पादोपसंग्रहणं समवाये ऽन्वहम् ॥ (१।१)

अभिगम्य तु विप्रोष्य ॥ (२।१)

मातृपितृतद्बन्धूनां पूर्वजानां विद्यागुरूणां तद्गुरूणां च ॥ (३।१)

संनिपाते परस्य ॥ (४।१)

स्वनाम प्रोच्याहमयम् इत्य् अभिवादो ज्ञसमवाये ॥ (५।१)

स्त्रीपुंयोगे ऽभिवादतो ऽनियमम् एके ॥ (६।१)

नाविप्रोष्य स्त्रीणाम् अमातृपितृव्यभार्याभगिनीनाम् ॥ (७।१)

नोपसंग्रहणं भ्रातृभार्याणां स्वसॄणाम् ॥ (८।१)

ऋत्विक्श्वशुरपितृव्यमातुलानां तु यवीयसां प्रत्युत्थानम् अभिवाद्याः ॥ (९।१)

तथान्यः पूर्वः पौरो ऽशीतिकावरः शूद्रो ऽप्यपत्यसमेन ॥ (१०।१)

अवरो ऽप्यार्यः शूद्रेण ॥ (११।१)

नाम वास्य वर्जयेत् ॥ (१२।१)

राज्ञश् चाजपः प्रेष्यः ॥ (१३।१)

भो भवन्न् इति वयस्यः समाने ऽहनि जातः ॥ (१४।१)

दशवर्षवृद्धः पौरः पञ्चभिः कलाभरः श्रोत्रियश् चारणस् त्रिभिः ॥ (१५।१)

राजन्यवैश्यकर्मा विद्याहीनाः ॥ (१६।१)

दीक्षितश् च प्राक् क्रयात् ॥ (१७।१)

वित्तबन्धुकर्मजातिविद्यावयांसि मान्यानिपरबलीयांसि ॥ (१८।१)

श्रुतं तु सर्वेभ्यो गरीयः ॥ (१९।१)

तन्मूलत्वाद् धर्मस्य श्रुतेश् च ॥ (२०।१)

चक्रिदशमीस्थानुग्राह्यवधूस्नातकराजभ्यः पथो दानम् ॥ (२१।१)

राज्ञा तु श्रोत्रियाय श्रोत्रियाय ॥ (२२।१)