सुरापस्य ब्राह्मणस्योष्णाम् आसिञ्चेयुः सुराम् आस्ये मृतः शुध्येत् ॥ (१।१)

अमत्या पाने पयो घृतम् उदकं वायुं प्रति त्र्यहं तप्तानि स कृच्छ्रस् ततो ऽस्य संस्कारः ॥ (२।१)

मूत्रपुरीषरेतसां च प्राशने ॥ (३।१)

श्वापदोष्ट्रखराणां चाङ्गस्य ॥ (४।१)

ग्राम्यकुक्कुटसूकरयोश् च ॥ (५।१)

गन्धाघ्राणे सुरापस्य प्राणायामा घृतप्राशनं च ॥ (६।१)

पूर्वैश् च दष्टस्य ॥ (७।१)

तप्ते लोहशयने गुरुतल्पगः शयीत ॥ (८।१)

सूर्मीं वा श्लिष्येज्ज्वलन्तीम् ॥ (९।१)

लिङ्गं वा सवृषणम् उत्कृत्य अञ्जलाव् आधाय दक्षिणाप्रतीचीं व्रजेद् अजिह्मम् आ शरीरनिपातात् ॥ (१०।१)

मृतः शुध्येत् ॥ (११।१)

सखीसयोनिसगोत्राशिष्यभार्यासु स्नुषायां गवि चगुरुतल्पसमः ॥ (१२।१)

अवकर इत्येके ॥ (१३।१)

श्वभिर् आदयेद् राजा निहीनवर्णगमने स्त्रियं प्रकाशम् ॥ (१४।१)

पुमांसं घातयेत् ॥ (१५।१)

यथोक्तं वा ॥ (१६।१)

गर्दभेनावकीर्णी निरृतिं चतुष्पथे यजेत् ॥ (१७।१)

तस्याजिनम् ऊर्ध्ववालं परिधाय लोहितपत्रः सप्तगृहान् भक्षं चरेत्कर्माचक्षाणः ॥ (१८।१)

संवत्सरेण शुध्येत् ॥ (१९।१)

रेतःस्कन्दने भये रोगे स्वप्ने ऽग्नीन्धनभैक्षचरणानि सप्तरात्रम् अकृत्वाज्यहोमः समिधो वारेतस्याभ्याम् ॥ (२०।१)

सूर्याभ्युदितो ब्रह्मचारी तिष्ठेद् अहरभुञ्जानो ऽभ्यस्तमितश् च रात्रिं जपन् सावित्रीम् ॥ (२१।१)

अशुचिं दृष्ट्वा आदित्यम् ईक्षेत प्राणायामं कृत्वा ॥ (२२।१)

अभोज्यभोजने ऽमेध्यप्राशने वा निष्पुरीषीभावः ॥ (२३।१)

त्रिरात्रावरम् अभोजनम् ॥ (२४।१)

सप्तरात्रं वा स्वयं शीर्णान्य् उपभुञ्जानः फलान्य् अनतिक्रामन् ॥ (२५।१)

प्राक्पञ्चनखेभ्यश् छर्दनं घृतप्राशनं च ॥ (२६।१)

आक्रोशानृतहिंसासु त्रिरात्रं परमं तपः ॥ (२७।१)

सत्यवाक्ये वारुणीमानवीभिर् होमः ॥ (२८।१)

विवाहमैथुननर्मार्तसंयोगेष्व् अदोषम् एके ऽनृतम् ॥ (२९।१)

न तु खलु गुर्वर्थेषु ॥ (३०।१)

सप्त पुरुषानितश् च परतश् च हन्ति मनसापिगुरोर् अनृतं वदन्न् अल्पेष्व् अप्य् अर्थेषु ॥ (३१।१)

अन्त्यावसायिनीगमने कृच्छ्राब्दः ॥ (३२।१)

अमत्या द्वादशरात्रः ॥ (३३।१)

उदक्यागमने त्रिरात्रस् ॥ (३४।१)