तत्रेत्यादि ॥ (१।०)

कललं सिङ्घाणप्रख्यम् ॥ (२।०)

द्वितीय इत्यादि ॥ (३।०)

शीतः श्लेष्मा उष्मा पित्तं कफानिलयोर् अप्युष्मसम्भवात् परिणामहेतुत्वम् ॥ (४।०)

तदुक्तं चरके भौमाप्याग्नेयवायव्याः पञ्चोष्माणः सनाभसाः इति ॥ (५।०)

घनः कठिनः ॥ (६।०)

यदीत्यादि ॥ (७।०)

पिण्डो वर्तुलाकृतिः पेशी दीर्घाकृतिर् अर्बुदं वर्तुलफलार्धम् इति ॥ (८।०)

गयी तु भोजदर्शनात् पिण्डादीनाम् अन्यथाकारं पठति ॥ (९।०)

यथा चतुरस्रा भवेत् पेशी वृत्तः पिण्डो घनः स्मृतः ॥ (१०।०)

शाल्मलीमुकुलाकारम् अर्बुदं परिचक्षत इति ॥ (११।०)

तृतीये इत्यादि ॥ (१२।०)

शाखाश् चतस्रो मूर्धोरःपृष्ठोदराण्यङ्गानि चिबुकनासौष्ठश्रवणाङ्गुलिपार्ष्णिप्रभृतीनि प्रत्यङ्गानि ॥ (१३।०)

चतुर्थे इत्यादि । (१४।१)

तत्स्थानत्वात् हृदयस्थानत्वात् ॥ (१४।२)

इन्द्रियार्थाः शब्दस्पर्शरूपरसगन्धाः ॥ (१५।०)

द्विहृदयामिति द्वितीयं हृदयं यस्याः सा द्विहृदया ताम् ॥ (१६।०)

दौहृदेत्यादि ॥ (१७।०)

कुणिं विकृतहस्तम् ॥ (१८।०)

तत्र कुब्जादिष्ववयवसमुदायेन्द्रियाधिष्ठानजो दोषो दौहृदविमाननजनितो यथाशस्त्रम् ऊह्यः ॥ (१९।०)