अग्निर् उवाच । (१।१)

प्रथमो महतः सर्गो विज्ञेयो ब्रह्मणस्तु सः । (१।२)

तन्मात्राणां द्वितीयस्तु भूतसर्गो हि स स्मृतः ॥ (१।३)

वैकारिकस्तृतीयस्तु सर्ग ऐन्द्रियकः स्मृतः । (२।१)

इत्येष प्राकृतः सर्गः सम्भूतो बुद्धिपूर्वकः ॥ (२।२)

मुख्यः सर्गश् चतुर्थस्तु मुख्या वै स्थावराः स्मृताः । (३।१)

तिर्यक्स्रोतास्तु यः प्रोक्तस् तैर्यग्योन्यस्ततः स्मृतः ॥ (३।२)

तथोर्ध्वस्रोतसां षष्ठो देवसर्गस्तु स स्मृतः । (४।१)

ततो ऽर्वाक्स्रोतसां सर्गः सप्तमः स तु मानुषः ॥ (४।२)

अष्टमो ऽनुग्रहः सर्गैः सात्त्विकस्तामसश् च यः । (५।१)

पञ्चैते वैकृताः सर्गाः प्राकृताश् च त्रयः स्मृताः ॥ (५।२)

प्राकृतो वैकृतश् चैव कौमारो नवमस् तथा । (६।१)

ब्रह्मतो नव सर्गास्तु जगतो मूलहेतवः ॥ (६।२)

ख्यात्याद्या दक्षकन्यास्तु भृग्वाद्या उपयेमिरे । (७।१)

नित्यो नैमित्तकः सर्गस्त्रिधा प्रकथितो जनैः ॥ (७।२)

प्राकृता दैनन्दिनी स्यादन्तरप्रलयादनु । (८।१)

जायते यत्रानुदिनं मित्यसर्गो हि संमतः ॥ (८।२)

देवौ धाताविधातारौ भृगोः ख्यातिरसूयत । (९।१)

श्रियं च पत्नी विष्णोर्या स्तुता शक्रेण वृद्धये ॥ (९।२)

धातुर् विधातुर् द्वौ पुत्रौ क्रमात् प्राणो मृकण्डुकः । (१०।१)

मार्कण्डेयो मृकण्डोश् च जज्ञे वेदशिरास्ततः ॥ (१०।२)

पौर्णमासश् च सम्भूत्यां मरीचेरभवत् सुतः । (११।१)

स्मृत्यामङ्गिरसः पुत्राः सिनीवाली कुहूस् तथा ॥ (११।२)

राकाश् चानुमतिश् चात्रेर् अनसूयाप्यजीजनत् । (१२।१)

सोमं दुर्वाससं पुत्रं दत्तात्रेयं च योगिनम् ॥ (१२।२)

प्रीत्यां पुलस्त्यभार्यायां दत्तोलिस् तत्सुतो ऽभवत् । (१३।१)

क्षमायां पुलहाज्जाताः सहिष्णुः कर्मपादिकाः ॥ (१३।२)

संनत्यां च क्रतोरासन् बालिखिल्या महौजसः । (१४।१)

अङ्गुष्ठपर्वमात्रास्ते ये हि षष्टिसहस्रिणः ॥ (१४।२)

ऊर्जायां च वशिष्ठाच्च राजा गात्रोर्ध्वबाहुकः । (१५।१)

सवनश्चालघुः शुक्रः सुतपाः सप्त चर्षयः ॥ (१५।२)

पावकः पवमानो ऽभूच्छुचिः स्वाहाग्निजो ऽभवत् । (१६।१)

अग्निस्वात्ता बर्हिषदो ऽनग्नयः साग्नयो ह्य् अजात् ॥ (१६।२)

पितृभ्यश् च स्वधायां च मेना वैधारिणी सुते । (१७।१)

हिंसाभार्या त्वधर्मस्य तयोर्जज्ञे तथानृतम् ॥ (१७।२)

कन्या च निकृतिस्ताभ्यां भयन्नरकेमेव च । (१८।१)

माया च वेदना चैव मिथुनं त्विदमेतयोः ॥ (१८।२)

तयोर्जज्ञे ऽथ वै मायां मृत्युं भूतापहारिणम् । (१९।१)

वेदना च सुतं चापि दुःखं जज्ञे ऽथ रौरवात् ॥ (१९।२)

मृत्योर् व्याधिजराशोकतृष्णाक्रोधाश् च जज्ञिरे । (२०।१)

ब्रह्मणश् च रुदन् जातो रोदनाद्रुद्रनामकः ॥ (२०।२)

भवं शर्वमथेशानं तथा पशुपतिं द्विज । (२१।१)

भीममुग्रं महादेवमुवाच स पितामहः ॥ (२१।२)

दक्षकोपाच्च तद्भार्या देहं तत्याज सा सती । (२२।१)

हिमवद्दुहिता भूत्वा पत्नी शम्भोरभूत् पुनः ॥ (२२।२)

ऋषिभ्यो नारदाद्युक्ताः पूजाः स्नानादिपूर्विकाः । (२३।१)

स्वायम्भुवाद्यास्ताः कृत्वा विष्ण्वादेर्भुक्तिमुक्तिदाः ॥ (२३।२)

इत्य् आदिमहापुराणे आग्नेये जगत्सर्गवर्णनं नाम विंशतितमो ऽध्यायः ॥ (२४।१)