प्रभद्रः पञ्चधा प्रोक्तः काश्मर्यो लघुपूर्वकः । (१।१)

द्विर् अग्निमन्थः श्योनाकद्वितयं चाजशृङ्गिका ॥ (१।२)

काश्मर्याश्मन्तकश् चाथ कर्णिकारद्वयं तथा । (२।१)

वृश्चिकाली च कुटजस् तद्बीजं च शिरीषकः ॥ (२।२)

करञ्जः षड्विधो ऽङ्कोलो नीलः सर्जाश्वकर्णकौ । (३।१)

तालः श्रीतालहिन्तालमाडास् तूलस् तमालकः ॥ (३।२)

चतुर्विधः कदम्बो ऽथ वानीरः कुम्भिवेतसः । (४।१)

धवश् च धन्वनो भूर्जस् तिनिशश् च ततो ऽर्जुनः ॥ (४।२)

हरिद्रुदग्धाशाखोटाः शाको ऽथो शिंशपात्रयम् । (५।१)

असनत्रयं च वरुणः पुत्रजीवश् च पिण्डिका ॥ (५।२)

कारस्करो ऽथ कटभ्यौ क्षवको देवसर्षपः । (६।१)

डहुर् विकङ्कतश् चेति स्वराब्धिगणिताः क्रमात् ॥ (६।२)

अथ निगदितः प्रभद्रः पिचुमन्दः पारिभद्रको निम्बः । (७।१)

काकफलः कीरेष्टो नेतारिष्टश् च सर्वतोभद्रः ॥ (७।२)

धमनो विशीर्णपर्णः पवनेष्टः पीतसारकः शीतः । (८।१)

वरतिक्तो ऽरिष्टफलो ज्येष्ठामालकश् च हिङ्गुनिर्यासः ॥ (८।२)

छर्दनश् चाग्निधमनो ज्ञेया नाम्नां तु विंशतिः ॥ (९।१)

प्रभद्रकः प्रभवति शीततिक्तकः कफव्रणकृमिवमिशोफशान्तये । (१०।१)

बलासभिद् बहुविषपित्तदोषजिद् विशेषतो हृदयविदाहशान्तिकृत् ॥ (१०।२)

महानिम्बो मदोद्रेकः कार्मुकः केशमुष्टिकः । (११।१)

काकाण्डो रम्यको ऽक्षीरो महातिक्तो हिमद्रुमः ॥ (११।२)

महानिम्बस् तु शिशिरः कषायः कटुतिक्तकः । (१२।१)

अस्रदाहबलासघ्नो विषमज्वरनाशनः ॥ (१२।२)

कैडर्यो ऽन्यो महानिम्बो रामणो रमणस् तथा । (१३।१)

गिरिनिम्बो महारिष्टः शुक्लशालः कफाह्वयः ॥ (१३।२)

कैडर्यः कटुकस् तिक्तः कषायः शीतलो लघुः । (१४।१)

संतापशोषकुष्ठास्रकृमिभूतविषापहः ॥ (१४।२)

भूनिम्बभूनिम्बो नार्यतिक्तः स्यात् कैरातो रामसेनकः । (१५।१)

कैराततिक्तको हैमः काण्डतिक्तः किरातकः ॥ (१५।२)

भूनिम्बो वातलस् तिक्तः कफपित्तज्वरापहः । (१६।१)

व्रणसंरोपणः पथ्यः कुष्ठकण्डूतिशोफनुत् ॥ (१६।२)

नेपालनिम्बनेपालनिम्बो नैपालस् तृणनिम्बो ज्वरान्तकः । (१७।१)

नाडीतिक्तो ऽर्धतिक्तश् च निद्रारिः संनिपातहा ॥ (१७।२)

नेपालनिम्बः शीतोष्णो योगवाही लघुस् तथा । (१८।१)

तिक्तो ऽतिकफपित्तास्रशोफतृष्णाज्वरापहः ॥ (१८।२)

कण्डूलकण्डूलः कृष्णगर्भश् च सोमवल्कप्रचेतसी । (१९।१)

भद्रावती महाकुम्भी कैडर्यो रामसेनकः ॥ (१९।२)

कुमुदा चोग्रगन्धश् च भद्रा रञ्जनकस् तथा । (२०।१)

कुम्भी च लघुकाश्मर्यः श्रीपर्णी च त्रिपञ्चधा ॥ (२०।२)

कट्फलः कटुर् उष्णश् च कासश्वासज्वरापहः । (२१।१)

उग्रदाहहरो रुच्यो मुखरोगशमप्रदः ॥ (२१।२)

अग्निमन्थ, प्रेम्न स्पिनोस रोxब्।अग्निमन्थो ऽग्निमथनः तर्कारी वैजयन्तिका । (२२।१)

