ऋताव् उपेयात् ॥ (१।१)

सर्वत्र वा प्रतिषिद्धवर्जम् ॥ (२।१)

देवपितृमनुष्यभूतर्षिपूजकः ॥ (३।१)

नित्यस्वाध्यायः ॥ (४।१)

पितृभ्यश् चोदकदानं यथोत्साहम् अन्यत् ॥ (५।१)

भार्यादिर् अग्निर् दायादिर् वा ॥ (६।१)

तस्मिन् गृह्याणि कर्माणि ॥ (७।१)

देवपितृमनुष्ययज्ञाः स्वाध्यायश् च बलिकर्म ॥ (८।१)

अग्नावग्निर् धन्वन्तरिर् विश्वे देवाः प्रजापतिः स्विष्टकृद् इति होमः ॥ (९।१)

दिग्देवताभ्यश् च यथास्वम् ॥ (१०।१)

द्वार्षु महद्भ्यः ॥ (११।१)

गृहदेवताभ्यः प्रविश्य ॥ (१२।१)

ब्रह्मणे मध्ये ॥ (१३।१)

आकाशायेत्यन्तरिक्षे बलिर् उत्क्षेप्यः ॥ (१४।१)

नक्तंचरेभ्यश् च सायम् ॥ (१५।१)

स्वस्तिवाच्य भिक्षादानम् अप्पूर्वम् ॥ (१६।१)

ददातिषु चैवं धर्म्येषु ॥ (१७।१)

समद्विगुणसाहस्रानन्त्यानि फलान्यब्राह्मणब्राह्मणश्रोत्रियवेदपारगेभ्यः ॥ (१८।१)

भिक्षमाणेषु कृतान्नम् इतरेषु ॥ (१९।१)

प्रतिश्रुत्याप्यधर्मसंयुक्ताय न दद्यात् ॥ (२०।१)

क्रुद्धहृष्टभीतार्तलुब्धबालस्थविरमूढमत्तोन्मत्तवाक्यान्य् अनृतान्य् अपातकानि ॥ (२१।१)

भोजयेत् पूर्वमतिथिकुमारव्याधितगर्भिणीस्ववासिनीस्थविराञ् जघन्यांश् ॥ (२२।१)

आचार्यपितृसखीनां च निवेद्य पचनक्रिया ॥ (२३।१)

ऋत्विगाचार्यश्वशुरपितृव्यमातुलानाम् उपस्थाने मधुपर्कः ॥ (२४।१)

संवत्सरे पुनः ॥ (२५।१)

यज्ञविवाहयोर् अर्वाक् ॥ (२६।१)

राज्ञश् च श्रोत्रियस्य ॥ (२७।१)

अश्रोत्रियस्यासनोदके ॥ (२८।१)

श्रोत्रियस्य तु पाद्यम् अर्घ्यम् अन्नविशेषांश् च प्रकारयेत् ॥ (२९।१)

नित्यं वा संस्कारविशिष्टम् ॥ (३०।१)

मध्यतो ऽन्नदानम् अवैद्ये साधुवृत्ते ॥ (३१।१)

विपरीतेषु तृणोदकभूमिस्वागतम् अन्ततः पूजानत्याशश् च ॥ (३२।१)

शय्यासनावसथानुव्रज्योपासनानि सदृक्श्रेयसोः समानानि ॥ (३३।१)

अल्पशो ऽपि हीने ॥ (३४।१)

असमानग्रामो ऽतिथिरैकरात्रिको ऽधिवृक्षसूर्योपस्थायी ॥ (३५।१)

कुशलानामयारोग्याणाम् अनुप्रश्नः ॥ (३६।१)

अन्त्यं शूद्रस्य ॥ (३७।१)

ब्राह्मणस्यानतिथिर् अब्राह्मणः ॥ (३८।१)

यज्ञे संवृतश् चेत् ॥ (३९।१)

भोजनं तु क्षत्रियस्योर्ध्वं ब्राह्मणेभ्यः ॥ (४०।१)

अन्यान् भृत्यैः सहानृशंस्यार्थम् आनृशंस्यार्थम् ॥ (४१।१)