गुडूची चाथ मूर्वा च पटोलो ऽरण्यजस् तथा । (१।१)

काकोली च द्विधा प्रोक्ता माषपर्णी तथापरे ॥ (१।२)

मुद्गपर्णी च जीवन्ती त्रिविधा चाथ लिङ्गिनी । (२।१)

कटुकोशातकी चैव कपिकच्छुस् तथापरे ॥ (२।२)

खलता कटुतुम्बी च देवदाली तथा स्मृता । (३।१)

वन्ध्याकर्कोटकी प्रोक्ता कटुतुण्ड्य् आखुकर्णिका ॥ (३।२)

द्विधेन्द्रवारुणी चात्र यवतिक्तेश्वरी तथा । (४।१)

ज्योतिष्मती द्विधा चैव द्विधा च गिरिकर्णिका ॥ (४।२)

मोरटश् चाथ चेद् इन्दीवरा वस्तान्त्रिका च सा । (५।१)

सोमवल्ली तथा वत्सादनी गोपालकर्कटी ॥ (५।२)

काकतुण्डी द्विधा चाथ गुञ्जा द्विर् वृद्धदारु च । (६।१)

कैवर्ती ताम्रवल्ली च काण्डीरी चाथ जन्तुका ॥ (६।२)

अम्लपर्णी तथा शङ्खपुष्पी चावर्तकी तथा । (७।१)

कर्णस्फोटा तथा कट्वी लता चैवामृतस्रवा । (७।२)

पुत्रदा च पलाशी च विज्ञेयात्र नवाभिधा ॥ (७।३)

सुमतिभिर् इत्थम् अनुक्ता बोद्धव्या वीरुधः क्रमाद् एताः । (८।१)

अस्मिन् वीरुद्वर्गे नाम्ना च गुणैश् च कीर्त्यन्ते ॥ (८।२)

आ पानीयात् परिगणनयैवाप्रसिद्धाभिधाना नाम्नाम् उक्ता परिमितिकथाप्य् अत्र सर्वौषधीनाम् । (९।१)

सापि क्वापि स्फुटम् अभिधया क्वापि च प्रौढिभङ्ग्या प्रोक्ता नोक्ता प्रथितविषये सापि नष्टाङ्कवाक्ये ॥ (९।२)

तस्माद् इह न यत्रोक्ता नाम्नाम् अङ्कादिनिर्मितिः । (१०।१)

तत्र तत्राष्टसंख्यैव ज्ञेया सर्वत्र सूरिभिः ॥ (१०।२)

यद्य् अपि क्वापि नष्टाङ्कसंख्यानियतिर् ईक्ष्यते । (११।१)

तत्र स्फुटत्वबुद्ध्यैव नोक्ता संख्येति बुध्यताम् ॥ (११।२)

द्रव्याणां गणयशो नियोगवशतो वीर्यं परे प्रोचिरे प्राचीनैर् न च तद्वशेन निगमेषूक्तश् चिकित्साक्रमः । (१२।१)

तस्यान्नैगमयोगसंग्रहविदां संवादवाग्भिस् तथा नैवास्माभिर् अभाणि किंतु तद् इह प्रत्येकशः कथ्यते ॥ (१२।२)

गुडूचीज्ञेया गुडूच्य् अमृतवल्ल्य् अमृता ज्वरारिः श्यामा वरा सुरकृता मधुपर्णिका च । (१३।१)

छिन्नोद्भवामृतलता च रसायनी च छिन्ना च सोमलतिकामृतसम्भवा च ॥ (१३।२)

वत्सादनी छिन्नरुहा विशल्या भिषक्प्रिया कुण्डलिनी वयःस्था । (१४।१)

जीवन्तिका नागकुमारिका च स्याच् छद्मिका सैव च चण्डहासा ॥ (१४।२)

पिण्डगुडूचीअन्या कन्दोद्भवा कन्दामृता पिण्डगुडूचिका । (१५।०)

बहुच्छिन्ना बहुरुहा पिण्डालुः कन्दरोहिणी ॥ (१५।१)

पूर्वा वार्धिकराह्वा स्याद् उत्तरा लोकसंज्ञिका । (१६।१)

गुडूच्योर् उभयोर् इत्थम् एकत्रिंशद् इहाभिधाः ॥ (१६।२)

ज्ञेया गुडूची गुरुर् उष्णवीर्या तिक्ता कषाया ज्वरनाशिनी च । (१७।१)

