

सूत उवाच । (४।१)

सारात्सारो हि भगवान् विष्णुः सर्गादिकृद्विभुः । (४।२)

ब्रह्माहमस्मि तं ज्ञात्वा सर्वज्ञत्वं प्रजायते ॥ (४।३)

द्वे ब्रह्मणी वेदितव्ये शब्दब्रह्म परं च यत् । (५।१)

द्वे विद्ये वेदितव्ये हि इति चाथर्वणी श्रुतिः ॥ (५।२)

अहं शुकश् च पैलाद्या गत्वा बदरिकाश्रमम् । (६।१)

व्यासं नत्वा पृष्टवन्तः सो ऽस्मान् सारमथाब्रवीत् ॥ (६।२)

व्यास उवाच । (७।१)

शुकाद्यैः शृणु सूत त्वं वशिष्ठो मां यथाब्रवीत् । (७।२)

ब्रह्मसारं हि पृच्छन्तं मुनिभिश् च परात्परम् ॥ (७।३)

वसिष्ठ उवाच । (८।१)

द्वैविध्यं ब्रह्म वक्ष्यामि शृणु व्यासाखिलानुगम् । (८।२)

यथाग्निर्मां पुरा प्राह मुनिभिर्दैवतैः सह ॥ (८।३)

पुराणं परमाग्नेयं ब्रह्मविद्याक्षरं परम् । (९।१)

ऋग्वेदाद्यपरं ब्रह्म सर्वदेवसुखावहम् ॥ (९।२)

अग्निनोक्तं पुराणम् यद् आग्नेयं ब्रह्मसंमितम् । (१०।१)

भुक्तिमुक्तिप्रदं दिव्यं पठतां शृण्वतां नृणाम् ॥ (१०।२)

कालाग्निरूपिणम् विष्णुं ज्योतिर्ब्रह्म परात्परम् । (११।१)

मुनिभिः पृष्टवान् देवं पूजितं ज्ञानकर्मभिः ॥ (११।२)

वसिष्ठ उवाच । (१२।१)

संसारसागरोत्तारनावं ब्रह्मेश्वरं वद । (१२।२)

विद्यासारं यद्विदित्वा सर्वज्ञो जायते नरः ॥ (१२।३)

अग्निर् उवाच । (१३।१)

विष्णुः कालाग्निरुद्रो ऽहं विद्यासारं वदामि ते । (१३।२)

विद्यासारं पुराणं यत् सर्वं सर्वस्य कारणं ॥ (१३।३)

सर्गस्य प्रतिसर्गस्य वंशमन्वन्तरस्य च । (१४।१)

वंशानुचरितादेश् च मत्स्यकूर्मादिरूपधृक् ॥ (१४।२)

द्वे विद्ये भगवान् विष्णुः परा चैवापरा च ह । (१५।१)

ऋग्यजुःसामाथर्वाख्या वेदाङ्गानि च षड् द्विज ॥ (१५।२)

शिक्षा कल्पो व्याकरणं निरुक्तं ज्योतिषां गतिः । (१६।१)

छन्दो ऽभिधानं मीमांसा धर्मशास्त्रं पुराणकम् ॥ (१६।२)

न्यायवैद्यकगान्धर्वं धनुर्वेदो ऽर्थशास्त्रकम् । (१७।१)

अपरेयं परा विद्या यया ब्रह्माभिगम्यते ॥ (१७।२)

यत्तददृश्यमग्राह्यम् अगोत्रचरणम् ध्रुवम् । (१८।१)

विष्णुनोक्तं यथा मह्यं देवेभ्यो ब्रह्मणा पुरा । (१८।२)

तथा ते कथयिष्यामि हेतुं मत्स्यादिरूपिणम् ॥ (१८।३)

इत्य् आदिमहापुराणे आग्नेये प्रश्नो नाम प्रथमो ऽध्यायः ॥ (१९।१)