उषा वा अश्वस्य मेध्यस्य शिरः । (१।१)

सूर्यश् चक्षुर् वातः प्राणो व्यात्तम् अग्निर् वैश्वानरः संवत्सर आत्माश्वस्य मेध्यस्य । (१।२)

द्यौः पृष्ठम् अन्तरिक्षम् उदरं पृथिवी पाजस्यं दिशः पार्श्वे अवान्तरदिशः पर्शव ऋतवो ऽङ्गानि मासाश् चार्धमासाश् च पर्वाण्य् अहोरात्राणि प्रतिष्ठा नक्षत्राण्य् अस्थीनि नभो मांसानि । (१।३)

ऊवध्यं सिकताः सिन्धवो गुदा यकृच्च क्लोमानश् च पर्वता ओषधयश् च वनस्पतयश् च लोमानि । (१।४)

उद्यन् पूर्वार्धो निम्लोचञ् जघनार्धः । (१।५)

यद् विजृम्भते तद् विद्योतते । (१।६)

यद् विधूनुते तत् स्तनयति । (१।७)

यन् मेहति तद् वर्षति । (१।८)

वाग् एवास्य वाक् ॥ (१।९)

अहर् वा अश्वं पुरस्तान् महिमान्वजायत । (२।१)

तस्य पूर्वे समुद्रे योनिः । (२।२)

रात्रिर् एनं पश्चान् महिमान्वजायत । (२।३)

तस्यापरे समुद्रे योनिः । (२।४)

एतौ वा अश्वं महिमानाव् अभितः संबभूवतुः । (२।५)

हयो भूत्वा देवान् अवहद् वाजी गन्धर्वान् अर्वासुरान् अश्वो मनुष्यान् । (२।६)

समुद्र एवास्य बन्धुः समुद्रो योनिः ॥ (२।७)