वेदो धर्ममूलम् ॥ (१।०)

तद्विदां च स्मृतिशीले ॥ (२।०)

दृष्टो धर्मव्यतिक्रमः साहसं च महताम् ॥ (३।०)

अवरदौर्बल्यात् ॥ (४।०)

तुल्यबलविरोधे विकल्पः ॥ (५।०)

उपनयनं ब्राह्मणस्याष्टमे ॥ (६।०)

नवमे पञ्चमे वा काम्यम् ॥ (७।०)

गर्भादिः सङ्ख्या वर्षाणाम् ॥ (८।०)

तद्द्वितीयं जन्म ॥ (९।०)

तद् यस्मात् स आचार्यः ॥ (१०।०)

वेदानुवचनाच् च ॥ (११।०)

एकादशद्वादशयोः क्षत्रियवैश्ययोः ॥ (१२।०)

आ षोडशाद् ब्राह्मणस्यापतिता सावित्री ॥ (१३।०)

द्वाविंशते राजन्यस्य ॥ (१४।०)

द्व्यधिकाया वैश्यस्य ॥ (१५।०)

मौञ्जीज्यामौर्वीसौत्र्यो मेखलाः क्रमेण ॥ (१६।०)

कृष्णरुरुबस्ताजिनानि ॥ (१७।०)

वासांसि शाणक्षौमचीरकुतपाः सर्वेषाम् ॥ (१८।०)

कार्पासं चाविकृतम् ॥ (१९।०)

काषायम् अप्येके ॥ (२०।०)

वार्क्षं ब्राह्मणस्य ॥ (२१।०)

माञ्जिष्ठहारिद्र इतरयोः ॥ (२२।०)

बैल्वपालाशौ ब्राह्मणदण्डौ ॥ (२३।०)

आश्वत्थपैलवौ शेषे ॥ (२४।०)

यज्ञियो वा सर्वेषाम् ॥ (२५।०)

अपीडिता यूपवक्राः सशल्काः ॥ (२६।०)

मूर्धललाटनासाग्रप्रमाणाः ॥ (२७।०)

मुण्डजटिलशिखाजटाश् च ॥ (२८।०)

द्रव्यहस्त उच्छिष्टो ऽनिधायाचामेत् ॥ (२९।०)

द्रव्यशुद्धिः परिमार्जनप्रदाहतक्षणनिर्णेजनानि तैजसमार्क्तिकदारवतान्तवानाम् ॥ (३०।०)

तैजसवद् उपलमणिशङ्खमुक्तानाम् ॥ (३१।०)

दारुवद् अस्थिभूम्योः ॥ (३२।०)

आवपनं च भूमेः ॥ (३३।०)

चेलवद् रज्जुविदलचर्मणाम् ॥ (३४।०)

उत्सर्गो वात्यन्तोपहतानाम् ॥ (३५।०)

प्राङ्मुख उदङ्मुखो वा शौचम् आरभेत ॥ (३६।०)

शुचौ देशे आसीनो दक्षिणं बाहुं जान्वन्तराकृत्वा यज्ञोपवीत्य् आ मणिबन्धनात् पाणी प्रक्षाल्य वाग्यतो हृदयस्पृशस् त्रिश् चतुर् वाप आचामेत् ॥ (३७।०)

द्विः परिमृज्यते ॥ (३८।०)

पादौ चाभ्युक्षेत् ॥ (३९।०)

खानि चोपस्पृशेच्छीर्षण्यानि ॥ (४०।०)

मूर्धनि च दद्यात् ॥ (४१।०)

सुप्त्वा भुक्त्वा क्षुत्वा च पुनः ॥ (४२।०)

दन्तश्लिष्टेषु दन्तवद् अन्यत्र जिह्वाभिमर्शनात् ॥ (४३।०)

प्राक्च्युतेर् इति एके ॥ (४४।०)

च्युतेष्वास्राववद् विद्यान् निगिरन्न् एव तच्छुचिः ॥ (४५।०)

न मुख्या विप्रुष उच्छिष्टं कुर्वन्ति न चेद् अङ्गे निपतन्ति ॥ (४६।०)

लेपगन्धापकर्षणे शौचम् अमेध्यस्य ॥ (४७।०)

तद् अद्भिः पूर्वं मृदा च ॥ (४८।०)

मूत्रपुरीषस्नेहविस्रंसनाभ्यवहारसंयोगेषु च ॥ (४९।०)

यत्र चाम्नायो विदध्यात् ॥ (५०।०)

पाणिना सव्यम् उपसंगृह्य अनङ्गुष्ठम् अधीहि भो इत्यामन्त्रयेद् गुरुं तत्रचक्षुर्मनःप्राणोपस्पर्शनं दर्भैः ॥ (५१।०)

प्राणायामास् त्रयः पञ्चदशमात्राः ॥ (५२।०)

प्राक्कूलेषु आसनं च ॥ (५३।०)

ॐ पूर्वा व्याहृतयः पञ्च सत्यान्ताः ॥ (५४।०)

गुरोः पादोपसंग्रहणं प्रातः ॥ (५५।०)

ब्रह्मानुवचने चाद्यन्तयोः ॥ (५६।०)

अनुज्ञात उपविशेत् प्राङ्मुखो दक्षिणतः शिष्य उदङ्मुखो वा ॥ (५७।०)

सावित्री चानुवचनम् ॥ (५८।०)

आदितो ब्रह्मण आदाने ॥ (५९।०)

ॐकारो ऽन्यत्रापि ॥ (६०।०)

अन्तरगमने पुनर् उपसदनम् ॥ (६१।०)

श्वनकुलसर्पमण्डूकमार्जाराणां त्र्यहम् उपवासोविप्रवासश् च ॥ (६२।०)

प्राणायामा घृतप्राशनं चेतरेषाम् ॥ (६३।०)

श्मशानाभ्यध्ययने चैवम् ॥ (६४।०)