दाहार्तितृष्णावमिरक्तवातप्रमेहपाण्डुभ्रमहारिणी च ॥ (१७।२)

कन्दोद्भवा गुडूची च कटूष्णा संनिपातहा विषघ्नी ज्वरभूतघ्नी वलीपलितनाशिनी ॥ (१८।१)

मूर्वामूर्वा दिव्यलता मिरा मधुरसा देवी त्रिपर्णी मधुश्रेणी भिन्नदलामरी मधुमती तिक्ता पृथक्पर्णिका । (१९।१)

गोकर्णी लघुपर्णिका च दहनी तेजस्विनी मोरटा देवश्रेणीमधूलिकामधुदलाः स्युः पीलुनी रक्तला ॥ (१९।२)

सुखोषिता स्निग्धपर्णी पीलुपर्णी मधुस्रवा । (२०।१)

ज्वलनी गोपवल्ली चेत्य् अष्टविंशतिसंज्ञकाः ॥ (२०।२)

मूर्वा तिक्तकषायोष्णा हृद्रोगकफवातहृत् । (२१।१)

वमिप्रमेहकुष्ठादिविषमज्वरहारिणी ॥ (२१।२)

पटोलस्यात् पटोलः कटुफलः कुलकः कर्कशच्छदः । (२२।१)

राजनामामृतफलः पाण्डुः पाण्डुफलो मतः ॥ (२२।२)

बीजगर्भो नागफलः कुष्ठारिः कासमर्दनः । (२३।१)

पञ्चराजिफलो ज्योत्स्नी कुष्ठघ्नः षोडशाह्वयः ॥ (२३।२)

पटोलः कटुतिक्तोष्णः रक्तपित्तबलासजित् । (२४।१)

कफकण्डूतिकुष्ठासृग्ज्वरदाहार्तिनाशनः ॥ (२४।२)

काकोलीकाकोली मधुरा काकी कालिका वायसोलिका । (२५।१)

क्षीरा च ध्वाङ्क्षिका वीरा शुक्ला धीरा च मेदुरा ॥ (२५।२)

ध्वाङ्क्षोली स्वादुमांसी च वयःस्था चैव जीविनी । (२६।१)

इत्य् एषा खलु काकोली ज्ञेया पञ्चदशाह्वया ॥ (२६।२)

काकोली मधुरा स्निग्धा क्षयपित्तानिलार्तिनुत् । (२७।१)

रक्तदाहज्वरघ्नी च कफशुक्रविवर्धनी ॥ (२७।२)

द्वितीया क्षीरकाकोली क्षीरशुक्ला पयस्विनी । (२८।१)

पयस्या क्षीरमधुरा वीरा क्षीरविषाणिका ॥ (२८।२)

जीववल्ली जीवशुक्ला स्याद् इत्य् एषा नवाह्वया । (२९।१)

रसवीर्यविपाकेषु काकोल्या सदृशी च सा ॥ (२९।२)

माषपर्णीमाषपर्णी तु काम्बोजी कृष्णवृन्ता महासहा । (३०।१)

आर्द्रमाषा मांसमाषा मङ्गल्या हयपुच्छिका ॥ (३०।२)

हंसमाषाश्वपुच्छा च पाण्डुरा माषपत्त्रिका । (३१।१)

कल्याणी वज्रमूली च शालिपर्णी विसारिणी ॥ (३१।२)

आत्मोद्भवा बहुफला स्वयम्भूः सुलभा घना । (३२।१)

इत्य् एषा माषपर्णी स्याद् एकविंशतिनामका ॥ (३२।२)

माषपर्णी रसे तिक्ता वृष्या दाहज्वरापहा । (३३।१)

शुक्रवृद्धिकरी बल्या शीतला पुष्टिवर्धिनी ॥ (३३।२)

मुद्गपर्णीमुद्गपर्णी क्षुद्रसहा शिम्बी मार्जारगन्धिका । (३४।१)

वनजा रिङ्गिणी ह्रस्वा सूर्यपर्णी कुरङ्गिका ॥ (३४।२)

कांसिका काकमुद्गा च वनमुद्गा वनोद्भवा । (३५।१)

अरण्यमुद्गा वन्येति ज्ञेया पञ्चदशाह्वया ॥ (३५।२)

मुद्गपर्णी हिमा कासवातरक्तक्षयापहा । (३६।१)

पित्तदाहज्वरान् हन्ति चक्षुष्या शुक्रवृद्धिकृत् ॥ (३६।२)

