द्विजातीनाम् अध्ययनम् इज्या दानम् ॥ (१।१)

ब्राह्मणस्याधिकाः प्रवचनयाजनप्रतिग्रहाः ॥ (२।१)

पूर्वेषु नियमस् तु ॥ (३।१)

आचार्यज्ञातिप्रियगुरुधनविद्यानियमेषु ब्रह्मणः संप्रदानम् अन्यत्र यथोक्तात् ॥ (४।१)

कृषिवाणिज्ये वास्वयंकृते ॥ (५।१)

कुसीदं च ॥ (६।१)

राज्ञो ऽधिकं रक्षणं सर्वभूतानाम् ॥ (७।१)

न्याय्यदण्डत्वम् ॥ (८।१)

बिभृयाद् ब्राह्मणाञ् श्रोत्रियान् ॥ (९।१)

निरुत्साहांश् च ब्राह्मणान् ॥ (१०।१)

अकरांश् च ॥ (११।१)

उपकुर्वाणांश् च ॥ (१२।१)

योगश् च विजये ॥ (१३।१)

भये विशेषेण ॥ (१४।१)

चर्या च रथधनुर्भ्याम् ॥ (१५।१)

सङ्ग्रामे संस्थानम् अनिवृत्तिश् च ॥ (१६।१)

न दोषो हिंसायाम् आहवे ॥ (१७।१)

अन्यत्र व्यश्वसारथ्यायुधकृताञ्जलिप्रकीर्णकेशपराङ्मुखोपविष्टस्थलवृक्षाधिरूढदूतगोब्राह्मणवादिभ्यः ॥ (१८।१)

क्षत्रियश् चेद् अन्यस् तम् उपजीवेत् तद्वृत्त्या ॥ (१९।१)

जेता लभेत सांग्रामिकं वित्तम् ॥ (२०।१)

वाहनं तु राज्ञः ॥ (२१।१)

उद्धारश् चापृथग्जये ॥ (२२।१)

अन्यत् तु यथार्हं भाजयेद् राजा ॥ (२३।१)

राज्ञो बलिदानं कर्षकैर्दशमम् अष्टमं षष्ठं वा ॥ (२४।१)

पशुहिरण्ययोर् अप्य् एके पञ्चाशद्भागः ॥ (२५।१)

विंशतिभागः शुल्कः पण्ये ॥ (२६।१)

मूलफलपुष्पौषधमधुमांसतृणेन्धनानां षष्ठः ॥ (२७।१)

तद्रक्षणधर्मित्वात् ॥ (२८।१)

तेषु तु नित्ययुक्तः स्यात् ॥ (२९।१)

अधिकेन वृत्तिः ॥ (३०।१)

शिल्पिनो मासि मास्य् एकैकं कर्म कुर्युः ॥ (३१।१)

एतेनात्मनोपजीविनो व्याख्याताः ॥ (३२।१)

नौचक्रीवन्तश् च ॥ (३३।१)

भक्तं तेभ्यो दद्यात् ॥ (३४।१)

पण्यं वणिग्भिर् अर्थापचयेन देयम् ॥ (३५।१)

प्रनष्टम् अस्वामिकम् अधिगम्य राज्ञे प्रब्रूयुः ॥ (३६।१)

विख्याप्य संवत्सरं राज्ञा रक्ष्यम् ॥ (३७।१)

ऊर्ध्वम् अधिगन्तुश् चतुर्थं राज्ञः शेषः ॥ (३८।१)

स्वामी रिक्थक्रयसंविभागपरिग्रहाधिगमेषु ॥ (३९।१)

ब्राह्मणस्याधिकं लब्धम् ॥ (४०।१)

क्षत्रियस्य विजितम् ॥ (४१।१)

निध्यधिगमो राजधनम् ॥ (४२।१)

ब्राह्मणस्याभिरूपस्य ॥ (४३।१)

अब्राह्मणो ऽप्याख्याता षष्ठं लभेतेत्येके ॥ (४४।१)

चौरहृतम् अपजित्य यथास्थानम् गमयेत् ॥ (४५।१)

कोशाद् वा दद्यात् ॥ (४६।१)

रक्ष्यं बालधनम् आ व्यवहारप्रापणात् ॥ (४७।१)

समावृत्तेर् वा ॥ (४८।१)

वैश्यस्याधिकं कृषिवणिक्पाशुपाल्यकुसीदम् ॥ (४९।१)

शूद्रश् चतुर्थो वर्ण एकजातिः ॥ (५०।१)

तस्यापि सत्यम् अक्रोधः शौचम् ॥ (५१।१)

आचमनार्थे पाणिपादप्रक्षालनम् एवैके ॥ (५२।१)

श्राद्धकर्म ॥ (५३।१)

भृत्यभरणम् ॥ (५४।१)

स्वदारवृत्तिः ॥ (५५।१)

परिचर्या चोत्तरेषाम् ॥ (५६।१)

तेभ्यो वृत्तिं लिप्सेत ॥ (५७।१)

तत्र पूर्वं पूर्वं परिचरेत् ॥ (५८।१)

जीर्णान्य् उपानट्छत्रवासःकूर्चादीनि ॥ (५९।१)

उच्छिष्टाशनम् ॥ (६०।१)

शिल्पवृत्तिश् च ॥ (६१।१)

यं चार्यम् आश्रयेद् भर्तव्यस् तेन क्षीणो ऽपि ॥ (६२।१)

तेन चोत्तरः ॥ (६३।१)

तदर्थो ऽस्य निचयः स्यात् ॥ (६४।१)

अनुज्ञातो ऽस्य नमस्कारो मन्त्रः ॥ (६५।१)

पाकयज्ञैः स्वयं यजेतेत्येके ॥ (६६।१)

सर्वे चोत्तरोत्तरं परिचरेयुः ॥ (६७।१)

आर्यानार्ययोर् व्यतिक्षेपे कर्मणः साम्यम् ॥ (६८।१)