राजा सर्वस्येष्टे ब्राह्मणवर्जम् ॥ (१।१)

साधुकारी साधुवादी ॥ (२।१)

त्रय्याम् आन्वीक्षिक्या वाभिविनीतः ॥ (३।१)

शुचिर् जितेन्द्रियो गुणवत्सहायोपायसम्पन्नः ॥ (४।१)

समः प्रजासु स्यात् ॥ (५।१)

हितम् आसां कुर्वीत ॥ (६।१)

तम् उपर्यासीनम् अधस्ताद् उपासीरन्न् अन्ये ब्राह्मणेभ्यः ॥ (७।१)

ते ऽप्येनं मन्येरन् ॥ (८।१)

वर्णान् आश्रमांश् च न्यायतो ऽभिरक्षेत् ॥ (९।१)

चलतश् चैतान् स्वधर्मे स्थापयेत् ॥ (१०।१)

धर्मस्य ह्यंशभाग् भवतीति ॥ (११।१)

ब्राह्मणं च पुरोदधीत विद्याभिजनवाग्रूपवयःशीलसम्पन्नं न्यायवृत्तं तपस्विनम् ॥ (१२।१)

तत्प्रसूतः कर्माणि कुर्वीत ॥ (१३।१)

ब्रह्मप्रसूतं हि क्षत्रम् ऋध्यते न व्यथत इति च विज्ञायते ॥ (१४।१)

यानि च दैवोत्पातचिन्तकाः प्रब्रूयुस् तान्याद्रियेत ॥ (१५।१)

तदधीनम् अपि ह्येके योगक्षेमं प्रतिजानते ॥ (१६।१)

शान्तिपुण्याहस्वस्त्ययनायुष्मन्मङ्गलसंयुक्तान्य् आभ्युदयिकानि विद्वेषणसंवननाभिचारद्विषद्व्यृद्धियुक्तानि च शालाग्नौ कुर्यात् ॥ (१७।१)

यथोक्तम् ऋत्विजो ऽन्यानि ॥ (१८।१)

तस्य च व्यवहारो वेदो धर्मशास्त्राण्य् अङ्गान्युपवेदाः पुराणम् ॥ (१९।१)

देशजातिकुलधर्माश् चाम्नायैर् अविरुद्धाः प्रमाणम् ॥ (२०।१)

कर्षकवणिक्पशुपालकुसीदिकारवः स्वे स्वे वर्गे ॥ (२१।१)

तेभ्यो यथाधिकारम् अर्थान् प्रत्यवहृत्य धर्मव्यवस्था ॥ (२२।१)

न्यायाधिगमे तर्को ऽभ्युपायः ॥ (२३।१)

तेनाभ्यूह्य यथास्थानं गमयेत् ॥ (२४।१)

विप्रतिपत्तौ त्रैविद्यवृद्धेभ्यः प्रत्यवहृत्य निष्ठां गमयेत् ॥ (२५।१)

तथा ह्यस्य निःश्रेयसं भवति ॥ (२६।१)

ब्रह्म क्षत्रेण संपृक्तं देवपितृमनुष्यान्धारयतीति विज्ञायते ॥ (२७।१)

दण्डो दमनाद् इत्याहुस् तेनादान्तान् दमयेत् ॥ (२८।१)

वर्णाश्रमाः स्वस्वधर्मनिष्ठाः प्रेत्य कर्मफलमनुभूय ततः शेषेन विशिष्टदेशजातिकुलरूपायुःश्रुतचित्रवित्तसुखमेधसो जन्म प्रतिपद्यन्ते ॥ (२९।१)

विष्वञ्चो विपरीता नश्यन्ति ॥ (३०।१)

तान् आचार्योपदेशो दण्डश् च पालयते ॥ (३१।१)

तस्माद् राजाचार्याव् अनिन्द्याव् अनिन्द्यौ ॥ (३२।१)