जीवन्तीजीवन्ती स्याज् जीवनी जीवनीया जीवा जीव्या जीवदा जीवदात्री । (३७।१)

शाकश्रेष्ठा जीवभद्रा च भद्रा मङ्गल्या च क्षुद्रजीवा यशस्या ॥ (३७।२)

शृङ्गाटी जीवपृष्ठा च काञ्जिका शशशिम्बिका । (३८।१)

सुपिङ्गलेति जीवन्ती ज्ञेया चाष्टादशाभिधा ॥ (३८।२)

जीवन्ती मधुरा शीता रक्तपित्तानिलापहा । (३९।१)

क्षयदाहज्वरान् हन्ति कफवीर्यविवर्धनी ॥ (३९।२)

बृहज्जीवन्तीजीवन्त्य् अन्या बृहत्पूर्वा पुत्रभद्रा प्रियंकरी । (४०।१)

मधुरा जीवपृष्ठा च बृहज्जीवा यशस्करी ॥ (४०।२)

एवम् एव बृहत्पूर्वा रसवीर्यबलान्विता । (४१।१)

भूतविद्रावणी ज्ञेया वेगाद् रसनियामिका ॥ (४१।२)

हेमाहेमा हेमवती सौम्या तृणग्रन्थिर् हिमाश्रया । (४२।१)

स्वर्णपर्णी सुजीवन्ती स्वर्णजीवा सुवर्णिका ॥ (४२।२)

हेमपुष्पी स्वर्णलता स्वर्णजीवन्तिका च सा । (४३।१)

हेमवल्ली हेमलता नामान्य् अस्याश् चतुर्दश ॥ (४३।२)

स्वर्णजीवन्तिका वृष्या चक्षुष्या मधुरा तथा । (४४।१)

शिशिरा वातपित्तासृग्दाहजिद् बलवर्धनी ॥ (४४।२)

लिङ्गिनीलिङ्गिनी बहुपत्त्रा स्याद् ईश्वरी शैवमल्लिका । (४५।१)

स्वयम्भूर् लिङ्गसम्भूता लिङ्गी चित्रफलामृता ॥ (४५।२)

पण्डोली लिङ्गजा देवी चण्डापस्तम्भिनी तथा । (४६।१)

शिवजा शिववल्ली च विज्ञेया षोडशाह्वया ॥ (४६।२)

लिङ्गिनी कटुर् उष्णा च दुर्गन्धा च रसायनी । (४७।१)

सर्वसिद्धिकरी दिव्या वश्या रसनियामिनी ॥ (४७।२)

कोशातकीकोषातकी कृतच्छिद्रा जालिनी कृतवेधना । (४८।१)

क्ष्वेडा सुतिक्ता घण्टाली मृदङ्गफलिनी तथा ॥ (४८।२)

कोशातकी तु शिशिरा कटुकाल्पकषायका । (४९।१)

पित्तवातकफघ्नी च मलाध्मानविशोधिनी ॥ (४९।२)

कपिकच्छुकपिकच्छुर् आत्मगुप्ता स्वयंगुप्ता महर्षभी । (५०।१)

लाङ्गूली कुण्डली चण्डा मर्कटी दुरभिग्रहा ॥ (५०।२)

कपिरोमफला गुप्ता दुःस्पर्शा कच्छुरा जया । (५१।१)

प्रावृषेण्या शूकशिम्बी बदरी गुरुर् आर्षभी ॥ (५१।२)

शिम्बी वराहिका तीक्ष्णा रोमालुर् वनशूकरी । (५२।१)

कीशरोमा रोमवल्ली स्यात् षड्विंशतिनामका ॥ (५२।२)

कपिकच्छूः स्वादुरसा वृष्या वातक्षयापहा । (५३।१)

शीतपित्तास्रहन्त्री च विकृता व्रणनाशिनी ॥ (५३।२)

खवल्लीखवल्ल्य् आकाशवल्ली स्याद् अस्पर्शा व्योमवल्लिका । (५४।१)

आकाशनामपूर्वा सा वल्लीपर्यायगा स्मृता ॥ (५४।२)

आकाशवल्ली कटुका मधुरा पित्तनाशिनी । (५५।१)

वृष्या रसायनी बल्या दिव्यौषधिपरा स्मृता ॥ (५५।२)

कटुतुम्बीकटुतुम्बी कटुफला तुम्बिनी कटुतुम्बिनी । (५६।१)

बृहत्फला राजपुत्री तिक्तबीजा च तुम्बिका ॥ (५६।२)

