धन्वन्तरीयमदनादिहलायुधादीन् विश्वप्रकाश्यमरकोषसशेषराजौ । (१।१)

आलोक्य लोकविदितांश् च विचिन्त्य शब्दान् द्रव्याभिधानगणसंग्रह एष सृष्टः ॥ (१।२)

आयुःश्रुतीनाम् अतुलोपकारकं धन्वन्तरिग्रन्थमतानुसारकम् । (२।१)

आचक्ष्महे लक्षणलक्ष्मधारकं नामोच्चयं सर्वरुजापसारकम् ॥ (२।२)

निर्देशलक्षणपरीक्षणनिर्णयेन नानाविधौषधविचारपरायणो यः । (३।१)

सो ऽधीत्य यत् सकलम् एनम् अवैति सर्वं तस्माद् अयं जयति सर्वनिघण्टुराजः ॥ (३।२)

नानाविधौषधिरसाह्वयवीर्यपाकप्रस्तावनिस्तरणपण्डितचेतनो ऽपि । (४।१)

मुह्यत्य् अवश्यम् अनवेक्ष्य निघण्टुम् एनं तस्माद् अयं विरचितो भिषजां हिताय ॥ (४।२)

निघण्टुना विना वैद्यो विद्वान् व्याकरणं विना । (५।१)

अनभ्यासेन धानुष्कस् त्रयो हास्यस्य भाजनम् ॥ (५।२)

नानादेशविशेषभाषितवशाद् यत् संस्कृतप्राकृतापभ्रंशादिकनाम्नि नैव गणना द्रव्योच्चयव्याहृतौ । (६।१)

तस्माद् अत्र तु यावतास्त्य् उपकृतिस् तावन् मया गृह्यते पाथोदैः परिपीयते किम् अखिलं तद् वारि वारां निधेः ॥ (६।२)

आभीरगोपालपुलिन्दतापसाः पान्थास् तथान्ये ऽपि च वन्यपारगाः । (७।१)

परीक्ष्य तेभ्यो विविधौष ततः प्रयोजयेत् ॥ (७।२)

नानाभिधेयम् अथ यत्र शिवासमङ्गाश्यामादिनाम निगमेषु निवेशितं यत् । (८।१)

प्रस्ताववीर्यरसयोगवशाद् अमुष्य बुद्ध्या विमृश्य भिषजां च धृतिर् विधेया ॥ (८।२)

नामानि क्वचिद् इह रूढितः स्वभावात् देश्योक्त्या क्वचन च लाञ्छनोपमाभ्याम् । (९।१)

वीर्येण क्वचिद् इतराह्वयादिदेशात् द्रव्याणां ध्रुवम् इति सप्तधोदितानि ॥ (९।२)

अत्रौषधीनिवहनामगुणाभिधानप्रस्तावतस् तदुपयुक्ततयेतराणि । (१०।१)

क्षेत्रावनीधरनदीनरतिर्यगादीन् व्याख्यागुणैर् अतिसविस्तरम् ईरितानि ॥ (१०।२)

एकः को ऽपि सचेतसां यदि मुदे कल्पेत जल्पे गुणस् तत्रान्ये ऽपि विनार्थनां बहुमतिं सन्तः स्वयं तन्वते । (११।१)

अप्य् आर्द्रीकृतशैलसानुगशिलाम् आपीय चान्द्रीं सुधाम् अम्भोधिः कुमुदैर् दृशश् च जगतां नन्दन्ति केनार्दिताः ॥ (११।२)

अप्रसिद्धाभिधं चात्र यद् औषधम् उदीरितम् । (१२।१)

तस्याभिधाविवेकः स्याद् एकार्थादिनिरूपणे ॥ (१२।२)

रम्भाश्यामादिनाम्ना ये स्वर्गस्त्रीतरुणीति च । (१३।१)

अर्था नानार्थतन्त्रोक्तास् त्यक्तास् ते ऽस्मिन्न् अपार्थकाः ॥ (१३।२)

व्यक्तिः कृतात्र कर्णाटमहाराष्ट्रीयभाषया । (१४।१)

आन्ध्रलाटादिभाषास् तु ज्ञातव्यास् तद्द्वयाश्रयाः ॥ (१४।२)

एतत् त्रिनेत्रगुणनीयगुणानुविद्धवर्णाढ्यवृत्तसितमौक्तिकवर्गसारम् । (१५।१)

कण्ठे सतां सकलनिवृतिधामनामचिन्तामणिप्रकरदाम करोतु केलिम् ॥ (१५।२)

अत्रानूपादिर् अस्माद् अवनिर् अथ गुडूचीशताह्वादिको द्वौ तत्प्रान्ते पर्पटादिस् तदुपरि पठितौ पिप्पलीमूलकादिः । (१६।१)

शाल्मल्यादिः प्रभद्रादिकम् अनु करवीरादिर् आम्रादिर् अन्यस् तस्याग्रे चन्दनादिस् तदनु निगदितः कोमलः काञ्चनादिः ॥ (१६।२)

पानीयः क्षीरशाल्यादिकम् अनु कथितो मासमानुष्यकादिः सिंहादिः स्याद् गदादिस् तदनु भवति सत्त्वाधिको मिश्रको ऽन्यः । (१७।१)

एकार्थादिस् तद् एतैस् त्रिकरपरिचितैः प्रातिभोन्मेषसर्गं वर्गैर् आसाद्य वैद्यो निजमतहृदये निस्तरां निश्चिनोतु ॥ (१७।२)

काश्मीरेण कपर्दिपादकमलद्वंद्वार्चनोपार्जितश्रीसौभाग्ययशःप्रतापपदवी धाम्ना प्रतिष्ठापिता । (१८।१)

सेयं श्रीनरसिंहनामविदुषः स्वर्वैद्यविद्यास्थितिः प्रीत्या प्राप्तसुवर्णराजिरचना चित्रोज्ज्वला पीठिका ॥ (१८।२)

अन्यत्र विद्यमानत्वाद् उपयोगानवेक्षणात् । (१९।१)

वृथा विस्तरभीत्या च नोक्तो गुणगणो मया ॥ (१९।२)