अथातः कृच्छ्रान् व्याख्यास्यामः ॥ (१।१)

हविष्यान् प्रातराशान् भुक्त्वा तिस्रो रात्रीर् नाश्नीयात् ॥ (२।१)

अथापरं त्र्यहं नक्तं भुञ्जीत ॥ (३।१)

अथापरं त्र्यहं न कंचन याचेत ॥ (४।१)

अथापरं त्र्यहम् उपवसेत् ॥ (५।१)

तिष्ठेद् अहनि रात्रावासीत क्षिप्रकामः ॥ (६।१)

सत्यं वदेत् ॥ (७।१)

अनार्यैर् न सम्भाषेत ॥ (८।१)

रौरवयौधाजपे नित्यं प्रयुञ्जीत ॥ (९।१)

अनुसवनम् उदकोपस्पर्शनम् आपो हि ष्ठेति तिसृभिः पवित्रवतीभिर् मार्जयीत हिरण्यवर्णाः शुचयः पावका इत्यष्टाभिः ॥ (१०।१)

अथोदकतर्पणम् ॥ (११।१)

नमो ऽहमाय मोहमाय मंहमाय धन्वते तापसाय पुनर्वसवे नमः ॥ (१२।१)

नमो मौञ्ज्यायोर्व्याय वसुविन्दाय सार्वविन्दाय नमः ॥ (१३।१)

नमः पाराय सुपाराय महापाराय वारयिष्णवे नमः ॥ (१४।१)

नमो रुद्राय पशुपतये महते देवाय त्र्यम्बकायैकचरायाधिपतये हराय शर्वायेशानायोग्राय वज्रिणे घृणिने कपर्दिने नमः ॥ (१५।१)

नमः सूर्यायादित्याय नमः ॥ (१६।१)

नमो नीलग्रीवाय शितिकण्ठाय नमः ॥ (१७।१)

नमः कृष्णाय पिङ्गलाय नमः ॥ (१८।१)

नमो ज्येष्ठाय वृद्धायेन्द्राय हरिकेशायोर्ध्वरेतसे नमः ॥ (१९।१)

नमः सत्याय पावकाय पावकवर्णाय कामाय कामरूपिणे नमः ॥ (२०।१)

नमो दीप्ताय दीप्तरूपिणे नमः ॥ (२१।१)

नमस्तीक्ष्णाय तीक्ष्णरूपिणे नमः ॥ (२२।१)

नमः सोभ्याय सुपुरुषाय महापुरुषाय मध्यमपुरुषायोत्तमपुरुषाय ब्रह्मचारिणे नमः ॥ (२३।१)

नमश्चन्द्रललाटाय कृत्तिवाससे नमः ॥ (२४।१)

एतद् एवादित्योपस्थानम् ॥ (२५।१)

एता एवाज्याहुतयः ॥ (२६।१)

द्वादशरात्रस्यान्ते चरुं श्रपयित्वा एताभ्यो देवताभ्यो जुहुयात् ॥ (२७।१)

अग्नये स्वाहा सोमाय स्वाहाग्निषोमाभ्याम् इन्द्राग्निभ्याम् इन्द्राय विश्वेभ्यो देवेभ्यो ब्रह्मणे प्रजापतये ऽग्नये स्विष्टकृत इति ॥ (२८।१)

ततो ब्राह्मणतर्पणम् ॥ (२९।१)

एतेनैवातिकृच्छ्रो व्याख्यातः ॥ (३०।१)

यावत् सकृद् आददीत तावद् अश्नीयात् ॥ (३१।१)

अब्भक्षस् तृतीयः स कृच्छ्रातिकृच्छ्रः ॥ (३२।१)

प्रथमं चरित्वा शुचिः पूतः कर्मण्यो भवति ॥ (३३।१)

द्वितीयं चरित्वा यत्किंचिद् अन्यन् महापातकेभ्यः पापं कुरुते तस्मात् प्रमुच्यते ॥ (३४।१)

तृतीयं चरित्वा सर्वस्माद् एनसो मुच्यते ॥ (३५।१)

अथैतांस् त्रीन् कृच्छ्रांश् चरित्वा सर्वेषु वेदेषु स्नातो भवति सर्वैर् देवैर् ज्ञातो भवति ॥ (३६।१)

यश् चैवं वेद ॥ (३७।१)