कटुतुम्बी कटुस् तीक्ष्णा वान्तिकृत् श्वासवातजित् । (५७।१)

कासघ्नी शोधनी शोफव्रणविषापहा ॥ (५७।२)

जीमूतकजीमूतकः कण्टफला गरागरी वेणी सहा क्रोशफला च कट्फला । (५८।१)

घोरा कदम्बा विषहा च कर्कटी स्याद् देवदाली खलु सारमूषिका ॥ (५८।२)

वृत्तकोशा विषघ्नी च दाली लोमशपत्त्रिका । (५९।१)

तुरङ्गिका च तर्कारी नाम्नाम् एकोनविंशतिः ॥ (५९।२)

देवदाली तु तिक्तोष्णा कटुः पाण्डुकफापहा । (६०।१)

दुर्नामश्वासकासघ्नी कामलाभूतनाशनी ॥ (६०।२)

वन्ध्याकर्कोटकीवन्ध्या देवी वन्ध्यकर्कोटका स्यान् नागारातिर् नागहन्त्री मनोज्ञा । (६१।१)

पथ्या दिव्या पुत्रदात्री सुकन्दा श्रीकन्दा सा कन्दवल्लीश्वरी च ॥ (६१।२)

सुगन्धा सर्पदमनी विषकण्टकिनी वरा । (६२।१)

कुमारी भूतहन्त्री च नाम्नाम् इत्य् ऊनविंशतिः ॥ (६२।२)

वन्ध्याकर्कोटकी तिक्ता कटूष्णा च कफापहा । (६३।१)

स्थावरादिविषघ्नी च शस्यते सा रसायने ॥ (६३।२)

तिक्ततुण्डीतिक्ततुण्डी तु तिक्ताख्या कटुका कटुतुण्डिका । (६४।१)

बिम्बी च कटुतिक्तादितुण्डीपर्यायगा च सा ॥ (६४।२)

कटुतुण्डी कटुस् तिक्ता कफवान्तिविषापहा । (६५।१)

अरोचकास्रपित्तघ्नी सदा पथ्या च रोचनी ॥ (६५।२)

आखुकर्णीस्याद् आखुकर्णी कृषिका द्रवन्ती चित्रा सुकर्णोन्दुरुकर्णिका च । (६६।१)

न्यग्रोधिका मूषिकनागकर्णी स्याद् वृश्चिकर्णी बहुकर्णिका च ॥ (६६।२)

माता भूमिचरी चण्डा शम्बरी बहुपादिका । (६७।१)

प्रत्यक्श्रेणी वृषा चैव पुत्रश्रेण्य् अद्रिभूह्वया ॥ (६७।२)

आखुकर्णी कटूष्णा च कफपित्तहरा सदा । (६८।१)

आनाहज्वरशूलार्तिनाशिनी पाचनी परा ॥ (६८।२)

इन्द्रवारुणीऐन्द्रीन्द्रवारुण्य् अरुणा मृगादनी गवादनी क्षुद्रसहेन्द्रचिर्भिटा । (६९।१)

सूर्या विषघ्नी गुणकर्णिकामरा माता सुवर्णा सुफला च तारका ॥ (६९।२)

वृषभाक्षी गवाक्षी च पीतपुष्पीन्द्रवल्लरी । (७०।१)

हेमपुष्पी क्षुद्रफला वारुणी बालकप्रिया ॥ (७०।२)

रक्तेर्वारुर् विषलता शक्रवल्ली विषापहा । (७१।१)

अमृता विषवल्ली च ज्ञेयोनत्रिंशदाह्वया ॥ (७१।२)

इन्द्रवारुणिका तिक्ता कटुशीता च रोचनी । (७२।१)

गुल्मपित्तोदरश्लेष्मक्रिमिकुष्ठज्वरापहा ॥ (७२।२)

महेन्द्रवारुणीमहेन्द्रवारुणी रम्या चित्रवल्ली महाफला । (७३।१)

सा माहेन्द्री चित्रफला त्रपुसी त्रपुसा च सा ॥ (७३।२)

आत्मरक्षा विशाला च दीर्घवल्ली बृहत्फला । (७४।१)

स्याद् बृहद्वारुणी सौम्या नामान्य् अस्याश् चतुर्दश ॥ (७४।२)

महेन्द्रवारुणी ज्ञेया पूर्वोक्तगुणभागिनी । (७५।१)

रसे वीर्ये विपाके च किंचिद् एषा गुणाधिका ॥ (७५।२)

