ब्रह्महसुरापगुरुतल्पगमातृपितृयोनिसंबन्धागस्तेननास्तिकनिन्दितकर्माभ्यासिपतितात्याग्यपतितत्यागिनः पतिताः ॥ (१।१)

पातकसंयोजकाश् च ॥ (२।१)

तैश् चाब्दं समाचरन् ॥ (३।१)

द्विजातिकर्मभ्यो हानिः पतनम् ॥ (४।१)

तथा परत्र चासिद्धिः ॥ (५।१)

तम् एके नरकम् ॥ (६।१)

त्रीणि प्रथमान्य् अनिर्देश्यान्य् अनु ॥ (७।१)

न स्त्रीष्वगुरुतल्पं पततीत्येके ॥ (८।१)

भ्रूणहनि हीनवर्णसेवायां च स्त्री पतति ॥ (९।१)

कौटसाक्ष्यं राजगामि पैशुनम् गुरोर् अनृताभिशंसनं महापातकसमानि ॥ (१०।१)

अपङ्क्त्यानां प्राग् दुर्वालाद् गोहन्तृब्रह्मघ्नतन्मात्रकृदवकीर्णिपतितसावित्रीकेषूपपातकम् ॥ (११।१)

अज्ञानाद् अनध्यापनाद् ऋत्विगाचार्यौ पतनीयसेवायां च हेयौ ॥ (१२।१)

अन्यत्र हानात् पतति ॥ (१३।१)

तस्य च प्रतिग्रहीतेत्येके ॥ (१४।१)

न कर्हिचिन् मातापित्रोर् अवृत्तिः ॥ (१५।१)

दायं तु न भजेरन् ॥ (१६।१)

ब्राह्मणाभिशंसने दोषस् तावान् ॥ (१७।१)

द्विर् अनेनसि ॥ (१८।१)

दुर्बलहिंसायां च विमोचने शक्तश् चेत् ॥ (१९।१)

अभिक्रुद्धावगोरणं ब्राह्मणस्य वर्षशतमस्वर्ग्यम् ॥ (२०।१)

निघाते सहस्रम् ॥ (२१।१)

लोहितदर्शने यावतस् तत्प्रस्कन्द्य पांसून्संगृह्णीयात् ॥ (२२।१)