वह्निमन्थो ऽरणी केतुः श्रीपर्णी कर्णिका जया । (२२।२)

नादेयी विजयानन्ता नदी यावत् त्रयोदश ॥ (२२।३)

अग्निमन्थ:: मेदिच्। प्रोपेर्तिएस्तर्कारी कटुर् उष्णा च तिक्तानिलकफापहा । (२३।१)

शोफश्लेष्माग्निमान्द्यार्शोविड्बन्धाध्माननाशनी ॥ (२३।२)

क्षुद्राग्निमन्थक्षुद्राग्निमन्थस् तपनो विजया गणिकारिका । (२४।१)

अरणिर् लघुमन्थश् च तेजोवृक्षस् तनुत्वचा ॥ (२४।२)

अग्निमन्थद्वयं चैव तुल्यं वीर्यरसादिषु । (२५।१)

तत्प्रयोगानुसारेण योजयेत् स्वमनीषया ॥ (२५।२)

श्योनाकश्योनाकः शुकनासश् च कट्वङ्गो ऽथ कटंभरः । (२६।१)

मयूरजङ्घो ऽरलुकः प्रियजीवः कुटन्नटः ॥ (२६।२)

श्योनाक::पृथुशिम्बश्योनाकः पृथुशिम्बो ऽन्यो भल्लको दीर्घवृन्तकः । (२७।१)

पोतवृक्षश् च टेण्टूको भूतसारो मुनिद्रुमः ॥ (२७।२)

निःसारः फल्गुवृन्ताकः पूतिपत्त्रो वसन्तकः । (२८।१)

मण्डूकपर्णः पीताङ्गो जम्बूकः पीतपादकः ॥ (२८।२)

वातारिः पीतकः शोणः कुटनश् च विरेचनः । (२९।१)

भ्रमरेष्टो बर्हिजङ्घो नेत्रनेत्रमिताभिधः ॥ (२९।२)

श्योनाकयुगलं तिक्तं शीतलं च त्रिदोषजित् । (३०।१)

पित्तश्लेष्मातिसारघ्नं संनिपातज्वरापहम् ॥ (३०।२)

टेण्टुफलं कटूष्णं च कफवातहरं लघु । (३१।१)

दीपनं पाचनं हृद्यं रुचिकृल् लवणाम्लकम् ॥ (३१।२)

अजशृङ्गीअजशृङ्गी मेषशृङ्गी वर्तिका सर्पदंष्ट्रिका । (३२।१)

चक्षुष्या तिक्तदुग्धा च पुत्रश्रेणी विषाणिका ॥ (३२।२)

अजशृङ्गी कटुस् तिक्ता कफार्शःशूलशोफजित् । (३३।१)

चक्षुष्या श्वासहृद्रोगविषकासातिकुष्ठजित् ॥ (३३।२)

अजशृङ्गीफलं तिक्तं कटूष्णं कफवातजित् । (३४।१)

जठरानलकृत् हृद्यं रुचिरं लवणाम्लकम् ॥ (३४।२)

काश्मर्यस्यात् काश्मर्यः काश्मरी कृष्णवृन्ता हीरा भद्रा सर्वतोभद्रिका च । (३५।१)

श्रीपर्णी स्यात् सिन्धुपर्णी सुभद्रा कम्भारी सा कट्फला भद्रपर्णी ॥ (३५।२)

कुमुदा च गोपभद्रा विदारिणी क्षीरिणी महाभद्रा । (३६।१)

मधुपर्णी स्वभद्रा कृष्णा श्वेता च रोहिणी गृष्टिः ॥ (३६।२)

स्थूलत्वचा मधुमती सुफला मेदिनी महाकुमुदा । (३७।१)

सुदृढत्वचा च कथिता विज्ञेयोनत्रिंशतिर् नाम्नाम् ॥ (३७।२)

काश्मरी कटुका तिक्ता गुरूष्णा कफशोफनुत् । (३८।१)

त्रिदोषविषदाहार्तिज्वरतृष्णास्रदोषजित् ॥ (३८।२)

अश्मन्तकअश्मन्तकश् चेन्दुकश् च कुद्दालश् चाम्लपत्त्रकः । (३९।१)

श्लक्ष्णत्वक् पीलुपत्त्रश् च स्मृतो यमलपत्त्रकः ॥ (३९।२)

अश्मान्तकेन्दुशफरी शिलान्तश् चाम्बुदः स्मृतः । (४०।१)

पाषाणान्तक इत्य् उक्तो वह्निचन्द्रमिताह्वयः ॥ (४०।२)

अश्मन्तकः स्यान् मधुरः कषायः सुशीतलः पित्तहरः प्रमेहजित् । (४१।१)

विदाहतृष्णाविषमज्वरापहो विषार्तिविच्छर्दिहरश् च भूतजित् ॥ (४१।२)