यवतिक्तायवतिक्ता महातिक्ता दृढपादा विसर्पिणी । (७६।१)

नाकुली नेत्रमीला च शङ्खिनी पत्रतण्डुली ॥ (७६।२)

तण्डुली चाक्षपीडा च सूक्ष्मपुष्पी यशस्विनी । (७७।१)

माहेश्वरी तिक्तयवा यावी तिक्तेति षोडश ॥ (७७।२)

यवतिक्ता सतिक्ताम्ला दीपनी रुचितत्परा । (७८।१)

क्रिमिकुष्ठविषघ्न्य् आमदोषघ्नी रेचनी च सा ॥ (७८।२)

रौद्रीरौद्री जटा रुद्रजटा च रुद्रा सौम्या सुगन्धा सुहता घना च । (७९।१)

स्याद् ईश्वरी रुद्रलता सुपत्त्रा सुगन्धपत्रा सुरभिः शिवाह्वा ॥ (७९।२)

पत्त्रवल्ली जटावल्ली रुद्राणी नेत्रपुष्करा । (८०।१)

महाजटा जटारुद्रा नाम्नां विंशतिर् ईरिता ॥ (८०।२)

जटा कटुरसा श्वासकासहृद्रोगनाशिनी । (८१।१)

विद्राविणी चैव रक्षसां च निबर्हिणी ॥ (८१।२)

ज्योतिष्मतीज्योतिष्मती स्वर्णलतानलप्रभा ज्योतिर्लता सा कटभी सुपिङ्गला । (८२।१)

दीप्ता च मेध्या मतिदो च दुर्जरा सरस्वती स्याद् अमृतार्कसंख्यया ॥ (८२।२)

तेजोवती बहुरसा कनकप्रभान्या तीक्ष्णा सुवर्णनकुली लवणाग्निदीप्ता । (८३।१)

तेजस्विनी सुरलताग्निफलाग्निगर्भा स्यात् कङ्गणी तद् अनु शैलसुता सुतैला ॥ (८३।२)

सुवेगा वायसी तीव्रा काकाण्डी वायसादनी । (८४।१)

गीर्लता श्रीफली सौम्या ब्राह्मी लवणकिंशुका ॥ (८४।२)

पारावतपदी पीता पीततैला यशस्विनी । (८५।१)

मेध्या मेधाविनी धीरा स्याद् एकत्रिंशदाह्वया ॥ (८५।२)

ज्योतिष्मती तिक्तरसा च रूक्षा किंचित् कटुर् वातकफापहा च । (८६।१)

दाहप्रदा दीपनकृच् च मेध्या प्रज्ञां च पुष्णाति तथा द्वितीया ॥ (८६।२)

अश्वक्षुराअश्वक्षुराद्रिकर्णी च कटभी दधिपुष्पिका । (८७।१)

गर्दभी सितपुष्पी च श्वेतस्पन्दापराजिता ॥ (८७।२)

श्वेता भद्रा सुपुष्पी च विषहन्त्री त्रिर् एकधा । (८८।१)

नागपर्यायकर्णी स्याद् अश्वाह्वादिक्षुरी स्मृता ॥ (८८।२)

गिरिकर्णी हिमा तिक्ता पित्तोपद्रवनाशिनी । (८९।१)

चक्षुष्या विषदोषघ्नी त्रिदोषशमनी च सा ॥ (८९।२)

नीलपुष्पीनीलपुष्पी महानीला स्यान् नीला गिरिकर्णिका । (९०।१)

गवादनी व्यक्तगन्धा नीलस्यन्दा षडाह्वया ॥ (९०।२)

नीलाद्रिकर्णी शिशिरा सतिक्ता रक्तातिसारज्वरदाहहन्त्री । (९१।१)

विच्छर्दिकोन्मादमदभ्रमार्तिश्वासातिकासामयहारिणी च ॥ (९१।२)

मोरटमोरटः कीर्णपुष्पश् च पीलुपत्त्रो मधुस्रवः । (९२।१)

घनमूलो दीर्घमूलः पुरुषः क्षीरमोरटः ॥ (९२।२)

मोरटः क्षीरबहुलो मधुरः सकषायकः । (९३।१)

पित्तदाहज्वरान् हन्ति वृष्यो बलविवर्धनः ॥ (९३।२)

इन्दीवराइन्दीवरा युग्मफला दीर्घवृत्तोत्तमारणी । (९४।१)

पुष्पमञ्जरिका द्रोणी करम्भा नलिका च सा ॥ (९४।२)

