अथ चुल्लिकालक्षणमाह पतङ्गीकल्कत इति ॥ (१।०)

पतङ्गी अशुद्धरसोपरसादिकृतबीजजीर्णः पारदस्तद्घटितो यः कल्कस्तेन जातं यल्लोहे ताम्रादौ गौरवतेजस्वित्वादिगुणसहितं तारत्वं हेमता वा किंचित्कालपर्यन्तं स्थित्वा नश्यति सा क्रिया चुल्लिकेति मता ॥ (२।०)

उक्तं च रसहृदये । (३।१)

यः पुनरेतैः कुरुते कर्माशुद्धैर् भवेद् रसस्तस्य । (३।२)

अव्यापकः पतङ्गी न रसे रसायने योज्यः ॥ (३।३)

इति ॥ (४।०)

एतै रसोपरसैः ॥ (५।०)

कर्म जारणादिकर्म ॥ (६।०)

पतङ्गी पक्षिवद् ऊर्ध्वगामी ॥ (७।०)

पारदघटितकल्कस्तु योगतरङ्गिण्यादिग्रन्थोक्तो बोध्यः ॥ (८।०)

तथा चोक्तं तरङ्गिण्याम् । (९।१)

पारदष्टङ्क एकस्या द्विपलं पीतखर्परम् । (९।२)

मर्दयेत्सुदृढं तावद् रसो यावद् विलीयते ॥ (९।३)

पुनर् जम्बीरनीरेण गुडेन च समन्वितम् । (१०।१)

शोषयेच्चातपे पिष्ट्वा श्लक्ष्णं कृत्वा च धार्यते ॥ (१०।२)

अर्कदुग्धस्य दातव्या भावनास्ता यथा तथा । (११।१)

अस्य कल्कस्य सिद्धस्य भाग एकश्च टङ्कणः ॥ (११।२)

ताम्रं भागत्रयं दत्त्वा धाम्यताम् अन्धमूषया । (१२।१)

सुवर्णं दिव्यतेजः स्यात् कुङ्कुमाद् अतिरिच्यते ॥ (१२।२)

इति ॥ (१३।०)

एवं नागार्जुनादिग्रन्थे तारत्वोत्पादककल्कोऽपि द्रष्टव्यः ॥ (१४।०)