कर्णिकारअथ भवति कर्णिकारो राजतरुः प्रग्रहश् च कृतमालः । (४२।१)

सुफलश् च परिव्याधो व्याधिरिपुः पङ्क्तिबीजको वसुसंज्ञः ॥ (४२।२)

कर्णिकारो रसे तिक्तः कटूष्णः कफशूलहृत् । (४३।१)

उदरकृमिमेहघ्नो व्रणगुल्मनिवारणः ॥ (४३।२)

आरग्वधआरग्वधो ऽन्यो मन्थानो रोचनश् चतुरङ्गुलः । (४४।१)

आरेवतो दीर्घफलो व्याधिघातो नृपद्रुमः ॥ (४४।२)

हेमपुष्पो राजतरुः कण्डूघ्नश् च ज्वरान्तकः । (४५।१)

अरुजः स्वर्णपुष्पश् च स्वर्णद्रुः कुष्ठसूदनः ॥ (४५।२)

कर्णाभरणकः प्रोक्तो महाराजद्रुमः स्मृतः । (४६।१)

कर्णिकारो महादिः स्यात् प्रोक्तश् चैकोनविंशतिः ॥ (४६।२)

आरग्वधो ऽतिमधुरः शीतः शूलापहारकः । (४७।१)

ज्वरकण्डूकुष्ठमेहकफविष्टम्भनाशनः ॥ (४७।२)

वृश्चिकालीवृश्चिकाली विषाणी च विषघ्नी नेत्ररोगहा । (४८।१)

उष्ट्रिकाप्य् अलिपर्णी च दक्षिणावर्तकी तथा ॥ (४८।२)

कलिकाप्य् आगमावर्ता देवलाङ्गुलिका तथा । (४९।१)

करभा भूरिदुग्धा च कर्कशा चामरा च सा ॥ (४९।२)

स्वर्णपुष्पा युग्मफला तथा क्षीरविषाणिका । (५०।१)

प्रोक्ता भासुरपुष्पा च वसुचन्द्रसमाह्वया ॥ (५०।२)

वृश्चिकाली कटुस् तिक्ता सोष्णा हृद्वक्त्रशुद्धिकृत् । (५१।१)

रक्तपित्तहरा बल्या विबन्धारोचकापहा ॥ (५१।२)

कुटजकुटजः कौटजः शक्रो वत्सको गिरिमल्लिका । (५२।१)

कलिङ्गो मल्लिकापुष्पः प्रावृष्यः शक्रपादपः ॥ (५२।२)

वरतिक्तो यवफलः संग्राही पाण्डुरद्रुमः । (५३।१)

प्रावृषेण्यो महागन्धः स्यात् पञ्चदशधाभिधः ॥ (५३।२)

कुटजः कटुतिक्तोष्णः कषायश् चातिसारजित् । (५४।१)

तत्रासितो ऽस्रपित्तघ्नस् त्वग्दोषार्शोनिकृन्तनः ॥ (५४।२)

इन्द्रयवाइन्द्रयवा तु शक्राह्वा शक्रबीजानि वत्सकः । (५५।१)

तथा वत्सकबीजानि भद्रजा कुटजाफलम् ॥ (५५।२)

ज्ञेया भद्रयवा चैव बीजान्ता कुटजाभिधा । (५६।१)

तथा कलिङ्गबीजानि पर्यायैर् दशधाभिधा ॥ (५६।२)

इन्द्रयवा कटुस् तिक्ता शीता कफवातरक्तपित्तहरा । (५७।१)

दाहातिसारशमनो नानाज्वरदोषशूलमूलघ्नी ॥ (५७।२)

शिरीषशिरीषः शीतपुष्पश् च भण्डिको मृदुपुष्पकः । (५८।१)

शुकेष्टो बर्हिपुष्पश् च विषहन्ता सुपुष्पकः ॥ (५८।२)

उद्दानकः शुकतरुर् ज्ञेयो लोमशपुष्पकः । (५९।१)

कपीतनः कलिङ्गश् च श्यामलः शङ्खिनीफलः । (५९।२)

मधुपुष्पस् तथा वृत्तपुष्पः सप्तदशाह्वयः ॥ (५९।३)

शिरीषः कटुकः शीतो विषवातहरः परः । (६०।१)

पामासृक्कुष्ठकण्डूतित्वग्दोषस्य विनाशनः ॥ (६०।२)

करञ्जकरञ्जो नक्तमालश् च पूतिकश् चिरबिल्वकः । (६१।१)

पूतिपर्णो वृद्धफलो रोचनश् च प्रकीर्यकः ॥ (६१।२)

करञ्जः कटुर् उष्णश् च चक्षुष्यो वातनाशनः । (६२।१)