इन्दीवरा कटुः शीता पित्तश्लेष्मापहारिका । (९५।१)

चक्षुष्या कासदोषघ्नी व्रणक्रिमिहरा परा ॥ (९५।२)

वस्तान्त्रीवस्तान्त्री वृषगन्धाख्या मेषान्त्री वृत्तपत्त्रिका । (९६।१)

अजान्त्री वोकडी चैव स्याद् इत्य् एषा षडाह्वया ॥ (९६।२)

वस्तान्त्री स्यात् कटुरसा कासदोषविनाशिनी । (९७।१)

बीजदा गर्भजननी कीर्तिता भिषगुत्तमैः ॥ (९७।२)

सोमवल्लीसोमवल्ली महागुल्मा यज्ञश्रेष्ठा धनुर्लता । (९८।१)

सोमार्हा गुल्मवल्ली च यज्ञवल्ली द्विजप्रिया । (९८।२)

सोमक्षीरा च सोमा च यज्ञाङ्गा रुद्रसंख्यया ॥ (९८।३)

सोमवल्ली कटुः शीता मधुरा पित्तदाहनुत् । (९९।१)

तृष्णाविशोषशमनी पावनी यज्ञसाधनी ॥ (९९।२)

सौम्यासौम्या महिषवल्ली च प्रतिसोमान्त्रवल्लिका । (१००।१)

अपत्त्रवल्लिका प्रोक्ता काण्डशाखा षडाह्वया । (१००।२)

रसवीर्यविपाके च सोमवल्लीसमा स्मृता ॥ (१००।३)

वत्सादनीवत्सादनी सोमवल्ली विक्रान्ता मेचकाभिधा । (१०१।१)

पातालगरुडी तार्क्षी सौपर्णी गारुडी तथा ॥ (१०१।२)

वासनी दीर्घकाण्डा च दृढकाण्डा महाबला । (१०२।१)

दीर्घवल्ली दृढलता नामान्य् अस्याश् चतुर्दश ॥ (१०२।२)

वत्सादनी तु मधुरा पित्तदाहास्रदोषनुत् । (१०३।१)

वृष्या संतर्पणी रुच्या विषदोषविनाशिनी ॥ (१०३।२)

गोपालकर्कटीगोपालकर्कटी वन्या गोपकर्कटिका तथा । (१०४।१)

क्षुद्रेर्वारुः क्षुद्रफला गोपाली क्षुद्रचिर्भटा ॥ (१०४।२)

गोपालकर्कटी शीता मधुरा पित्तनाशनी । (१०५।१)

मूत्रकृच्छ्राश्मरीमेहदाहशोषनिकृन्तनी ॥ (१०५।२)

काकनासाकाकनासा ध्वाङ्क्षनासा काकतुण्डा च वायसी । (१०६।१)

सुरङ्गी तस्करस्नायुर् ध्वाङ्क्षतुण्डा सुनासिका ॥ (१०६।२)

वायसाह्वा ध्वाङ्क्षनखी काकाक्षा ध्वाङ्क्षनासिका । (१०७।१)

काकप्राणा च विज्ञेया नामान्य् अस्यास् त्रयोदश ॥ (१०७।२)

काकनासा तु मधुरा शिशिरा पित्तहारिणी । (१०८।१)

रसायनी दार्ढ्यकरी विशेषात् पलितापहा ॥ (१०८।२)

काकादनीकाकादनी काकपीलुः काकशिम्बी च रक्तला । (१०९।१)

ध्वाङ्क्षादनी वक्त्रशल्या दुर्मोहा वायसादनी ॥ (१०९।२)

काकतुण्डी ध्वाङ्क्षनखी वायसी काकदन्तिका । (११०।१)

ध्वाङ्क्षदन्तीति विज्ञेयास् तिस्रश् च दश चाभिधाः ॥ (११०।२)

काकादनी कटूष्णा च तिक्ता दिव्यरसायनी । (१११।१)

वातदोषहरा रुच्या पलितस्तम्भिनी परा ॥ (१११।२)

गुञ्जागुञ्जा चूडामणिः सौम्या शिखण्डी कृष्णलारुणा । (११२।१)

ताम्रिका शीतपाकी स्याद् उच्चटा कृष्णचूडिका ॥ (११२।२)

रक्ता च रक्तिका चैव काम्भोजी भिल्लिभूषणा । (११३।१)

वन्यास्या मानचूडा च विज्ञेया षोडशाह्वया ॥ (११३।२)

