प्रायश्चित्तम् ॥ (१।१)

अग्नौ सक्तिर् ब्रह्मघ्नस् त्रिर् अवच्छातस्य ॥ (२।१)

लक्ष्यं वा स्यात् जन्ये शस्त्रभृताम् ॥ (३।१)

खट्वाङ्गकपालपाणिर् वा द्वादश संवत्सरान् ब्रह्मचारी भैक्षाय ग्रामं प्रविशेत् कर्माचक्षाणः ॥ (४।१)

पथो ऽपक्रामेत् संदर्शनाद् आर्यस्य ॥ (५।१)

स्थानासनाभ्यां विहरन् सवनेषूदकोपस्पर्शी शुध्येत् ॥ (६।१)

प्राणलाभे वा तन्निमित्ते ब्राह्मणस्य ॥ (७।१)

द्रव्यापचये त्र्यवरं प्रतिराद्धः ॥ (८।१)

अश्वमेधावभृथे वा ॥ (९।१)

अन्ययज्ञे ऽप्यग्निष्टुदन्तश् चेत् ॥ (१०।१)

सृष्टश् चेद् ब्राह्मणवधे ऽहत्वापि ॥ (११।१)

आत्रेय्याश् चैवम् ॥ (१२।१)

गर्भे चाविज्ञाते ॥ (१३।१)

राजन्यवधे षड्वार्षिकं प्राकृतं ब्रह्मचर्यमृषभैकसहस्राश् च गा दद्यात् ॥ (१४।१)

वैश्ये तु त्रैवार्षिकम् ऋषभैकशताश् च गा दद्यात् ॥ (१५।१)

शूद्रे संवत्सरम् ऋषभैकादशाश् च गा दद्यात् ॥ (१६।१)

अनात्रेय्यां चैवम् ॥ (१७।१)

गां च वैश्यवत् ॥ (१८।१)

मण्डूकनकुलकाकबिम्बदहरमूषकश्वहिंसासु च ॥ (१९।१)

अस्थन्वताम् सहस्रं हत्वा ॥ (२०।१)

अनस्थिमताम् अनडुद्भारे च ॥ (२१।१)

अपि वास्थन्वताम् एकैकस्मिन् किंचिद् दद्यात् ॥ (२२।१)

षण्ढे पलालभारः सीसमाषश् च ॥ (२३।१)

वराहे घृतधटः ॥ (२४।१)

सर्पे लोहदण्डः ॥ (२५।१)

ब्रह्मबन्ध्वां चलनायां नीलः ॥ (२६।१)

वैशिकेन किंचित् ॥ (२७।१)

तल्पान्नधनलाभवधेषु पृथग्वर्षाणि ॥ (२८।१)

द्वे परदारे ॥ (२९।१)

त्रीणि श्रोत्रियस्य ॥ (३०।१)

द्रव्यलाभे चोत्सर्गः ॥ (३१।१)

यथास्थानं वा गमयेत् ॥ (३२।१)

प्रतिषिद्धमन्त्रयोगे सहस्रवाकश् चेत् ॥ (३३।१)

अग्न्युत्सादिनिराकृत्युपपातकेषु चैवम् ॥ (३४।१)

स्त्री यातिचारिणी गुप्ता पिण्डं तु लभेत ॥ (३५।१)

अमानुषीषु गोवर्जं स्त्रीकृते कूष्माण्डैर् घृतहोमो घृतहोमः ॥ (३६।१)