प्रस्तुतं शोणितमेवाधिकर्तुमाह तेषाम् इत्यादि ॥ (१।०)

तेषामिति धातूनाम् ॥ (२।०)

तदधिकृत्येति शोणितमधिकृतं कृत्वेत्यर्थः ॥ (३।०)

तत्र फेनिलम् इत्यादि ॥ (४।०)

फेनिलं फेनसहितम् ॥ (५।०)

अरुणम् ईषद् रक्तम् तदेव पाकाभिमुखं कृष्णम् ॥ (६।०)

परुषम् अपिच्छिलं रूक्षम् इत्यन्ये ॥ (७।०)

तनु अच्छम् ॥ (८।०)

शीघ्रगम् आशुप्रसृति ॥ (९।०)

अस्कन्दि चेति स्त्यानत्वरहितम् ॥ (१०।०)

नीलमित्यादि नीलं हरितं श्यावं सामपित्तदुष्टं पीतं निरामपित्तदुष्टं श्यावं हरितकृष्णम् ॥ (११।०)

विस्रम् आमगन्धि ॥ (१२।०)

अनिष्टं पिपीलिकादीनाम् अननुसरणाद् अवगन्तव्यम् ॥ (१३।०)

अस्कन्दि चेति स्त्यानत्वरहितम् ॥ (१४।०)

गैरिकेत्यादि ॥ (१५।०)

गैरिकोदकप्रतीकाशं पाण्डुलोहितम् ॥ (१६।०)

बहलं घनम् ॥ (१७।०)

मांसपेशीप्रभं स्त्यानत्वात् ॥ (१८।०)

सर्वेत्यादि ॥ (१९।०)

सर्वलक्षणयुक्तं वातादिलक्षणयुक्तम् ॥ (२०।०)

अत्र केचित् पित्तवद् रक्तेनातिकृष्णम् इति पठन्ति न तु निबन्धकाराः ॥ (२१।०)

द्विदोषलिङ्गम् इत्यादि ॥ (२२।०)

संसृष्टं दोषद्वययुक्तम् इत्यर्थः ॥ (२३।०)

अत्र क्वचित् जीवशोणितम् अन्यत्रोपदेक्ष्यामः इति पाठः न तु निबन्धेषु ॥ (२४।०)