शावम् आशौचं दशरात्रम् अनृत्विग्दीक्षितब्रह्मचारिणां सपिण्डानाम् ॥ (१।१)

एकादशरात्रं क्षत्रियस्य ॥ (२।१)

द्वादशरात्रं वैश्यस्य ॥ (३।१)

अर्धमासम् एके ॥ (४।१)

मासम् शूद्रस्य ॥ (५।१)

तच् चेद् अन्तः पुनर् आपतेच्छेषेण शुध्येरन् ॥ (६।१)

रात्रिशेषे द्वाभ्याम् ॥ (७।१)

प्रभाते तिसृभिः ॥ (८।१)

गोब्राह्मणहतानाम् अन्वक्षम् ॥ (९।१)

राजक्रोधाच् च ॥ (१०।१)

युद्धे ॥ (११।१)

प्रायानाशकशस्त्राग्निविषोदकोद्बन्धनप्रपतनैश् चेच्छताम् ॥ (१२।१)

पिण्डनिवृत्तिः सप्तमे पञ्चमे वा ॥ (१३।१)

जनने ऽप्येवम् ॥ (१४।१)

मातापित्रोस् तत् मातुर् वा ॥ (१५।१)

गर्भमाससमारात्रीः स्रंसने गर्भस्य ॥ (१६।१)

त्र्यहं वा ॥ (१७।१)

श्रुत्वा चोर्ध्वं दशम्याः पक्षिणीम् ॥ (१८।१)

असपिण्डे योनिसंबन्धे सहाध्यायिनि च ॥ (१९।१)

सब्रह्मचारिण्य् एकाहम् ॥ (२०।१)

श्रोत्रिये चोपसंपन्ने ॥ (२१।१)

प्रेतोपस्पर्शने दशरात्रम् आशौचम् अभिसंधाय चेत् ॥ (२२।१)

उक्तं वैश्यशूद्रयोः ॥ (२३।१)

आर्तवीर् वा ॥ (२४।१)

पूर्वयोश् च ॥ (२५।१)

त्र्यहं वा ॥ (२६।१)

आचार्यतत्पुत्रस्त्रीयाज्यशिष्येषु चैवम् ॥ (२७।१)

अवरश् चेद् वर्णः पूर्ववर्णम् उपस्पृशेत् पूर्वो वावरं तत्र शवोक्तम् आशौचम् ॥ (२८।१)

पतितचण्डालसूतिकोदक्याशवस्पृष्टितत्स्पृष्ट्युपस्पर्शने सचैलोदकोपस्पर्शनाच्छुध्येत् ॥ (२९।१)

शवानुगमने च ॥ (३०।१)

शुनश् च ॥ (३१।१)

यद् उपहन्याद् इत्य् एके ॥ (३२।१)

उदकदानं सपिण्डैः कृतचूडस्य ॥ (३३।१)

तत्स्त्रीणां च ॥ (३४।१)

एके प्रत्तानाम् ॥ (३५।१)

अधःशय्यासनिनो ब्रह्मचारिणः सर्वे ॥ (३६।१)

न मार्जयीरन् ॥ (३७।१)

न मांसं भक्षयेयुर् आ प्रदानात् ॥ (३८।१)

प्रथमतृतीयसप्तमनवमेषूदकक्रिया ॥ (३९।१)

वाससां च त्यागः ॥ (४०।१)

अन्ते त्वन्त्यानाम् ॥ (४१।१)

दन्तजन्मादि मातापितृभ्याम् ॥ (४२।१)

बालदेशान्तरितप्रव्रजितासपिण्डानां सद्यः शौचम् ॥ (४३।१)

राज्ञां च कार्यविरोधात् ॥ (४४।१)

ब्राह्मणस्य च स्वाध्यायनिवृत्त्यर्थं स्वाध्यायनिवृत्त्यर्थम् ॥ (४५।१)