तस्याश्रमविकल्पम् एके ब्रुवते ॥ (१।१)

ब्रह्मचारी गृहस्थो भिक्षुर् वैखानसः ॥ (२।१)

तेषां गृहस्थो योनिर् अप्रजनत्वाद् इतरेषाम् ॥ (३।१)

तत्रोक्तं ब्रह्मचारिणः ॥ (४।१)

आचार्याधीनत्वम् आन्तम् ॥ (५।१)

गुरोः कर्मशेषेण जपेत् ॥ (६।१)

गुर्वभावे तदपत्यवृत्तिस् तदभावे वृद्धे सब्रह्मचारिण्यग्नौ वा ॥ (७।१)

एवंवृत्तो ब्रह्मलोकम् आप्नोति जितेन्द्रियः ॥ (८।१)

उत्तरेषां चैतदविरोधि ॥ (९।१)

अनिचयो भिक्षुः ॥ (१०।१)

ऊर्ध्वरेताः ॥ (११।१)

ध्रुवशीलो वर्षासु ॥ (१२।१)

भिक्षार्थी ग्रामम् इयात् ॥ (१३।१)

जघन्यम् अनिवृत्तं चरेत् ॥ (१४।१)

निवृत्ताशीः ॥ (१५।१)

वाक्चक्षुःकर्मसंयतः ॥ (१६।१)

कौपीनाच्छादनार्थे वासो बिभृयात् ॥ (१७।१)

प्रहीणम् एके निर्णिज्य ॥ (१८।१)

नाविप्रयुक्तम् ओषधिवनस्पतीनाम् अङ्गम् उपाददीत ॥ (१९।१)

न द्वितीयाम् अपर्तु रात्रिं ग्रामे वसेत् ॥ (२०।१)

मुण्डः शिखी वा ॥ (२१।१)

वर्जयेद् बीजवधम् ॥ (२२।१)

समो भूतेषु हिंसानुग्रहयोः ॥ (२३।१)

अनारम्भी ॥ (२४।१)

वैखानसो वने मूलफलाशी तपःशीलः ॥ (२५।१)

श्रावणकेनाग्निम् आधाय ॥ (२६।१)

अग्राम्यभोजी ॥ (२७।१)

देवपितृमनुष्यभूतर्षिपूजकः ॥ (२८।१)

सर्वातिथिः प्रतिषिद्धवर्जम् ॥ (२९।१)

वैष्कम् अप्युपयुञ्जीत ॥ (३०।१)

न फालकृष्टम् अधितिष्ठेत् ॥ (३१।१)

ग्रामं च न प्रविशेत् ॥ (३२।१)

जटिलश् चीराजिनवासाः ॥ (३३।१)

नातिसंवत्सरं भुञ्जीत ॥ (३४।१)

एकाश्रम्यं त्वाचार्याः प्रत्यक्षविधानाद् गार्हस्थस्य गार्हस्थस्य ॥ (३५।१)