अग्निर् उवाच । (१।१)

रामायणमहं वक्ष्ये नारदेनोदितं पुरा । (१।२)

वाल्मीकये यथा तद्वत् पठितं भुक्तिमुक्तिदम् ॥ (१।३)

नारद उवाच । (२।१)

विष्णुनाभ्यब्जजो ब्रह्मा मरीचिर्ब्रह्मणः सुतः । (२।२)

मरीचेः कश्यपस्तस्मात् सूर्यो वैवस्वतो मनुः ॥ (२।३)

ततस्तस्मात्तथेक्ष्वाकुस् तस्य वंशे ककुत्स्थकः । (३।१)

ककुत्स्थस्य रघुस्तस्माद् अजो दशरथस्ततः ॥ (३।२)

रावणादेर् वधार्थाय चतुर्धाभूत् स्वयं हरिः । (४।१)

राज्ञो दशरथाद्रामः कौशल्यायां बभूव ह ॥ (४।२)

कैकेय्यां भरतः पुत्रः सुमित्रायां च लक्ष्मणः । (५।१)

शत्रुघ्न ऋष्यशृङ्गेण तासु संदत्तपायसात् ॥ (५।२)

प्राशिताद्यज्ञसंसिद्धाद् रामाद्याश् च समाः पितुः । (६।१)

यज्ञविघ्नविनाशाय विश्वामित्रार्थितो नृपः ॥ (६।२)

रामं संप्रेषयामास लक्ष्मणं मुनिना सह । (७।१)

रामो गतो ऽस्त्रशस्त्राणि शिक्षितस्ताडकान्तकृत् ॥ (७।२)

मारीचं मानवास्त्रेण मोहितं दूरतो ऽनयत् । (८।१)

सुबाहुं यज्ञहन्तारं सबलं चावधीत् बली ॥ (८।२)

सिद्धाश्रमनिवासी च विश्वामित्रादिभिः सह । (९।१)

गतः क्रतुं मैथिलस्य द्रष्टुं चापं सहानुजः ॥ (९।२)

शतानन्दनिमित्तेन विश्वामित्रप्रभावितः । (१०।१)

रामाय कथितो राज्ञा समुनिः पूजितः क्रतौ ॥ (१०।२)

धनुरापूरयामास लीलया स बभञ्ज तत् । (११।१)

वीर्यशुक्लां च जनकः सीतां कन्यां त्वयोनिजाम् ॥ (११।२)

ददौ रामाय रामो ऽपि पित्रादौ हि समागते । (१२।१)

उपयेमे जानकीं ताम् ऊर्मिलां लक्ष्मणस् तथा ॥ (१२।२)

श्रुतकीर्तिं माण्डवीं च कुशध्वजसुते तथा । (१३।१)

जनकस्यानुजस्यैते शत्रुघ्नभरतावुभौ ॥ (१३।२)

कन्ये द्वे उपयेमाते जनकेन सुपूजितः । (१४।१)

रामो ऽगात्सवशिष्ठाद्यैर् जामदग्न्यं विजित्य च । (१४।२)

अयोध्यां भरतो ऽभ्यागात् सशत्रुघ्नो युधाजितः ॥ (१४।३)

इत्य् आदिमहापुराणे आग्नेये रामायणे बालकाण्डवर्णनं नाम पञ्चमो ऽध्यायः ॥ (१५।१)