नमः परमदेवाय त्रैगुण्याविजितात्मने । (१।१)

सर्वतो योगरूपाय संसाराभावहेतवे ॥ (१।२)

स्थितिसंरोधसर्गाणां हेतवे ऽन्तःप्रसारिणे । (२।१)

षड्विंशाय प्रधानाय महादेवाय धीमते ॥ (२।२)

प्रजापतेर्महाक्षेत्रे गङ्गाकालिन्दीसंगमे । (३।१)

प्रयागे परमे पुण्ये ब्रह्मणो लोकवर्त्मनि ॥ (३।२)

मुनयः संशितात्मानस्तपसा क्षीणकल्मषाः । (४।१)

तीर्थसंप्लवनार्थाय पौर्णमास्यां कृताह्निकाः ॥ (४।२)

पौराणिकमपश्यन्त सूतं सत्यपरायणम् । (५।१)

स्नात्वा तस्मिन्महातीर्थे प्रणामार्थमुपागतम् ॥ (५।२)

दृष्ट्वा ते सूतम् आयान्तम् ऋषयो हृष्टमानसाः । (६।१)

आशास्यासनसंवेशं तद्योग्यं समकल्पयन् ॥ (६।२)

स प्रणम्य च तान्सर्वान्सूतस्तान् मुनिपुंगवान् । (७।१)

प्रदत्तमासनं भेजे सर्वधर्मसमन्वितः ॥ (७।२)

तमासीनमपृच्छन्त मुनयस्तपसैधिताः । (८।१)

ब्रह्मसत्त्रे पुरा साधो नैमिषारण्यवासिनाम् ॥ (८।२)

कथितं भारताख्यानं पुराणं च परं त्वया । (९।१)

तेन नः प्रतिभासि त्वं साक्षात्सत्यवतीसुतः ॥ (९।२)

सर्वागमपरार्थज्ञः सत्यधर्मपरायणः । (१०।१)

द्विजपूजारतो नित्यं तेन पृच्छां त्वमर्हसि ॥ (१०।२)

भारताख्यानसदृशं पुराणाद्यद्विशिष्यते । (११।१)

तत्त्वा पृच्छाम वै जन्म कार्त्तिकेयस्य धीमतः ॥ (११।२)

इमे हि मुनयः सर्वे त्वदुपास्तिपरायणाः । (१२।१)

स्कन्दसम्भवशुश्रूषासंजातौत्सुक्यमानसाः ॥ (१२।२)

एवमुक्तस्तदा सूतः संसिद्धैर्मुनिपुंगवैः । (१३।१)

प्रोवाचेदं मुनीन्सर्वान्वचो भूतार्थवाचकम् ॥ (१३।२)

शृणुध्वं मुनयः सर्वे कार्त्तिकेयस्य सम्भवम् । (१४।१)

ब्रह्मण्यत्वं समाहात्म्यं वीर्यं च त्रिदशाधिकम् ॥ (१४।२)

मुमुक्षया परं स्थानं याते शुकमहात्मनि । (१५।१)

सुतशोकाभिसंतप्तो व्यासस्त्र्यम्बकमैक्षत ॥ (१५।२)

दृष्ट्वैव स महेशानं व्यासो ऽभूद्विगतव्यथः । (१६।१)

विचरन्स तदा लोकान्मुनिः सत्यवतीसुतः ॥ (१६।२)

मेरुशृङ्गे ऽथ ददृशे ब्रह्मणः सुतमग्रजम् । (१७।१)

सनत्कुमारं वरदं योगैश्वर्यसमन्वितम् ॥ (१७।२)

विमाने रविसंकाशे तिष्ठन्तमनलप्रभम् । (१८।१)

मुनिभिर्योगसंसिद्धैस्तपोयुक्तैर्महात्मभिः ॥ (१८।२)

वेदवेदाङ्गतत्त्वज्ञैः सर्वधर्मागमान्वितैः । (१९।१)

सकलावाप्तविद्यैस्तु चतुर्वक्त्रमिवावृतम् ॥ (१९।२)

दृष्ट्वा तं सुमहात्मानं व्यासो मुनिमथास्थितम् । (२०।१)

ववन्दे परया भक्त्या साक्षादिव पितामहम् ॥ (२०।२)

ब्रह्मसूनुरथ व्यासं समायातं महौजसम् । (२१।१)

परिष्वज्य परं प्रेम्णा प्रोवाच वचनं शुभम् ॥ (२१।२)

दिष्ट्या त्वमसि धर्मज्ञ प्रसादात्पारमेश्वरात् । (२२।१)

अपेतशोकः सम्प्राप्तः पृच्छस्व प्रवदाम्यहम् ॥ (२२।२)

श्रुत्वाथ वचनं सूनोर्ब्रह्मणो मुनिपुंगवः । (२३।१)

इदमाह वचो विप्राश्चिरं यद्धृदये स्थितम् ॥ (२३।२)

कुमारस्य कथं जन्म कार्त्तिकेयस्य धीमतः । (२४।१)

किंनिमित्तं कुतो वास्य इच्छाम्येतद्धि वेदितुम् ॥ (२४।२)

कथं रुद्रसुतश्चासौ वह्निगङ्गासुतः कथम् । (२५।१)

उमायास्तनयश्चैव स्वाहायाश्च कथं पुनः । (२५।२)

सुपर्ण्याश्चाथ मातॄणां कृत्तिकानां कथं च सः ॥ (२५।३)

कश्चासौ पूर्वमुत्पन्नः किंतपाः कश्च विक्रमः । (२६।१)

भूतसम्मोहनं ह्य् एतत् कथयस्व यथातथम् ॥ (२६।२)

सूत उवाच । (२७।१)

एवं स पृष्टस्तेजस्वी ब्रह्मणः पुत्रसत्तमः । (२७।२)

उवाच सर्वं सर्वज्ञो व्यासायाक्लिष्टकारिणे । (२७।३)

तच्छृणुध्वं यथातत्त्वं कीर्त्यमानं मयानघाः ॥ (२७।४)