प्राग् उपनयनात् कामचारः कामवादः कामभक्षः । (१।१)

अहुतात् । (१।२)

ब्रह्मचारी । (१।३)

यथोपपादितमूत्रपुरीषो भवति ॥ (१।४)

नास्याचमनकल्पो विद्यते । (२।१)

अन्यत्रापमार्जनप्रधावनावोक्षणेभ्यः ॥ (२।२)

न तदुपस्पर्शनाद् आशौचम् ॥ (३।१)

न त्वेवैनम् अग्निहवनबलिहरणयोर् नियुञ्ज्यात् ॥ (४।१)

न ब्रह्माभिव्याहारयेद् अन्यत्र स्वधानिनयनात् ॥ (५।१)

उपनयनादिर् नियमः ॥ (६।१)

उक्तं ब्रह्मचर्यम् ॥ (७।१)

अग्नीन्धनभैक्षचरणे । (८।१)

सत्यवचनम् । (८।२)

अपाम् उपस्पर्शनम् ॥ (८।३)

एके गोदानादि ॥ (९।१)

बहिःसंध्यत्वं च ॥ (१०।१)

तिष्ठेत् पूर्वाम् आसीतोत्तरां स ज्योतिष्य् आ ज्योतिषो दर्शनाद् वाग्यतः ॥ (११।१)

नादित्यम् ईक्षेत ॥ (१२।१)

वर्जयेन् मधुमांसगन्धमाल्यदिवास्वप्नाभ्यञ्जनयानोपानच्छत्रकामक्रोधलोभमोहवादवादनस्नानदन्तधावनहर्षनृत्यगीतपरिवादभयानि ॥ (१३।१)

गुरुदर्शने कण्ठप्रावृतावसक्थिकापाश्रयणपादप्रसारणानि ॥ (१४।१)

स्त्रीप्रेक्षणालम्भने मैथुनशङ्कायाम् ॥ (१६।१)

द्यूतं हीनसेवाम् अदत्तादानं हिंसाम् ॥ (१७।१)

आचार्यतत्पुत्रस्त्रीदीक्षितनामानि ॥ (१८।१)

शुक्लवाचो वाचः ॥ (१९।१)

मद्यं नित्यं ब्राह्मणः ॥ (२०।१)

अधःशय्यासनी पूर्वोत्थायी जघन्यसंवेशी ॥ (२१।१)

वाग्बाहूदरसंयतः ॥ (२२।१)

नामगोत्रे गुरोः समानतो निर्दिशेत् ॥ (२३।१)

अर्चिते श्रेयसि चैवम् ॥ (२४।१)

शय्यासनस्थानानि विहाय प्रतिश्रवणम् ॥ (२५।१)

अभिक्रमणं वचनाद् अदृष्टेन ॥ (२६।१)

अधःस्थानासनस् तिर्यग्वातसेवायां गुरुदर्शने चोत्तिष्ठेत् ॥ (२७।१)

गच्छन्तम् अनुव्रजेत् । (२८।१)

कर्म विज्ञाप्याख्याय ॥ (२८।२)

आहुतो ऽध्यायी ॥ (२९।१)

युक्तः प्रियहितयोः ॥ (३०।१)

तद्भार्यापुत्रेषु चैवम् ॥ (३१।१)

नोच्छिष्टाशनस्नापनप्रसाधनपादप्रक्षालनोन्मर्दनोपसंग्रहणानि ॥ (३२।१)

विप्रोष्योपसंग्रहणं गुरुभार्याणाम् ॥ (३३।१)

नैके युवतीनां व्यवहारप्राप्तेन ॥ (३४।१)

सार्ववर्णिकभैक्ष्यचरणम् अभिशस्तपतितवर्जम् ॥ (३५।१)

आदिमध्यान्तेषु भवच्छब्दः प्रयोज्यो वर्णानुक्रमेण ॥ (३६।१)

आचार्यज्ञातिगुरुष्वलाभे ऽन्यत्र ॥ (३७।१)

तेषां पूर्वं पूर्वं परिहरेत् ॥ (३८।१)

निवेद्य गुरवे ऽनुज्ञातो भुञ्जीत ॥ (३९।१)

असंनिधौ तद्भार्यापुत्रसब्रह्मचारिभ्यः ॥ (४०।१)

वाग्यतस् तृप्यन्नलोलुप्यमानः संनिधायोदकम् ॥ (४१।१)

शिष्यशिष्टिर् अवधेन ॥ (४२।१)

अशक्तौ रज्जुवेणुविदलाभ्यां तनुभ्याम् ॥ (४३।१)

अन्येन घ्नन् राज्ञा शास्यः ॥ (४४।१)

द्वादश वर्षाण्य् एकवेदे ब्रह्मचर्यं चरेत् ॥ (४५।१)

प्रतिद्वादश वा सर्वेषु ॥ (४६।१)

ग्रहणान्तं वा ॥ (४७।१)

विद्यान्ते गुरुर् अर्थेन निमन्त्र्यः ॥ (४८।१)

कृत्वानुज्ञातस्य वा स्नानम् ॥ (४९।१)

आचार्यः श्रेष्ठो गुरूणां मातेत्येके ॥ (५०।१)