प्रशस्तानां स्वकर्मसु द्विजातीनां ब्राह्मणो भुञ्जीत ॥ (१।१)

प्रतिगृह्णीयाच् च ॥ (२।१)

एधोदकयवसमूलफलमध्वभयाभ्युद्यतशय्यासनावसथयानपयोदधिधानाशफरीप्रियङ्गुस्रञ्मार्गशाकान्य् अप्रणोद्यानि सर्वेषाम् ॥ (३।१)

पितृदेवगुरुभृत्यभरणे ऽप्यन्यत् ॥ (४।१)

वृत्तिश् चेन्नान्तरेण शूद्रात् ॥ (५।१)

पशुपालक्षेत्रकर्षककुलसंगतकारयितृपरिचारका भोज्यान्नाः ॥ (६।१)

वणिक् चाशिल्पी ॥ (७।१)

नित्यम् अभोज्यम् ॥ (८।१)

केशकीटावपन्नम् ॥ (९।१)

रजस्वलाकृष्णशकुनिपदोपहतम् ॥ (१०।१)

भ्रूणघ्नावेक्षितम् ॥ (११।१)

भावदुष्टम् ॥ (१२।१)

गवोपघ्रातम् ॥ (१३।१)

शुक्तं केवलम् अदधि ॥ (१४।१)

पुनः सिद्धम् ॥ (१५।१)

पर्युषितम् अशाकभक्षस्नेहमांसमधूनि ॥ (१६।१)

अपङ्क्त्यानां प्राग्दुर्वालात् ॥ (१८।१)

वृथान्नाचमनोत्थानव्यपेतानि ॥ (१९।१)

समासमाभ्यां विषमसमे पूजातः ॥ (२०।१)

अनर्चितं च ॥ (२१।१)

गोश् च क्षीरम् अनिर्दशायाः सूतके ॥ (२२।१)

अजामहिष्योश् च ॥ (२३।१)

नित्यम् आविकम् अपेयम् औष्ट्रम् ऐकशफं च ॥ (२४।१)

स्यन्दिनीयमसूसंधिनीनां च ॥ (२५।१)

विवत्सायाश् च ॥ (२६।१)

पञ्चनखाश् चाशल्यकशशश्वाविद्गोधाखड्गकच्छपाः ॥ (२७।१)

उभयतोदत्केश्यलोमैकशफकलविङ्कप्लवचक्रवाकहंसाः ॥ (२८।१)

काककङ्कगृध्रश्येना जलजा रक्तपादतुण्डा ग्राम्यकुक्कुटसूकराः ॥ (२९।१)

धेन्वनडुहौ च ॥ (३०।१)

अपन्नदन्नवसन्नवृथामांसानि ॥ (३१।१)

किसलयक्याकुलशुननिर्यासाः ॥ (३२।१)

लोहिता व्रश्चनाः ॥ (३३।१)

निचुदारुबकबलाकाशुकमद्गुटिट्टिभमान्धालनक्तचरा अभक्ष्याः ॥ (३४।१)

भक्ष्याः प्रतुदविष्किरजालपादाः ॥ (३५।१)

मत्स्याश् चाविकृताः ॥ (३६।१)

वध्याश् च धर्मार्थे ॥ (३७।१)

व्यालहतादृष्टदोषवाक्प्रशस्तान् अभ्युक्ष्योपयुञ्जीतोपयुञ्जीत ॥ (३८।१)