अग्निर् उवाच । (१।१)

भारतं सम्प्रवक्ष्यामि कृष्णमाहात्म्यलक्षणम् । (१।२)

भूभारमहरद्विष्णुर् निमित्तीकृत्य पाण्डवान् ॥ (१।३)

विष्णुनाभ्यब्जजो ब्रह्मा ब्रह्मपुत्रो ऽत्रिरत्रितः । (२।१)

सोमः सोमाद्बुधस्तस्मादैल आसीत् पुरूरवाः ॥ (२।२)

तस्मादायुस् ततो राजा नहुषो ऽतो ययातिकः । (३।१)

ततः पुरुस्तस्य वंशे भरतो ऽथ नृपः कुरुः ॥ (३।२)

तद्वंशे शान्तनुस्तस्माद्भीष्मो गङ्गासुतो ऽनुजौ । (४।१)

चित्राङ्गदो विचित्रश् च सत्यवत्यां च शान्तनोः ॥ (४।२)

स्वर्गं गते शान्तनौ च भीष्मो भार्याविवर्जितः । (५।१)

अपालयत् भ्रातृराज्यं बालश्चित्राङ्गदो हतः ॥ (५।२)

चित्राङ्गदेन द्वे कन्ये काशिराजस्य चाम्बिका । (६।१)

अम्बालिका च भीष्मेण आनीते विजितारिणा ॥ (६।२)

भार्ये विचित्रवीर्यस्य यक्ष्मणा स दिवं गतः । (७।१)

सत्यवत्या ह्य् अनुमतादम्बिकायां नृपो ऽभवत् ॥ (७।२)

धृतराष्ट्रो ऽम्बालिकायां पाण्डुश् च व्यासतः सुतः । (८।१)

गान्धार्यां धृतराष्ट्राच्च दुर्योधनमुखं शतम् ॥ (८।२)

शतशृङ्गाश्रमपदे भार्यायोगाद् यतो मृतिः । (९।१)

ऋषिशापात्ततो धर्मात् कुन्त्यां पाण्डोर्युधिष्ठिरः ॥ (९।२)

वाताद्भीमो ऽर्जुनः शक्रान्माद्र्यामश्विकुमारतः । (१०।१)

नकुलः सहदेवश् च पाण्डुर्माद्रीयुतो मृतः ॥ (१०।२)

कर्णः कुन्त्यां हि कन्यायां जातो दुर्योधाश्रितः । (११।१)

कुरुपाण्डवयोर् वैरं दैवयोगाद् बभूव ह ॥ (११।२)

दुर्योधनो जतुगृहे पाण्डवानदहत् कुधीः । (१२।१)

दग्धागाराद्विनिष्क्रान्ता मातृपृष्टास्तु पाण्डवाः ॥ (१२।२)

ततस्तु एकचक्रायां ब्राह्मणस्य निवेशने । (१३।१)

मुनिवेषाः स्थिताः सर्वे निहत्य बकराक्षसम् ॥ (१३।२)

ययुः पाञ्चालविषयं द्रौपद्यास्ते स्वयंवरे । (१४।१)

सम्प्राप्ता बाहुवेधेन द्रौपदी पञ्चपाण्डवैः ॥ (१४।२)

अर्धराज्यं ततः प्राप्ता ज्ञाता दुर्योधनादिभिः । (१५।१)

गाण्डीवं च धनुर्दिव्यं पावकाद्रथमुत्तमम् ॥ (१५।२)

सारथिं चार्जुनः संख्ये कृष्णम् अक्षय्यसायकान् । (१६।१)

ब्रह्मास्त्रादींस् तथा द्रोणात्सर्वे शस्त्रविशारदाः ॥ (१६।२)

कृष्णेन सो ऽर्जुनो वह्निं खाण्डवे समतर्पयत् । (१७।१)

इन्द्रवृष्टिं वारयंश् च शरवर्षेण पाण्डवः ॥ (१७।२)

जिता दिशः पाण्डवैश् च राज्यं चक्रे युधिष्ठिरः । (१८।१)

बहुस्वर्णं राजसूयं न सेहे तं सुयोधनः ॥ (१८।२)

भ्रात्रा दुःशासनेनोक्तः कर्णेन प्राप्तभूतिना । (१९।१)

द्यूतकार्ये शकुनिना द्यूतेन स युधिष्ठिरम् ॥ (१९।२)

अजयत्तस्य राज्यं च सभास्थो माययाहसत् । (२०।१)

जितो युधिष्ठिरो भ्रातृयुक्तश्चारण्यकं ययौ ॥ (२०।२)

वने द्वादशवर्षाणि प्रतिज्ञातानि सो ऽनयत् । (२१।१)

अष्टाशीतिसहस्राणि भोजयन् पूर्ववत् द्विजान् ॥ (२१।२)

सधौम्यो द्रौपदीषष्ठस्ततः प्रायाद्विराटकम् । (२२।१)

कङ्को द्विजो ह्य् अविज्ञातो राजा भीमो ऽथ सूपकृत् ॥ (२२।२)

बृहन्नलार्जुनो भार्या सैरिन्ध्री यमजौ तथा । (२३।१)

अन्यनाम्ना भीमसेनः कीचकं चावधीन्निशि ॥ (२३।२)

द्रौपदीं हर्तुकामं तं अर्जुनश्चाजयत् कुरून् । (२४।१)

कुर्वतो गोग्रहादींश् च तैर् ज्ञाताः पाण्डवा अथ ॥ (२४।२)

सुभद्रा कृष्णभगिनी अर्जुनात्समजीजनत् । (२५।१)

अभिमन्युं ददौ तस्मै विराटश्चोत्तरां सुताम् ॥ (२५।२)

सप्ताक्षौहिणीश आसीद्धर्मराजो रणाय सः । (२६।१)

कृष्णो दूतो ऽब्रवीद् गत्वा दुर्योधनममर्षणम् ॥ (२६।२)

एकादशाक्षौहिणीशं नृपं दुर्योधनं तदा । (२७।१)

युधिष्ठिरायार्धराज्यं देहि ग्रामांश् च पञ्च वा ॥ (२७।२)

युध्यस्व वा वचः श्रुत्वा कृष्णमाह सुयोधनः । (२८।१)

भूसूच्यग्रं न दास्यामि योत्स्ये संग्रहणोद्यतः ॥ (२८।२)

विश्वरूपं दर्शयित्वा अधृष्यं विदुरार्चितः । (२९।१)

प्रागाद्युधिष्ठिरं प्राह योधयैनं सुयोधनम् ॥ (२९।२)

इत्य् आदिमहापुराणे आग्नेये आदिपर्वादिवर्णनं नाम त्रयोदशो ऽध्यायः ॥ (३०।१)