इदानीम् उत्तरतन्त्रस्य निखिलव्याधिनिश्चयचिकित्सालक्षणां स्तुतिं निर्दिशन्नाह निखिलेनेत्यादि ॥ (१।०)

निखिलेन सामस्त्येन ॥ (२।०)

यत्र यस्मिन्नुत्तरतन्त्रे ॥ (३।०)

पृथग्विधा नानाप्रकाराः ॥ (४।०)

के ते नानाप्रकारा रोगा निखिलेनोत्तरेऽभिधास्यन्ते इत्याह शालाक्यशास्त्राभिहिता इत्यादि ॥ (५।०)

विदेहाधिपकीर्तिता इति निमिप्रणीताः षट्सप्ततिर्नेत्ररोगाः न करालभद्रशौनकादिप्रणीताः ॥ (६।०)

ये च विस्तरतो दृष्टा इति पार्वतकजीवकबन्धकप्रभृतिभिः कुमाराबाधहेतवः स्कन्दग्रहप्रभृतयः ॥ (७।०)

षट्सु कायचिकित्सासु अग्निवेशभेडजातूकर्णपराशरहारीतक्षारपाणिप्रोक्तासु ॥ (८।०)

उपसर्गादयो ज्वरादयः ॥ (९।०)

आगन्तवः अत्र उन्मादादयः ॥ (१०।०)

ननु भूतनिमित्तत्वादुन्मादादीनां कथमागन्तुकत्वं यतः प्रहारादिकृता आगन्तवः सत्यं बाह्यनिमित्तत्वादुन्मादादीनाम् आगन्तुकत्वम् ॥ (११।०)

गयी तु उपसर्गादयः अमानुषोपसर्गादयः ते चापस्मारोन्मादा भूतविद्याभिहिताः त एवागन्तव इति व्याख्यानयति ॥ (१२।०)

उत्तरतन्त्रे निखिलेन रोगा एव प्रोक्ता उतान्येऽपि प्रोक्ता इति पृष्ट आह त्रिषष्टी रससंसर्गा इत्यादि ॥ (१३।०)

युक्तार्थाः प्रमाणोपपन्नार्थाः ॥ (१४।०)

युक्तयः तन्त्रयुक्तयः ॥ (१५।०)

अस्याग्रे केचित् । (१६।१)

विदेहाधिपतिः श्रीमान् जनको नाम विश्रुतः । (१६।२)

आलम्भयज्ञप्रवणः सोऽयजद्ब्राह्मणैर्वृतः ॥ (१६।३)

तस्य यागप्रवृत्तस्य कुपितो भगवान् रविः । (१७।१)

दृष्टिं प्रणाशयामास सो ऽनुतेपे महत् तपः ॥ (१७।२)

दीप्तांशुस्तपसा तेन तोषितः प्रददौ पुनः । (१८।१)

चक्षुर्वेदं प्रसन्नात्मा सर्वभूतानुकम्पया ॥ (१८।२)

इति पाठं पठन्ति व्याख्यानयन्ति च ॥ (१९।०)

तं च बृहत्पञ्जिकाकारो न पठति तस्मान्मयापि न पठितो न व्याख्यातश्च ॥ (२०।०)