शूद्रो द्विजातीन् अभिसंधायाभिहत्य चवाग्दण्डपारुष्याभ्याम् अङ्गमोच्यो येनोपहन्यात् ॥ (१।१)

आर्यस्त्र्यभिगमने लिङ्गोद्धारः स्वहरणं च ॥ (२।१)

गोप्ता चेद् वधो ऽधिकः ॥ (३।१)

अथ हास्य वेदम् उपशृण्वतस् त्रपुजतुभ्यां श्रोत्रप्रतिपूरणम् उदाहरणे जिह्वाछेदो धारणे शरीरभेदः ॥ (४।१)

आसनशयनवाक्पथिषु समप्रेप्सुर् दण्ड्यः ॥ (५।१)

शतं क्षत्रियो ब्राह्मणाक्रोशे ॥ (६।१)

दण्डपारुष्ये द्विगुणम् ॥ (७।१)

अध्यर्धं वैश्यः ॥ (८।१)

ब्राह्मणस् तु क्षत्रिये पञ्चाशत् ॥ (९।१)

तदर्धं वैश्ये ॥ (१०।१)

न शूद्रे किंचित् ॥ (११।१)

ब्राह्मणराजन्यवत् क्षत्रियवैश्यौ ॥ (१२।१)

अष्टापाद्यं स्तेयकिल्बिषं शूद्रस्य ॥ (१३।१)

द्विगुणोत्तराणीतरेषां प्रतिवर्णम् ॥ (१४।१)

विदुषो ऽतिक्रमे दण्डभूयस्त्वम् ॥ (१५।१)

फलहरितधान्यशाकादाने पञ्चकृष्णलम् अल्पम् ॥ (१६।१)

पशुपीडिते स्वामिदोषः ॥ (१७।१)

पालसंयुक्ते तु तस्मिन् ॥ (१८।१)

पथि क्षेत्रे ऽनावृते पालक्षेत्रिकयोः ॥ (१९।१)

पञ्च माषा गवि ॥ (२०।१)

षड् उष्ट्रखरे ॥ (२१।१)

अश्वमहिष्योर् दश ॥ (२२।१)

अजाविषु द्वौ द्वौ ॥ (२३।१)

सर्वविनाशे शदः ॥ (२४।१)

शिष्टाकरणे प्रतिषिद्धसेवायां च नित्यं चैलपिण्डाद् ऊर्ध्वं स्वहरणम् ॥ (२५।१)

गोऽग्न्यर्थे तृणमेधान् वीरुद्वनस्पतीनां च पुष्पाणि स्ववद् आददीत फलानि चापरिवृतानाम् ॥ (२६।१)

कुसीदवृद्धिर् धर्म्या विंशतिः पञ्चमाषिकी मासम् ॥ (२७।१)

नातिसांवत्सरीम् एके ॥ (२८।१)

चिरस्थाने द्वैगुण्यं प्रयोगस्य ॥ (२९।१)

भुक्ताधिर् न वर्धते ॥ (३०।१)

दित्सतो ऽवरुद्धस्य च ॥ (३१।१)

चक्रकालवृद्धिः ॥ (३२।१)

कारिताकायिकाशिखाधिभोगाश् च ॥ (३३।१)

कुसीदं पशूपजलोमक्षेत्रशदवाह्येषु नातिपञ्चगुणम् ॥ (३४।१)

अजडापौगण्डधनं दशवर्षभुक्तं परैः संनिधौ भोक्तुः ॥ (३५।१)

न श्रोत्रियप्रव्रजितराजपुर्षैः ॥ (३६।१)

पशुभूमिस्त्रीणाम् अनतिभोगः ॥ (३७।१)

रिक्थभाज ऋणं प्रतिकुर्युः ॥ (३८।१)

प्रातिभाव्यवणिक्शुल्कमद्यद्यूतदण्डाः पुत्रान्नाभ्याभवेयुः ॥ (३९।१)

निध्यन्वाधियाचितावक्रीताधयो नष्टाः सर्वाननिन्दितान् पुरुषापराधेन ॥ (४०।१)

स्तेनः प्रकीर्णकेशो मुसली राजानम् इयात् कर्माचक्षानः ॥ (४१।१)

पूतो वधमोक्षाभ्याम् ॥ (४२।१)

अघ्नन्न् एनस्वी राजा ॥ (४३।१)

न शारीरो ब्राह्मणदण्डः ॥ (४४।१)

अप्रवृत्तौ प्रायश्चित्ती सः ॥ (४५।१)

चोरसमः सचिवो मतिपूर्वे ॥ (४६।१)

प्रतिग्रहीताप्यधर्मसंयुक्ते ॥ (४७।१)

पुरुषशक्त्यपराधानुबन्धविज्ञानाद् दण्डनियोगः ॥ (४८।१)

अनुज्ञानं वा वेदवित्समवायवचनाद् वेदवित्समवायवचनात् ॥ (४९।१)