अथातश् चान्द्रायणम् ॥ (१।१)

तस्योक्तो विधिः कृच्छ्रे ॥ (२।१)

वपनं व्रतं चरेत् ॥ (३।१)

श्वोभूतां पौर्णमासीम् उपवसेत् ॥ (४।१)

आप्यायस्व सं ते पयांसि नवोनव इति चैताभिस् तर्पणम् आज्यहोमो हविषश् चानुमन्त्रणमुपस्थानं चन्द्रमसः ॥ (५।१)

यद् देवा देवहेडनम् इति चतसृभिर्जुहुयात् ॥ (६।१)

देवकृतस्येति चान्ते समिद्भिः ॥ (७।१)

ॐ भूर् भुवः स्वस् तपः सत्यं यशः श्रीर् ऊर्गिडौजस् तेजो वर्चः पुरुषो धर्मः शिव इत्येतैर् ग्रासानुमन्त्रणं प्रतिमन्त्रं मनसा ॥ (८।१)

नमः स्वाहेति वा सर्वान् ॥ (९।१)

ग्रासप्रमाणम् आस्याविकारेण ॥ (१०।१)

चरुभैक्षसक्तुकणयावकशाकपयोदधिघृतमूलफलोदकानि हवींष्युत्तरोत्तरं प्रशस्तानि ॥ (११।१)

पौर्णमास्यां पञ्चदश ग्रासान् भुक्त्वैकापचयेनापरपक्षम् अश्नीयात् ॥ (१२।१)

अमावास्यायाम् उपोष्यैकोपचयेन पूर्वपक्षम् ॥ (१३।१)

विपरीतम् एकेषाम् ॥ (१४।१)

एवं चान्द्रायणो मासः ॥ (१५।१)

एवम् आप्त्वा विपापो विपाप्मा सर्वम् एनो हन्ति ॥ (१६।१)

द्वितीयम् आप्त्वा दश पूर्वान् दश परान् आत्मानं चैकविंशं पङ्क्तिं च पुनाति ॥ (१७।१)

संवत्सरं चाप्त्वा चन्द्रमसः सलोकताम् आप्नोति सलोकताम् आप्नोति ॥ (१८।१)