नारद उवाच । (१।१)

राज्यस्थं राघवं जग्मुर् अगस्त्याद्याः सुपूजिताः । (१।२)

धन्यस्त्वं विजयी यस्माद् इन्द्रजिद्विनिपातितः ॥ (१।३)

ब्रह्मात्मजः पुलस्त्यो ऽभूत् विश्रवास्तस्य नैकषी । (२।१)

पुष्पोत्कटाभूत् प्रथमा तत्पुत्रो ऽभूद्धनेश्वरः ॥ (२।२)

नैकष्यां रावणो जज्ञे विंशद्बाहुर्दशाननः । (३।१)

तपसा ब्रह्मदत्तेन वरेण जितदैवतः ॥ (३।२)

कुम्भकर्णः सनिद्रो ऽभूद् धर्मिष्ठो ऽभूद्विभीषणः । (४।१)

स्वसा शूर्पणखा तेषां रावणान् मेघनादकः ॥ (४।२)

इन्द्रं जित्वेन्द्रजिच्चाभूद् रावणादधिको बली । (५।१)

हतस्त्वया लक्ष्मणेन देवादेः क्षेममिच्छता ॥ (५।२)

इत्युक्त्वा ते गता विप्रा अगस्त्याद्या नमस्कृताः । (६।१)

देवप्रार्थितरामोक्तः शत्रुघ्नो लवणार्दनः ॥ (६।२)

अभूत् पूर्मथुरा काचित् रामोक्तो भरतो ऽवधीत् । (७।१)

कोटित्रयं च शैलूषपुत्राणां निशितैः शरैः ॥ (७।२)

शैलूषं दुष्टगन्धर्वं सिन्धुतीरनिवासिनम् । (८।१)

तक्षं च पुष्करं पुत्रं स्थापयित्वाथ देशयोः ॥ (८।२)

भरतो ऽगात् सशत्रुघ्नो राघवं पूजयन् स्थितः । (९।१)

रामो दुष्टान्निहत्याजौ शिष्टान् संपाल्य मानवः ॥ (९।२)

पुत्रौ कुशलवौ जातौ वाल्मीकेराश्रमे वरौ । (१०।१)

लोकापवादात्त्यक्तायां ज्ञातौ सुचरितश्रवात् ॥ (१०।२)

राज्ये ऽभिषिच्य ब्रह्माहम् अस्मीति ध्यानतत्परः । (११।१)

दशवर्षसहस्राणि दशवर्षशतानि च ॥ (११।२)

राज्यं कृत्वा क्रतून् कृत्वा स्वर्गं देवार्चितो ययौ । (१२।१)

सपौरः सानुजः सीतापुत्रो जनपदान्वितः ॥ (१२।२)

अग्निर् उवाच । (१३।१)

वाल्मीकिर् नारदाच्छ्रुत्वा रामायणमकारयत् । (१३।२)

सविस्तरं यदेतच्च शृणुयात्स दिवं व्रजेत् ॥ (१३।३)

इत्य् आदिमहापुराणे आग्नेये रामायणे उत्तरकाण्डवर्णनं नाम एकादशो ऽध्यायः ॥ (१४।१)