तस्य स्नेहो ऽतिस्निग्धश् च वातघ्नः स्थिरदीप्तिदः ॥ (६२।२)

करञ्ज::घृतकरञ्जअन्यो घृतकरञ्जः स्यात् प्रकीर्यो घृतपर्णकः । (६३।१)

स्निग्धपत्त्रस् तपस्वी च विषारिश् च विरोचनः ॥ (६३।२)

घृतकरञ्जः कटूष्णो वातहृद् व्रणनाशनः । (६४।१)

सर्वत्वग्दोषशमनो विषस्पर्शविनाशनः ॥ (६४।२)

करञ्ज::महाकरञ्जज्ञेयो महाकरञ्जो ऽन्यः षड्ग्रन्थो हस्तिचारिणी । (६५।१)

उदकीर्या विषघ्नी च काकघ्नी मदहस्तिनी । (६५।२)

अङ्गारवल्ली शार्ङ्गेष्टा मधुसत्तावमायिनी ॥ (६५।३)

हस्तिरोहणकश् चैव ज्ञेयो हस्तिकरञ्जकः । (६६।१)

सुमनाः काकभाण्डी च मदमत्तश् च षोडश ॥ (६६।२)

महाकरञ्जस् तीक्ष्णोष्णः कटुको विषनाशनः । (६७।१)

कण्डूविचर्चिकाकुष्ठत्वग्दोषव्रणनाशनः ॥ (६७।२)

प्रकीर्यप्रकीर्यो रजनीपुष्पः सुमनाः पूतिकर्णिकः । (६८।१)

पूतिकरञ्जः कैडर्यः कलिमालश् च सप्तधा ॥ (६८।२)

करञ्ज::गुच्छकरञ्जअन्यो गुच्छकरञ्जः स्निग्धदलो गुच्छपुच्छको नन्दी । (६९।१)

गुच्छी च मातृनन्दी सानन्दो दन्तधावनो वसवः ॥ (६९।२)

करञ्जः कटुतिक्तोष्णो विषवातार्तिकृन्तनः । (७०।१)

कण्डूविचर्चिकाकुष्ठस्पर्शत्वग्दोषनाशनः ॥ (७०।२)

करञ्ज::रीठाकरञ्जरीठाकरञ्जकस् त्व् अन्यो गुच्छलो गुच्छपुष्पकः । (७१।१)

रीठा गुच्छफलो ऽरिष्टो मङ्गल्यः कुम्भबीजकः । (७१।२)

प्रकीर्यः सोमवल्कश् च फेनिलो रुद्रसंज्ञकः ॥ (७१।३)

रीठाकरञ्जस् तिक्तोष्णः कटुः स्निग्धश् च वातजित् । (७२।१)

कफघ्नः कुष्ठकण्डूतिविषविस्फोटनाशनः ॥ (७२।२)

अङ्कोलअङ्कोलः कोठरो रेची गूढपत्त्रो निकोचकः । (७३।१)

गुप्तस्नेहः पीतसारो मदनो गूढमल्लिका ॥ (७३।२)

पीतस् ताम्रफलो ज्ञेयो दीर्घकालो गुणाढ्यकः । (७४।१)

कोलः कोलम्बकर्णश् च गन्धपुष्पश् च रोचनः । (७४।२)

विज्ञानतैलगर्भश् च स्मृतिसंख्याभिधा स्मृतः ॥ (७४।३)

अङ्कोलः कटुकः स्निग्धो विषलूतादिदोषनुत् । (७५।१)

कफानिलहरः सूतशुद्धिकृत् रेचनीयकः ॥ (७५।२)

नीलनीलस् तु नीलवृक्षो वातारिः शोफनाशनो नखनामा । (७६।१)

नखवृक्षश् च नखालुर् नखप्रियो दिग्गजेन्द्रमितसंज्ञः ॥ (७६।२)

नीलवृक्षस् तु कटुकः कषायोष्णो लघुस् तथा । (७७।१)

वातामयप्रशमनो नानाश्वयथुनाशनः ॥ (७७।२)

सर्जसर्जः सर्जरसः शालः कालकुटो रजोद्भवः । (७८।१)

वल्लीवृक्षश् चीरपर्णो रालः कार्श्यो ऽजकर्णकः ॥ (७८।२)

वस्तकर्णः कषायी च ललनो गन्धवृक्षकः । (७९।१)

वंशश् च शालनिर्यासो दिव्यसारः सुरेष्टकः । (७९।२)

शूरो ऽग्निवल्लभश् चैव यक्षधूपः सुसिद्धकः ॥ (७९।३)

सर्जस् तु कटुतिक्तोष्णो हिमः स्निग्धो ऽतिसारजित् । (८०।१)

पित्तास्रदोषकुष्ठघ्नः कण्डूविस्फोटवातजित् ॥ (८०।२)

