श्रावणादि वार्षिकं प्रोष्ठपदीं वोपाकृत्याधीयीत छन्दांसि ॥ (१।१)

अर्धपञ्चमान् मासान् पञ्च दक्षिणायनं वा ॥ (२।१)

ब्रह्मचार्युत्सृष्टलोमा न मांसं भुञ्जीत ॥ (३।१)

द्वैमास्यो वा नियमः ॥ (४।१)

नाधीयीत वायौ दिवा पांसुहरे ॥ (५।१)

कर्णश्राविणि नक्तम् ॥ (६।१)

वाणभेरीमृदङ्गगर्तार्तशब्देषु ॥ (७।१)

श्वशृगालगर्दभसंह्रादे ॥ (८।१)

रोहितेन्द्रधनुर्नीहारेषु ॥ (९।१)

अभ्रदर्शने चापर्तौ ॥ (१०।१)

मूत्रित उच्चारिते ॥ (११।१)

निशायां संध्योदकेषु ॥ (१२।१)

वर्षति च ॥ (१३।१)

एके वलीकसंतानाम् ॥ (१४।१)

आचार्यपरिवेषणे ॥ (१५।१)

ज्योतिषोश् च ॥ (१६।१)

भीतो यानस्थः शयानः प्रौढपादः ॥ (१७।१)

श्मशानग्रामान्तमहापथाशौचेषु ॥ (१८।१)

पूतिगन्धान्तःशवदिवाकीर्त्यशूद्रसंनिधाने ॥ (१९।१)

भुक्तके चोद्गारे ॥ (२०।१)

ऋग्यजुषं च सामशब्दो यावत् ॥ (२१।१)

आकालिका निर्घातभूमिकम्पराहुदर्शनोल्काः ॥ (२२।१)

स्तनयित्नुवर्षविद्युतश् च प्रादुष्कृताग्निषु ॥ (२३।१)

अहर् ऋतौ ॥ (२४।१)

विद्युति नक्तं चापररात्रात् ॥ (२५।१)

त्रिभागादिप्रवृत्तौ सर्वम् ॥ (२६।१)

उल्का विद्युत्समेत्येकेषाम् ॥ (२७।१)

स्तनयित्नुर् अपराह्णे ॥ (२८।१)

अपि प्रदोषे ॥ (२९।१)

सर्वं नक्तम् आर्धरात्रात् ॥ (३०।१)

अहश् चेत् सज्योतिः ॥ (३१।१)

विषयस्थे च राज्ञि प्रेते ॥ (३२।१)

विप्रोष्य चान्योन्येन सह ॥ (३३।१)

संकुलोपाहितवेदसमाप्तिछर्दिश्राद्धमनुष्ययज्ञभोजनेष्व् अहोरात्रम् ॥ (३४।१)

अमावास्यायां च ॥ (३५।१)

द्व्यहं वा ॥ (३६।१)

कार्तिकी फाल्गुन्याषाढी पौर्णमासी ॥ (३७।१)

तिस्रो ऽष्टकास् त्रिरात्रम् ॥ (३८।१)

अन्त्याम् एके ॥ (३९।१)

अभितो वार्षिकम् ॥ (४०।१)

सर्वे वर्षाविद्युत्स्तनयित्नुसंनिपाते ॥ (४१।१)

प्रस्यन्दिनि ॥ (४२।१)

ऊर्ध्वं भोजनाद् उत्सवे ॥ (४३।१)

प्राधीतस्य च निशायां चतुर्मुहूर्तम् ॥ (४४।१)

नित्यम् एके नगरे ॥ (४५।१)

मानसम् अप्यशुचिः ॥ (४६।१)

श्राद्धिनाम् आकालिकम् ॥ (४७।१)

अकृतान्नश्राद्धिकसंयोगे ऽपि ॥ (४८।१)

प्रतिविद्यं च यान् स्मरन्ति ॥ (४९।१)