इदानीं दौर्हृदविशेषैर् गुणविशेषाक्रान्तानाम् अपत्यानाम् उत्पत्तिं सूचयन्नाह राजसंदर्शने इत्यादि ॥ (१।०)

महाभागं महापुण्यवन्तम् ॥ (२।०)

दुकूलेत्यादि ॥ (३।०)

दुकूलपट्टः पट्टवस्त्रं कौशेयं त्रसरतन्तुजातम् ॥ (४।०)

भूषणानि मुक्ताहारप्रभृतीनि ॥ (५।०)

ललितं शृङ्गारचेष्टायुक्तम् ॥ (६।०)

दुकूले पट्टकौशेये भूषणादिषु इति केचित् पठन्ति तत्र दुकूलं सूक्ष्मं वस्त्रं पट्टं पट्टवस्त्रम् ॥ (७।०)

आश्रमे इत्यादि ॥ (८।०)

यस्या आश्रमे तपस्विनाम् अधिष्ठाने श्रद्धा भवेत् सा एवंभूतं जनयेद् इति पिण्डार्थः ॥ (९।०)

संयतात्मानं संयतेन्द्रियम् ॥ (१०।०)

देवताप्रतिमायाम् इत्यादि ॥ (११।०)

पार्षदोपमम् इति पार्षदेषु सभापुरुषेषूपमा यस्य स तथा तम् ॥ (१२।०)

दर्शने इत्यादि ॥ (१३।०)

व्याला व्याघ्रादयो हिंस्राः पशवः ॥ (१४।०)

गोधेत्यादि ॥ (१५।०)

सुषुप्सुं स्वप्तुम् इच्छुम् ॥ (१६।०)

धारणात्मकं हृदयगृहीतवस्तूनाम् अमोचकम् ॥ (१७।०)

वराहमांसादिति अभिलषितात् इति शेषः ॥ (१८।०)

मार्गादित्यादि मार्गात् मृगमांसात् ॥ (१९।०)

विक्रान्तमुद्योगिनं जङ्घालं वेगवन्तम् ॥ (२०।०)

सृमरादित्यादि सृमरो महाशूकरः अन्ये महाश्वाकारश् चमरानूकः ॥ (२१।०)

नित्यभीतं च तैत्तिरात् इत्यत्र नित्यं शीलं च तैत्तिरात् इत्यपरे शीलं शीलवन्तम् ॥ (२२।०)

अनुक्तदौर्हृदसंग्रहार्थं श्लोकम् आहातो ऽनुक्तेष्विति ॥ (२३।०)

यादृशेषु दौर्हृदं श्रद्धां समभिध्याति चेतसि करोति तेन समानमित्यर्थः ॥ (२४।०)