जरणद्रुमजरणद्रुमो ऽश्वकर्णस् तार्क्ष्यप्रसवश् च शस्यसंवरणः । (८१।१)

धन्यश् च दीर्घपर्णः कुशिकतरुः कौशिकश् चापि ॥ (८१।२)

अश्वकर्णः कटुस् तिक्तः स्निग्धः पित्तास्रनाशनः । (८२।१)

ज्वरविस्फोटकण्डूघ्नः शिरोदोषार्तिकृन्तनः ॥ (८२।२)

तालतालस् तालद्रुमः पत्री दीर्घस्कन्धो ध्वजद्रुमः । (८३।१)

तृणराजो मधुरसो मदाढ्यो दीर्घपादपः ॥ (८३।२)

चिरायुस् तरुराजश् च गजभक्ष्यो दृढच्छदः । (८४।१)

दीर्घपत्रो गुच्छपत्त्रो ऽप्य् आसवद्रुश् च षोडश ॥ (८४।२)

तालश् च मधुरः शीतपित्तदाहश्रमापहः । (८५।१)

सरश् च कफपित्तघ्नो मदकृद् दाहशोषनुत् ॥ (८५।२)

श्रीतालश्रीतालो मधुतालश् च लक्ष्मीतालो मृदुच्छदः । (८६।१)

विशालपत्त्रो लेखार्हो मसीलेख्यदलस् तथा । (८६।२)

शिरालपत्त्रकश् चैव याम्योद्भूतो नवाह्वयः ॥ (८६।३)

श्रीतालो मधुरो ऽत्यन्तम् ईषच् चैव कषायकः । (८७।१)

पित्तजित् कफकारी च वातम् ईषत् प्रकोपयेत् ॥ (८७।२)

हिन्तालहिन्तालः स्थूलतालश् च वल्कपत्त्रो बृहद्दलः । (८८।१)

गर्भस्रावी लतातालो भीषणो बहुकण्टकः ॥ (८८।२)

स्थिरपत्त्रो द्विधालेख्यः शिरापत्त्रः स्थिराङ्घ्रिपः । (८९।१)

अम्लसारो बृहत्तालः स्याच् चतुर्दशधाभिधः ॥ (८९।२)

हिन्तालो मधुराम्लश् च कफकृत् पित्तदाहनुत् । (९०।१)

श्रमतृष्णापहारी च शिशिरो वातदोषनुत् ॥ (९०।२)

माडमाडो माडद्रुमो दीर्घो ध्वजवृक्षो वितानकः । (९१।१)

मद्यद्रुमो मोहकारी मदद्रुर् ऋजुर् अङ्कधा ॥ (९१।२)

माडस् तु शिशिरो रुच्यः कषायः पित्तदाहकृत् । (९२।१)

तृष्णापहो मरुत्कारी श्रमहृत् श्लेष्मकारकः ॥ (९२।२)

तूलतूलं तूदं ब्रह्मकाष्ठं ब्राह्मणेष्टं च यूपकम् । (९३।१)

ब्रह्मदारु सुपुष्पं च सुरूपं नीलवृन्तकम् । (९३।२)

क्रमुकं विप्रकाष्ठं च मृदुसारं द्विभूमितम् ॥ (९३।३)

तूलं तु मधुराम्लं स्यात् वातपित्तहरं सरम् । (९४।१)

दाहप्रशमनं वृष्यं कषायं कफनाशनम् ॥ (९४।२)

तमालतमालो नीलतालः स्यात् कालस्कन्धस् तमालकः । (९५।१)

नीलध्वजश् च तापिञ्छः कालतालो महाबलः ॥ (९५।२)

तमालो मधुरो बल्यो वृष्यश् च शिशिरो गुरुः । (९६।१)

कफपित्ततृषादाहश्रमभ्रान्तिकरः परः ॥ (९६।२)

कदम्बकदम्बो वृत्तपुष्पश् च सुरभिर् ललनाप्रियः । (९७।१)

कादम्बर्यः सिन्धुपुष्पो मदाढ्यः कर्णपूरकः ॥ (९७।२)

कदम्बस् तिक्तकटुकः कषायो वातनाशनः । (९८।१)

शीतलः कफपित्तार्तिनाशनः शुक्रवर्धनः ॥ (९८।२)

धाराकदम्बधाराकदम्बः प्रावृष्यः पुलकी भृङ्गवल्लभः । (९९।१)

मेघागमप्रियो नीपः प्रावृषेण्यः कदम्बकः ॥ (९९।२)

धूलीकदम्बधूलीकदम्बः क्रमुकप्रसूनः परागपुष्पो बलभद्रसंज्ञकः । (१००।१)

वसन्तपुष्पो मकरन्दवासो भृङ्गप्रियो रेणुकदम्बको ऽष्टौ ॥ (१००।२)

