द्वौ लोके धृतव्रतौ राजा ब्राह्मणश् च बहुश्रुतः ॥ (१।१)

तयोश् चतुर्विधस्य मनुष्यजातस्यान्तःसंज्ञानां चलनपतनसर्पणानाम् आयत्तं जीवनम् ॥ (२।१)

प्रसूतिरक्षणम् असंकरो धर्मः ॥ (३।१)

स एव बहुश्रुतो भवति ॥ (४।१)

लोकवेदवेदाङ्गवित् ॥ (५।१)

वाकोवाक्येतिहासपुराणकुशलः ॥ (६।१)

तदपेक्षस् तद्वृत्तिः ॥ (७।१)

चत्वारिंशत्संस्कारैः संस्कृतः ॥ (८।१)

त्रिषु कर्मस्व् अभिरतः ॥ (९।१)

षट्सु वा ॥ (१०।१)

सामयाचारिकेष्व् अभिविनीतः ॥ (११।१)

षड्भिः परिहार्यो राज्ञा ॥ (१२।१)

अवध्यश् चाबन्ध्यश् चादण्ड्यश् चाबहिष्कार्यश्चापरिवाद्यश् चापरिहार्यश् चेति ॥ (१३।१)

गर्भाधानपुंसवनसीमन्तोन्नयनजातकर्मनामकरणान्नप्राशनचौलोपनयनम् ॥ (१४।१)

चत्वारि वेदव्रतानि ॥ (१५।१)

स्नानं सहधर्मचारिणीसंयोगः ॥ (१६।१)

पञ्चानां यज्ञानाम् अनुष्ठानं देवपितृमनुष्यभूतब्राह्मणानाम् ॥ (१७।१)

एतेषां च ॥ (१८।१)

अष्टका पार्वणः श्राद्धम् श्रावण्याग्रहायणीचैत्र्याश्वयुजीति सप्त पाकयज्ञसंस्थाः ॥ (१९।१)

अग्न्याधेयम् अग्निहोत्रं दर्शपूर्णमासावाग्रयणं चातुर्मास्यानि निरूढपशुबन्धः सौत्रामणीति सप्तहविर्यज्ञसंस्थाः ॥ (२०।१)

अग्निष्टोमो ऽत्यग्निष्टोम उक्थ्यः षोडशी वाजपेयो ऽतिरात्रो ऽप्तोर्याम इति सप्त सोमसंस्थाः ॥ (२१।१)

इत्य् एते चत्वारिंशत्संस्काराः ॥ (२२।१)

अथाष्टाव् आत्मगुणाः ॥ (२३।१)

दया सर्वभूतेषु क्षान्तिर् अनसूया शौचम् अनायासो मङ्गलम् अकार्पण्यम् अस्पृहेति ॥ (२४।१)

यस्यैते चत्वारिंशत्संस्कारा न चाष्टाव् आत्मगुणा न स ब्रह्मणः सायुज्यं सालोक्यं गच्छति ॥ (२५।१)

यस्य तु खलु संस्काराणामेकदेशो ऽप्य् अष्टाव् आत्मगुणा अथ स ब्रह्मणः सायुज्यं सालोक्यं च गच्छति ॥ (२६।१)