स विधिपूर्वकं स्नात्वा भार्याम् अधिगम्ययथोक्तान् गृहस्थधर्मान् प्रयुञ्जान इमानि व्रतान्य् अनुकर्षेत् ॥ (१।१)

स्नातकः ॥ (२।१)

नित्यं शुचिः सुगन्धिः स्नानशीलः ॥ (३।१)

सति विभवे न जीर्णमलवद्वासाः स्यात् ॥ (४।१)

न रक्तम् उल्बणम् अन्यधृतं वासो बिभृयात् ॥ (५।१)

न स्रगुपानहौ ॥ (६।१)

निर्णिक्तम् अशक्तौ ॥ (७।१)

न रूढश्मश्रुर् अकस्मात् ॥ (८।१)

नाग्निम् अपश् च युगपद् धारयेत् ॥ (९।१)

नाञ्जलिना पिबेत् ॥ (१०।१)

न तिष्ठन्न् उद्धृतोदकेनाचमेत् ॥ (११।१)

न शूद्राशुच्येकपाण्यावर्जितेन ॥ (१२।१)

न वाय्वग्निविप्रादित्यापो देवता गाश् च प्रतिपश्यन् वा मूत्रपुरीषामेध्यान् व्युदस्येत् ॥ (१३।१)

नैता देवताः प्रति पादौ प्रसारयेत् ॥ (१४।१)

न पर्णलोष्टाश्मभिर् मूत्रपुरीषापकर्षणं कुर्यात् ॥ (१५।१)

न भस्मकेशनखतुषकपालमेध्यान्य् अधितिष्ठेत् ॥ (१६।१)

न म्लेच्छाशुच्यधार्मिकैः सह सम्भाषेत ॥ (१७।१)

सम्भाष्य पुण्यकृतो मनसा ध्यायेत् ॥ (१८।१)

ब्राह्मणेन वा सह सम्भाषेत ॥ (१९।१)

अधेनुं धेनुभव्येति ब्रूयात् ॥ (२०।१)

अभद्रं भद्रम् इति ॥ (२१।१)

कपालं भगालम् इति ॥ (२२।१)

मणिधनुर् इतीन्द्रधनुः ॥ (२३।१)

गां धयन्तीं परस्मै नाचक्षीत ॥ (२४।१)

न चैनाम् वारयेत् ॥ (२५।१)

न मिथुनीभूत्वा शौचं प्रति विलम्बेत ॥ (२६।१)

न च तस्मिन् शयने स्वाध्यायम् अधीयीत ॥ (२७।१)

न चापररात्रम् अधीत्य पुनः प्रतिसंविशेत् ॥ (२८।१)

नाकल्पां नारीम् अभिरमयेत् ॥ (२९।१)

न रजस्वलाम् ॥ (३०।१)

न चैनां श्लिष्येन् न कन्याम् ॥ (३१।१)

अग्निमुखोपधमनविगृह्यवादबहिर्गन्धमाल्यधारणपापीयसावलेखनभार्यासहभोजनाञ्जन्त्यवेक्षणकुद्वारप्रवेशनपादपादधावनासन्दीस्थभोजननदीबाहुतरणवृक्षविषमारोहणावरोहणप्राणव्यायच्छनानि वर्जयेत् ॥ (३२।१)

न संदिग्धां नावम् अधिरोहेत् ॥ (३३।१)

सर्वत एवात्मानं गोपायेत् ॥ (३४।१)

न प्रावृत्य शिरो ऽहनि पर्यटेत् ॥ (३५।१)

प्रावृत्य रात्रौ ॥ (३६।१)

मूत्रोच्चारे च ॥ (३७।१)

न भूमाव् अनन्तर्धाय ॥ (३८।१)

नाराच् चावसथात् ॥ (३९।१)

न भस्मकरीषकृष्टच्छायापथिकाम्येषु ॥ (४०।१)

उभे मूत्रपुरीषे तु दिवा कुर्याद् उदङ्मुखः ॥ (४१।१)

संध्ययोश् च ॥ (४२।१)

रात्रौ दक्षिणामुखः ॥ (४३।१)

पालाशम् आसनं पादुके दन्तधावनम् इति च वर्जयेत् ॥ (४४।१)

सोपानत्करश्चासनाभिवादननमस्कारान् वर्जयेत् ॥ (४५।१)

न पूर्वाह्णमध्यंदिनापराह्णान् अफलान् कुर्याद्यथाशक्ति धर्मार्थकामेभ्यः ॥ (४६।१)

तेषु तु धर्मोत्तरः स्यात् ॥ (४७।१)

न नग्नां परयोषितम् ईक्षेत ॥ (४८।१)

न पदासनम् आकर्षेत् ॥ (४९।१)

न शिश्नोदरपाणिपादवाक्चक्षुश्चापलानि कुर्यात् ॥ (५०।१)

छेदनभेदनविलेखनविमर्दनावस्फोटनानि नाकस्मात् कुर्यात् ॥ (५१।१)

नोपरि वत्सतन्तीं गच्छेत् ॥ (५२।१)

न कुलंकुलः स्यात् ॥ (५३।१)

न यज्ञम् अवृतो गच्छेत् ॥ (५४।१)

दर्शनाय तु कामम् ॥ (५५।१)

न भक्षान् उत्सङ्गे भक्षयेत् ॥ (५६।१)

न रात्रौ प्रेष्याहृतम् ॥ (५७।१)

उद्धृतस्नेहविलपनपिण्याकमथितप्रभृतीनि चात्तवीर्याणि नाश्नीयात् ॥ (५८।१)

सायं प्रातस् त्वन्नम् अभिपूजितम् अनिन्दन् भुञ्जीत ॥ (५९।१)

न कदाचिद् रात्रौ नग्नः स्वपेत् ॥ (६०।१)

स्नायाद् वा ॥ (६१।१)

यच् चात्मवन्तो वृद्धाः सम्यग्विनीतादम्भलोभमोहवियुक्ता वेदविद आचक्षते तत् समाचरेत् ॥ (६२।१)

योगक्षेमार्थम् ईश्वरम् अधिगच्छेत् ॥ (६३।१)

नान्यम् अन्यत्र देवगुरुधार्मिकेभ्यः ॥ (६४।१)

प्रभूतैधोदकयवसकुशमाल्योपनिष्क्रमणम् आर्यजनभूयिष्ठम् अनलससमृद्धं धार्मिकाधिष्ठितं निकेतनम् आवसितुं यतेत ॥ (६५।१)

प्रशस्तमङ्गल्यदेवतायतनचतुष्पदम् प्रदक्षिणम् आवर्तेत ॥ (६६।१)

मनसा वा तत्समग्रम् आचारम् अनुपालयेद् आपत्कल्पः ॥ (६७।१)

सत्यधर्मा ॥ (६८।१)

आर्यवृत्तिः ॥ (६९।१)

शिष्टाध्यापकः ॥ (७०।१)

शौचशिष्टः ॥ (७१।१)

श्रुतिनिरतः स्यात् ॥ (७२।१)

नित्यम् अहिंस्रो मृदुर् दृढकारी दमदानशीलः ॥ (७३।१)

एवमाचारो मातापितरौ पूर्वापरांश् च सम्बन्धान्दुरितेभ्यो मोक्षयिष्यन् स्नातकः शश्वद्ब्रह्मलोकान् न च्यवते न च्यवते ॥ (७४।१)