भूमीकदम्बभूमीकदम्बो भूनिम्बो भूमिजो भृङ्गवल्लभः । (१०१।१)

लघुपुष्पो वृत्तपुष्पो विषघ्नो व्रणहारकः ॥ (१०१।२)

त्रिकदम्बाः कटुर् वर्ण्या विषशोफहरा हिमाः । (१०२।१)

कषायाः पित्तलास् तिक्ता वीर्यवृद्धिकराः पराः ॥ (१०२।२)

वानीरवानीरो वृत्तपुष्पश् च शाखालो जलवेतसः । (१०३।१)

व्याधिघातः परिव्याधो नादेयो जलसम्भवः ॥ (१०३।२)

वानीरस् तिक्तशिशिरो रक्षोघ्नो व्रणशोधनः । (१०४।१)

पित्तास्रकफदोषघ्नः संग्राही च कषायकः ॥ (१०४।२)

कुम्भिन्कुम्भी रोमालुविटपी रोमशः पर्पटद्रुमः । (१०५।१)

कुम्भी कटुः कषायोष्णो ग्राही वातकफापहः ॥ (१०५।२)

वेतसवेतसो निचुलो ज्ञेयो वञ्जुलो दीर्घपत्त्रकः । (१०६।१)

कलनो मञ्जरीनम्रः सुषेणो गन्धपुष्पकः ॥ (१०६।२)

वेतसः कटुकः स्वादुः शीतो भूतविनाशनः । (१०७।१)

पित्तप्रकोपणो रुच्यो विज्ञेयो दीपनः परः । (१०७।२)

रक्तपित्तोद्भवं रोगं कुष्ठदोषं च नाशयेत् ॥ (१०७।३)

धवधवो दृढतरुर् गौरः कषायो मधुरत्वचः । (१०८।१)

शुक्लवृक्षः पाण्डुतरुर् धवलः पाण्डुरो नव ॥ (१०८।२)

धवः कषायः कटुकः कफघ्नो ऽनिलनाशनः । (१०९।१)

पित्तप्रकोपणो रुच्यो विज्ञेयो दीपनः परः ॥ (१०९।२)

धन्वनधन्वनो रक्तकुसुमो धनुवृक्षो महाबलः । (११०।१)

रुजापहः पिच्छलको रूक्षः स्वादुफलश् च सः ॥ (११०।२)

धन्वनः कटुकोष्णश् च कषायः कफनाशनः । (१११।१)

दाहशोषकरो ग्राही कण्ठामयशमप्रदः ॥ (१११।२)

भूर्जभूर्जो वल्कद्रुमो भुर्जः सुचर्मा भूर्जपत्रकः । (११२।१)

चित्रत्वग् बिन्दुपत्त्रश् च रक्षापत्त्रो विचित्रकः । (११२।२)

भूतघ्नो मृदुपत्त्रश् च शैलेन्द्रस्थो द्विभूमितः ॥ (११२।३)

भूर्जः कटुकषायोष्णो भूतरक्षाकरः परः । (११३।१)

त्रिदोषशमनः पथ्यो दुष्टकौटिल्यनाशनः ॥ (११३।२)

तिनिशतिनिशः स्यन्दनश् चक्री शताङ्गः शकटो रथः । (११४।१)

रथिको भस्मगर्भश् च मेषी जलधरो दश ॥ (११४।२)

तिनिशस् तु कषायोष्णः कफरक्तातिसारजित् । (११५।१)

ग्राहको दाहजननो वातामयहरः परः ॥ (११५।२)

अर्जुनअर्जुनः शम्बरः पार्थश् चित्रयोधी धनंजयः । (११६।१)

वैरान्तकः किरीटी च गाण्डीवी शिवमल्लकः ॥ (११६।२)

सव्यसाची नदीसर्जः कर्णारिः कुरुवीरकः । (११७।१)

कौन्तेय इन्द्रसूनुश् च वीरद्रुः कृष्णसारथिः । (११७।२)

पृथाजः फाल्गुनो धन्वी ककुभश् चैकविंशतिः ॥ (११७।३)

अर्जुनस् तु कषायोष्णः कफघ्नो व्रणनाशनः । (११८।१)

पित्तश्रमतृषार्तिघ्नो मारुतामयकोपनः ॥ (११८।२)

हरिद्रुहरिद्रुः पीतदारुः स्यात् पीतकाष्ठश् च पीतकः । (११९।१)

कदम्बकः सुपुष्पश् च सुराह्वः पीतकद्रुमः ॥ (११९।२)

हरिद्रुः शीतलस् तिक्तो मङ्गल्यः पित्तवान्तिजित् । (१२०।१)

अङ्गकान्तिकरो बल्यो नानात्वग्दोषनाशनः ॥ (१२०।२)

