अस्वतन्त्रा धर्मे स्त्री ॥ (१।१)

नातिचरेद् भर्तारम् ॥ (२।१)

वाच्चक्षुःकर्मसंयता ॥ (३।१)

अपतिर् अपत्यलिप्सुर् देवरात् ॥ (४।१)

गुरुप्रसूता नर्तुम् अतीयात् ॥ (५।१)

पिण्डगोत्रर्षिसंबन्धेभ्यो योनिमात्राद् वा ॥ (६।१)

नादेवराद् इत्येके ॥ (७।१)

नातिद्वितीयम् ॥ (८।१)

जनयितुर् अपत्यम् ॥ (९।१)

समयाद् अन्यस्य ॥ (१०।१)

जीवतश् च क्षेत्रे ॥ (११।१)

परस्मात् तस्य ॥ (१२।१)

द्वयोर् वा ॥ (१३।१)

रक्षणात् तु भर्तुर् एव ॥ (१४।१)

श्रूयमाणे ऽभिगमनम् ॥ (१५।१)

प्रव्रजिते तु निवृत्तिः प्रसङ्गात् ॥ (१६।१)

द्वादश वर्षाणि ब्राह्मणस्य विद्यासंबन्धे ॥ (१७।१)

भ्रातरि चैवम् ज्यायसि यवीयान् कन्याग्न्युपयमेषु ॥ (१८।१)

षड् इत्येके ॥ (१९।१)

त्रीन् कुमार्यृतून् अतीत्य स्वयं युज्येतानिन्दितेनोत्सृज्य पित्र्यान् अलंकारान् ॥ (२०।१)

प्रदानं प्राग् ऋतोः ॥ (२१।१)

अप्रयच्छन् दोषी ॥ (२२।१)

प्राग् वाससः प्रतिपत्तेर् इत्येके ॥ (२३।१)

द्रव्यादानं विवाहसिद्ध्यर्थं धर्मतन्त्रसंयोगे च शूद्रात् ॥ (२४।१)

अन्यत्रापि शूद्राद् बहुपशोर् हीनकर्मणः ॥ (२५।१)

शतगोर् अनाहिताग्नेः ॥ (२६।१)

सहस्रगोश् चासोमपात् ॥ (२७।१)

सप्तमीं चाभुक्त्वानिचयाय ॥ (२८।१)

अप्यहीनकर्मभ्यः ॥ (२९।१)

आचक्षीत राज्ञा पृष्टः ॥ (३०।१)

तेन हि भर्तव्यः श्रुतशीलसम्पन्नश् चेत् ॥ (३१।१)

धर्मतन्त्रपीडायाम् तस्याकरणे दोषो दोषः ॥ (३२।१)