गुञ्जा::श्वेतकाम्भोजीद्वितीया श्वेतकाम्भोजी श्वेतगुञ्जा भिरिण्टिका । (११४।१)

काकादनी काकपीलुर् वक्त्रशल्या षडाह्वया ॥ (११४।२)

गुञ्जाद्वयं तु तिक्तोष्णं बीजं वान्तिकरी शिफा । (११५।१)

शूलघ्नं विषकृत् पत्त्रं वश्ये श्वेतं च शस्यते ॥ (११५।२)

वृद्धदारुकवृद्धदारुक आवेगी जुङ्गको दीर्घबालुकः । (११६।१)

वृद्धः कोटरपुष्पी स्याद् अजान्त्री छागलान्त्रिका ॥ (११६।२)

जीर्णदारु द्वितीया स्याज् जीर्णा फञ्जी सुपुष्पिका । (११७।१)

अजरा सूक्ष्मपत्त्रा च विज्ञेया च षडाह्वया ॥ (११७।२)

वृद्धदारुद्वयं गौल्यं पिच्छिलं कफवातहृत् । (११८।१)

बल्यं कासामदोषघ्नं द्वितीयं स्वल्पवीर्यदम् ॥ (११८।२)

कैवर्तिकाकैवर्तिका सुरङ्गा च लता वल्ली द्रुमारुहा । (११९।१)

रिङ्गिणी वस्त्ररङ्गा च भगा चेत्य् अष्टधाभिधा ॥ (११९।२)

कैवर्तिका लघुर् वृष्या कषाया कफनाशनी । (१२०।१)

कासश्वासहरा चैव सैव मन्दाग्निदोषनुत् ॥ (१२०।२)

तालीताली तमाली ताम्रा च ताम्रवल्ली तमालिका । (१२१।१)

सूक्ष्मवल्ली सुलोमा च शोधनी तालिका नव ॥ (१२१।२)

ताम्रवल्ली कषाया स्यात् कफदोषविनाशनी । (१२२।१)

मुखकण्ठोत्थदोषघ्नी श्लेष्मशुद्धिकरी परा ॥ (१२२।२)

कण्डीरकाण्डीरः काण्डकटुको नासासंवेदनः पटुः । (१२३।१)

उग्रकाण्डस् तोयवल्ली कारवल्ली सुकाण्डकः ॥ (१२३।२)

काण्डीरः कटुतिक्तोष्णः सरो दुष्टव्रणार्तिनुत् । (१२४।१)

लूतागुल्मोदरप्लीहशूलमन्दाग्निनाशनः ॥ (१२४।२)

जन्तुकाजन्तुका जन्तुकारी च जननी चक्रवर्तिनी । (१२५।१)

तिर्यक्फला निशान्धा च बहुपत्त्रा सुपत्त्रिका ॥ (१२५।२)

राजकृष्णा जनेष्टा च कपिकच्छुफलोपमा । (१२६।१)

रञ्जनी सूक्ष्मवल्ली च भ्रमरी कृष्णवल्लिका ॥ (१२६।२)

विज्जुल्लिका वृक्षरुहा ग्रन्थिपर्णी सुवल्लिका । (१२७।१)

तरुवल्ली दीर्घफला एकविंशतिसंज्ञका ॥ (१२७।२)

जन्तुका शिशिरा तिक्ता रक्तपित्तकफापहा । (१२८।१)

दाहतृष्णावमिघ्नी च रुचिकृद् दीपनी परा ॥ (१२८।२)

अत्यम्लपर्णीअत्यम्लपर्णी तीक्ष्णा च कण्डुला वल्लिसूरणा । (१२९।१)

वल्ली करवडादिश् च वनस्थारण्यवासिनी ॥ (१२९।२)

अत्यम्लपर्णी तीक्ष्णाम्ला प्लीहशूलविनाशनी । (१३०।१)

वातहृद् दीपनी रुच्या गुल्मश्लेष्मामयापहा ॥ (१३०।२)

शङ्खपुष्पी:: स्य्नोन्य्म्स्शङ्खपुष्पी सुपुष्पी च शङ्खाह्वा कम्बुमालिनी । (१३१।१)

सितपुष्पी कम्बुपुष्पी मेध्या वनविलासिनी ॥ (१३१।२)

चिरिण्टी शङ्खकुसुमा भूलग्ना शङ्खमालिनी । (१३२।१)

इत्य् एषा शङ्खपुष्पी स्याद् उक्ता द्वादशनामभिः ॥ (१३२।२)