दग्धादग्धा दग्धरुहा प्रोक्ता दग्धिका च स्थलेरुहा । (१२१।१)

रोमशा कर्कशदला भस्मरोहा सुदग्धिका ॥ (१२१।२)

दग्धा कटुकषायोष्णा कफवातनिकृन्तनी । (१२२।१)

पित्तप्रकोपणी चैव जठरानलदीपनी ॥ (१२२।२)

शाखोटशाखोटः स्याद् भूतवृक्षो गवाक्षी यूकावासो भूर्जपत्त्रश् च पीतः । (१२३।१)

कौशिक्यो ऽजक्षीरनाशश् च सूक्तस् तिक्तोष्णो ऽयं पित्तकृद् वातहारी ॥ (१२३।२)

शाकशाकः क्रकचपत्त्रः स्यात् खरपत्त्रो ऽतिपत्त्रकः । (१२४।१)

महीसहः श्रेष्टकाष्ठः स्थिरसारो गृहद्रुमः ॥ (१२४।२)

शाकस् तु सारकः प्रोक्तः पित्तदाहश्रमापहः । (१२५।१)

कफघ्नं मधुरं रुच्यं कषायं शाकवल्कलम् ॥ (१२५।२)

शिंशपाशिंशपा तु महाश्यामा कृष्णसारा च धूम्रिका । (१२६।१)

तीक्ष्णसारा च धीरा च कपिला कृष्णशिंशपा ॥ (१२६।२)

श्यामादिशिंशपा तिक्ता कटूष्णा कफवातनुत् । (१२७।१)

नष्टाजीर्णहरा दीप्या शोफातीसारहारिणी ॥ (१२७।२)

शिंशपा::श्वेतशिंशपाशिंशपान्या श्वेतपत्त्रा सिताह्वादिश् च शिंशपा । (१२८।१)

श्वेतादिशिंशपा तिक्ता शिशिरा पित्तदाहनुत् ॥ (१२८।२)

कपिलशिंशपाकपिला शिंशपा चान्या पीता कपिलशिंशपा । (१२९।१)

सारिणी कपिलाक्षी च भस्मगर्भा कुशिंशपा ॥ (१२९।२)

कपिला शिंशपा तिक्ता शीतवीर्या श्रमापहा । (१३०।१)

वातपित्तज्वरघ्नी च छर्दिहिक्काविनाशिनी ॥ (१३०।२)

शिंशपात्रितयं वर्ण्यं हिमशोफविसर्पजित् । (१३१।१)

पित्तदाहप्रशमनं बल्यं रुचिकरं परम् ॥ (१३१।२)

असनअसनस् तु महासर्जः सौरिर् बन्धूकपुष्पकः । (१३२।१)

प्रियको बीजवृक्षश् च नीलकः प्रियशालकः ॥ (१३२।२)

असनः कटुर् उष्णश् च तिक्तो वातार्तिदोषनुत् । (१३३।१)

सारको गलदोषघ्नो रक्तमण्डलनाशनः ॥ (१३३।२)

असन::नीलबीजद्वितीयो नीलबीजः स्यान् नीलपत्त्रः सुनीलकः । (१३४।१)

नीलद्रुमो नीलसारो नीलनिर्यासको रसैः ॥ (१३४।२)

बीजवृक्षौ कटू शीतौ कषायौ कुष्ठनाशनौ । (१३५।१)

सारकौ कण्डुदद्रुघ्नौ श्रेष्ठस् तत्रासितस् तयोः ॥ (१३५।२)

वरुणवरुणः श्वेतपुष्पश् च तिक्तशाकः कुमारकः । (१३६।१)

श्वेतद्रुमः साधुवृक्षः तमालो मारुतापहः ॥ (१३६।२)

वरुणः कटुर् उष्णश् च रक्तदोषहरः परः । (१३७।१)

शीर्षवातहरः स्निग्धो दीप्यो विद्रधिवातजित् ॥ (१३७।२)

पुत्रजीवपुत्रजीवः पवित्रश् च गर्भदः सुतजीवकः । (१३८।१)

कुटजीवो ऽपत्यजीवः सिद्धिदो ऽपत्यजीवकः ॥ (१३८।२)

पुत्रजीवो हिमो वृष्यः श्लेष्मदो गर्भजीवदः । (१३९।१)

चक्षुष्यः पित्तशमनो दाहतृष्णानिवारणः ॥ (१३९।२)

महापिण्डीतरुमहापिण्डीतरुः प्रोक्तः श्वेतपिण्डीतकश् च सः । (१४०।१)

करहाटः क्षुरश् चैव शस्त्रकोशतरुः सरः ॥ (१४०।२)

पिण्डीतरुः कषायोष्णस् त्रिदोषशमनो ऽपि च । (१४१।१)

