ऊर्ध्वं पितुः पुत्रा रिक्थं भजेरन् ॥ (१।१)

निवृत्ते रजसि मातुर् जीवति चेच्छति ॥ (२।१)

सर्वं वा पूर्वजस्येतरान् बिभृयात् पितृवत् ॥ (३।१)

विभागे तु धर्मवृद्धिः ॥ (४।१)

विंशतिभागो ज्येष्ठस्य मिथुनम् उभयतोदद्युक्तो रथो गोवृषः ॥ (५।१)

काणखोरकूटवणेता मध्यमस्यानेकाश्चेत् ॥ (६।१)

अविर् धान्यायसी गृहमनो युक्तं चतुष्पादं चैकैकं यवीयसः ॥ (७।१)

समधा चेतरत्सर्वम् ॥ (८।१)

एकैकं वा धनरूपं काम्यं पूर्वः पूर्वो लभते ॥ (९।१)

दशकं पशूनाम् ॥ (१०।१)

नैकशफद्विपदाम् ॥ (११।१)

ऋषभो ऽधिको ज्येष्ठस्य ॥ (१२।१)

ऋषभषोडशा ज्यैष्ठिनेयस्य ॥ (१३।१)

समधा वा ज्यैष्ठिनेयेन यवीयसाम् ॥ (१४।१)

प्रतिमातृ वा स्वस्ववर्गे भागविशेषः ॥ (१५।१)

पितोत्सृजेत् पुत्रिकां अनपत्यो ऽग्निं प्रजापतिं चेष्ट्वास्मदर्थम् अपत्यम् इति संवाद्य ॥ (१६।१)

अभिसंधिमात्रात् पुत्रिकेत्येकेषाम् ॥ (१७।१)

तत्संशयान् नोपयच्छेद् अभ्रातृकाम् ॥ (१८।१)

पिण्डगोत्रर्षिसंबन्धा रिक्थं भजेरन् स्त्रीवानपत्यस्य ॥ (१९।१)

बीजं वा लिप्सेत ॥ (२०।१)

देवरवत्याम् अन्यजातम् अभागम् ॥ (२१।१)

स्त्रीधनं दुहितॄणाम् अप्रत्तानाम् अप्रतिष्ठिताणां च ॥ (२२।१)

भगिनीशुल्कः सोदर्याणाम् ऊर्ध्वं मातुः ॥ (२३।१)

पूर्वं चैके ॥ (२४।१)

असंसृष्टिविभागः प्रेतानां ज्येष्ठस्य ॥ (२५।१)

संसृष्टिनि प्रेते संसृष्टी रिक्थभाक् ॥ (२६।१)

विभक्तजः पित्र्यम् एव ॥ (२७।१)

स्वयम् अर्जितम् अवैद्येभ्यो वैद्यः कामं न दद्यात् ॥ (२८।१)

अवैद्याः समं विभजेरन् ॥ (२९।१)

पुत्रा औरसक्षेत्रजदत्तकृत्रिमगूढोत्पन्नापविद्धा रिक्थभाजः ॥ (३०।१)

कानीनसहोढपौनर्भवपुत्रिकापुत्रस्वयंदत्तक्रीता गोत्रभाजः ॥ (३१।१)

चतुर्थांशिन औरसाद्यभावे ॥ (३२।१)

ब्राह्मणस्य राजन्यापुत्रो ज्येष्ठो गुणसम्पन्नस् तुल्यभाक् ॥ (३३।१)

ज्येष्ठांशहीनम् अन्यत् ॥ (३४।१)

राजन्यावैश्यापुत्रसमवाये यथा सब्राह्मणीपुत्रेण ॥ (३५।१)

क्षत्रियाच् चेत् ॥ (३६।१)

शूद्रापुत्रो ऽप्यनपत्यस्य शुश्रूषुश् चेल्लभते वृत्तिमूलम् अन्तेवासिविधिना ॥ (३७।१)

सवर्णापुत्रो ऽप्यन्याय्यवृत्तो न लभेतैकेषाम् ॥ (३८।१)

श्रोत्रिया ब्राह्मणस्यानपत्यस्य रिक्थं भजेरन् ॥ (३९।१)

राजेतरेषाम् ॥ (४०।१)

जडक्लीबौ भर्तव्यौ ॥ (४१।१)

अपत्यं जडस्य भागार्हम् ॥ (४२।१)

शूद्रापुत्रवत् प्रतिलोमासु ॥ (४३।१)

उदकयोगक्षेमकृतान्नेष्व् अविभागः ॥ (४४।१)

स्त्रीषु च संयुक्तासु ॥ (४५।१)

अनाज्ञाते दशावरैः शिष्टैर् ऊहविद्भिर् अलुब्धैः प्रशस्तं कार्यम् ॥ (४६।१)

चत्वारश् चतुर्णां पारगा वेदानां प्राग् उत्तमात्त्रय आश्रमिणः पृथग् धर्मविदस् त्रय एतान् दशावरान् परिषदित्याचक्षते ॥ (४७।१)

असम्भवे त्वेतेषां श्रोत्रियो वेदविच्छिष्टो विप्रतिपत्तौ यद् आह ॥ (४८।१)

यतो ऽयम् अप्रभवो भूतानां हिंसानुग्रहयोगेषु ॥ (४९।१)

धर्मिणां विशेषेण स्वर्गं लोकं धर्मविद् आप्नोति ज्ञानाभिनिवेशाभ्याम् ॥ (५०।१)

इति धर्मो धर्मः ॥ (५१।१)