शङ्खपुष्पी:: मेदिच्। प्रोपेर्तिएस्शङ्खपुष्पी हिमा तिक्ता मेधाकृत् स्वरकारिणी । (१३३।१)

ग्रहभूतादिदोषघ्नी वशीकरणसिद्धिदा ॥ (१३३।२)

वर्तकीवर्तकी तिन्दुकिनी विभाण्डी विषाणिका रङ्गलता मनोज्ञा । (१३४।१)

सा रक्तपुष्पी महादिजाली सा पीतकीलापि च चर्मरङ्गा ॥ (१३४।२)

वामावर्ता च संयुक्ता भूसंख्या शशिसंयुता । (१३५।१)

आवर्तकी कषायाम्ला शीतला पित्तहारिणी ॥ (१३५।२)

कर्णस्फोटाकर्णस्फोटा श्रुतिस्फोटा त्रिपुटा कृष्णतण्डुला । (१३६।१)

चित्रपर्णी स्फोटलता चन्द्रिका चार्धचन्द्रिका ॥ (१३६।२)

कर्णस्फोटा कटुस् तिक्ता हिमा सर्वविषापहा । (१३७।१)

ग्रहभूतादिदोषघ्नी सर्वव्याधिविनाशिनी ॥ (१३७।२)

कट्वीकट्वी कटुकवल्ली च सुकाष्ठा काष्ठवल्लिका । (१३८।१)

सुवल्ली च महावल्ली पशुमोहनिका कटुः ॥ (१३८।२)

कट्वी तु कटुका शीता कफश्वासार्तिनाशनी । (१३९।१)

नानाज्वरहरा रुच्या राजयक्ष्मनिवारिणी ॥ (१३९।२)

अमृतस्रवाज्ञेयामृतस्रवा वृत्तारुहाख्या तोयवल्लिका । (१४०।१)

घनवल्ली सितलता नामभिः शरसंमिता ॥ (१४०।२)

उक्तामृतस्रवा पथ्या ईषत् तिक्ता रसायनी । (१४१।१)

विषघ्नी व्रणकुष्ठादीन् कामलां श्वयथुं जयेत् ॥ (१४१।२)

पुत्रदात्रीपुत्रदात्री तु वातारिर् भ्रमरी श्वेतपुष्पिका । (१४२।१)

वृत्तपत्त्रातिगन्धालुर् वैशिजाता सुवल्लरी ॥ (१४२।२)

पुत्रदात्री तु वातघ्नी कटुर् उष्णा कफापहा । (१४३।१)

सुरभिः सर्वदा पथ्या वन्ध्यादोषविनाशनी ॥ (१४३।२)

पलाशीपलाशी पत्त्रवल्ली पर्णवल्ली पलाशिका । (१४४।१)

खुरपर्णी सुपर्णी च दीर्घवल्ली विषादनी ॥ (१४४।२)

अम्लपत्त्री दीर्घपत्त्री रसाम्ला चाम्लका च सा । (१४५।१)

अम्लातकी काञ्जिका च स्याच् चतुर्दशधाभिधा ॥ (१४५।२)

पलाशी लघुरम्या च मुखदोषविनाशनी । (१४६।१)

अरोचकहरा पथ्या पित्तकोपकरी च सा ॥ (१४६।२)

इति बहुविधवल्लीस्तोमनामाभिधानप्रगुणगुणयथावद्वर्णनापूर्णम् एनम् । (१४७।१)

सुललितपदसर्गं वर्गनाम्ना च वैद्यः सदसि बहुविलासं व्यासवद् व्यातनोतु ॥ (१४७।२)

दीप्ता दीधितयस् तथान्धतमसध्वंसाय भानोर् इव व्यातन्वन्ति निजं रुजां विजयते वीर्यं विरुद्धौ च याः । (१४८।१)

तासाम् एव विलासभूमिर् असमो वर्गः श्रुतो वीरुधां वीरुद्वर्ग इति प्रतीतमहिमा नैसर्गिकैर् यो गुणैः ॥ (१४८।२)

प्राप्ता यस्य परिग्रहं त्रिविधसद्वीरैकचूडामणेस् तीव्राण्य् ओषधयः स्रवन्ति सहसा वीर्याण्य् अजर्याद् इव । (१४९।१)

तस्यायं नृहरेः कृतौ स्थितिम् अगाद् वर्गो गुडूच्यादिकस् तार्तीयीकतयाभिधानरचनाचूडामणौ कीर्तितः ॥ (१४९।२)