चर्मरोगापहश् चैव विशेषाद् रक्तदोषजित् ॥ (१४१।२)

कारस्करकारस्करस् तु किम्पाको विषतिन्दुर् विषद्रुमः । (१४२।१)

गरद्रुमो रम्यफलः कुपाकः कालकूटकः ॥ (१४२।२)

कारस्करः कटूष्णश् च तिक्तः कुष्ठविनाशनः । (१४३।१)

वातामयास्रकण्डूतिकफामार्शोव्रणापहः ॥ (१४३।२)

कटभीकटभी नाभिका शौण्डी पाटली किणिही तथा । (१४४।१)

मधुरेणुः क्षुद्रशामा कैडर्यः श्यामला नव ॥ (१४४।२)

सितकटभीशितादिकटभी श्वेता किणिही गिरिकर्णिका । (१४५।१)

शिरीषपत्त्रा कालिन्दी शतपादी विषघ्निका । (१४५।२)

महाश्वेता महाशौण्डी महादिकटभी तथा ॥ (१४५।३)

कटभी भवेत् कटूष्णा गुल्मविषाध्मानशूलदोषघ्नी । (१४६।१)

वातकफाजीर्णरुजाशमनी श्वेता च तत्र गुणयुक्ता ॥ (१४६।२)

क्षवकक्षवकः क्षुरकस् तीक्ष्णः क्रूरो भूताङ्कुशः क्षवः । (१४७।१)

राजोद्वेजनसंज्ञश् च भूतद्रावी ग्रहाह्वयः ॥ (१४७।२)

भूताङ्कुशस् तीव्रगन्धः कषायोष्णः कटुस् तथा । (१४८।१)

भूतग्रहादिदोषघ्नः कफवातनिकृन्तनः ॥ (१४८।२)

देवसर्षपकदेवसर्षपकश् चाक्षो बदरो रक्तमूलकः । (१४९।१)

सुरसर्षपकश् चैन्द्रस् तथा सूक्ष्मदलः स्मृतः । (१४९।२)

सर्षपो निर्जरादिः स्यात् कुरराङ्घ्रिर् नवाभिधः ॥ (१४९।३)

देवसर्षपनामा तु कटूष्णः कफनाशनः । (१५०।१)

जन्तुदोषहरो रुच्यो वक्त्रामयविशोधनः ॥ (१५०।२)

लकुचलकुचो लिकुचः शालः कषायी दृढवल्कलः । (१५१।१)

डहुः कार्श्यश् च शूरश् च स्थूलस्कन्धो नवाह्वयः ॥ (१५१।२)

लकुचः स्वरसे तिक्तः कषायोष्णो लघुस् तथा । (१५२।१)

कफदोषहरो दाही मलसंग्रहदायकः ॥ (१५२।२)

विकङ्कतविकङ्कतो व्याघ्रपादो ग्रन्थिलः स्वादुकण्टकः । (१५३।१)

कण्ठपादो बहुफलो गोपघोण्टा स्रुवद्रुमः ॥ (१५३।२)

मृदुफलो दन्तकाष्ठो यज्ञीयो ब्रह्मपादपः । (१५४।१)

पिण्डरोहिणकः पूतः किङ्किणी च त्रिपञ्चधा ॥ (१५४।२)

विकङ्कतो ऽम्लमधुरः पाके ऽतिमधुरो लघुः । (१५५।१)

दीपनः कामलास्रघ्नः पाचनः पित्तनाशनः ॥ (१५५।२)

इत्थं वन्यमहीरुहाह्वयगुणाभिख्यानमुख्यानया भङ्ग्या भङ्गुरिताभिधान्तरमहाभोगश्रिया भास्वरम् । (१५६।१)

वैद्यो वै द्यतु वर्गम् एनम् अखिलं विज्ञाय वैज्ञानिकः प्रज्ञालोकविजृम्भणेन सहसा स्वैरं गदानां गणम् ॥ (१५६।२)

ये वृश्चन्ति नृणां गदान् गुरुतरान् आक्रम्य वीर्यासिना ये स्थित्वापि वने गुणेन सरुजां स्वेनावनं तन्वते । (१५७।१)

तेषाम् एष महान् असीममहिमा वन्यात्मनां वासभूर् वृक्षाणां भणितो भिषग्भिर् असमो यो वृक्षवर्गाख्यया ॥ (१५७।२)

यः काश्मीरकुलोज्ज्वलाम्बुजवनीहंसो ऽपि संसेव्यते नित्योल्लासितनीलकण्ठमनसः प्रीत्याद्यभग्नश्रिया । (१५८।१)

तस्यायं नवमः कृतौ नरहरेर् वर्गः प्रभद्रादिको भद्रात्मन्य् अभिधानशेखरशिखाचूडामणौ संस्थितः ॥ (१५८।२)