अग्निर् उवाच । (१।१)

कश्यपस्य वेदे सर्गमदित्यादिषु हे मुने । (१।२)

चाक्षुषे तुषिता देवास्ते ऽदित्यां कश्यपात्पुनः ॥ (१।३)

आसन् विष्णुश् च शक्रश् च त्वष्टा धाता तथार्यमा । (२।१)

पूषा विवस्वान् सविता मित्रो ऽथ वरुणो भगः ॥ (२।२)

अंशुश् च द्वादशादित्या आसन् वैवस्वते ऽन्तरे । (३।१)

अरिष्टनेमिपत्रीनाम् अपत्यानीह षोडश ॥ (३।२)

बहुपुत्रस्थ विदुषश् चतस्रो विद्युतः सुताः । (४।१)

प्रत्यङ्गिरजाः श्रेष्ठाः कृशाश्वस्य सुरायुधाः ॥ (४।२)

उदयास्तमने सूर्ये तद्वदेते युगे युगे । (५।१)

हिरण्यकशिपुर्दित्यां हिरण्याक्षश् च कश्यपात् ॥ (५।२)

सिंहिका चाभवत् कन्या विप्रचित्तेः परिग्रहः । (६।१)

राहुप्रभृतयस्तस्यां सैंहिकेया इति श्रुताः ॥ (६।२)

हिरण्यकशिपोः पुत्राश् चत्वारः प्रथितौजसः । (७।१)

अनुह्रादश् च ह्रादश् च प्रह्रादश्चातिवैष्णवः ॥ (७।२)

संह्रादश् च चतुर्थो ऽभूत् ह्रादपुत्रो ह्रदस् तथा । (८।१)

ह्रदस्य पुत्र आयुष्मान् शिबिर् बास्कल एव च ॥ (८।२)

विरोचनस् तु प्राह्रादिर्बलिर्जज्ञे विरोचनात् । (९।१)

बलेः पुत्रशतं त्वासीद् बाणश्रेष्ठं महामुने ॥ (९।२)

पुराकल्पे हि बाणेन प्रसाद्योमापतिं वरः । (१०।१)

पार्श्वतो विहरिष्यामीत्येवम् प्राप्तश् च ईश्वरात् ॥ (१०।२)

हिरण्याक्षसुताः पञ्च शम्बरः शकुनिस्त्विति । (११।१)

द्विमूर्धा शङ्कुरार्यश् च शतमासन् दनोः सुताः ॥ (११।२)

स्वर्भानोस्तु प्रभा कन्या पुलोम्नस्तु शची स्मृता । (१२।१)

उपदानवी हयशिरा शर्मिष्ठा वार्षपर्वणी ॥ (१२।२)

पुलोमा कालका चैव वैश्वानरसुते उभे । (१३।१)

कश्यपस्य तु भार्ये द्वे तयोः पुत्राश् च कोटयः ॥ (१३।२)

प्रह्रादस्य चतुष्कोट्यो निवातकवचाः कुले । (१४।१)

ताम्रायाः षट् सुताः स्युश् च काकी श्वेनी च भास्यपि ॥ (१४।२)

गृध्रिका शुचि सुग्रीवा ताभ्यः काकादयो ऽभवन् । (१५।१)

अश्वाश्चोष्ट्राश् च ताम्राया अरुणो गरुडस् तथा ॥ (१५।२)

विनतायाः सहस्रं तु सर्पाश् च सुरसाभवाः । (१६।१)

काद्रवेयाः सहस्रं तु शेषवासुकितक्षकाः ॥ (१६।२)

दंष्ट्रिणः क्रोधवशजा धरोत्थाः पक्षिणो जले । (१७।१)

सुरभ्यां गोमहिष्यादि इरोत्पन्नास्तृणादयः ॥ (१७।२)

स्वसायां यक्षरक्षांसि मुनेर् अश्वरसो ऽभवन् । (१८।१)

अरिष्टायां तु गन्धर्वाः कश्यपाद्धि स्थिरं चरं ॥ (१८।२)

एषां पुत्रादयो ऽसङ्ख्या देवैर् वै दानवा जिताः । (१९।१)

दितिर्विनष्टपुत्रा वै तोषयामास कश्यपं ॥ (१९।२)

पुत्रमिन्द्रप्रहर्तारमिच्छती प्राप कश्यपात् । (२०।१)

पादाप्रक्षालनात् सुप्ता तस्या गर्भं जघान ह ॥ (२०।२)

छिद्रमन्विष्य चेन्द्रस्तु ते देवा मरुतो ऽभवन् । (२१।१)

शक्रस्यैकोनपञ्चाशत्सहाया दीप्ततेजसः ॥ (२१।२)

एतत्सर्वं हरिर्ब्रह्मा अभिषिच्य पृथुं नृपं । (२२।१)

ददौ क्रमेण राज्यानि अन्येषामधिपो हरिः ॥ (२२।२)

द्विजौषधीनां चन्द्रश् च अपां तु वरुणो नृपः । (२३।१)

राज्ञां वैश्रवणो राजा सूर्याणां विष्णोरीश्वरः ॥ (२३।२)

वसूनां पावको राजा मरुतां वासवः प्रभुः । (२४।१)

प्रजापतीनां दक्षो ऽथ प्रह्लादो दानवाधिपः ॥ (२४।२)

पितॄणां च यमो राजा भूतादीनां हरः प्रभुः । (२५।१)

हिमवांश् चैव शैलानां नदीनां सागरः प्रभुः ॥ (२५।२)

गान्धर्वाणां चित्ररथो नागानामथ वासुकिः । (२६।१)

सर्पाणां तक्षको राजा गरुडः पक्षिणामथ ॥ (२६।२)

ऐरावतो गजेन्द्राणां गोवृषो ऽथ गवामपि । (२७।१)

मृगाणाम् अथ शार्दूलः प्लक्षो वनस्पतीश्वरः ॥ (२७।२)

उच्चैःश्रवास् तथाश्वानां सुधन्वा पूर्वपालकः । (२८।१)

दक्षिणस्यां शङ्खपदः केतुमान् पालको जले । (२८।२)

हिरण्यरोमकः सौम्ये प्रतिसर्गो ऽयमीरितः ॥ (२८।३)

इत्य् आदिमहापुराणे आग्नेये प्रतिसर्गवर्णनं नाम ऊनविंशतितमो ऽध्यायः ॥ (२९।१)