जागरादित्रयं प्रोक्तशक्तिचक्रानुसंधितः ॥ (१।०)

तुर्यानन्दरसासाराच् छुरितं भेदवर्जनात् ॥ (२।०)

आनन्दरसनिर्मग्नं परमं व्योम भावयन् ॥ (३।०)

त्रितयस्यास्य यो भोक्ता चमत्कर्ता स योगिराट् ॥ (४।०)

त्रिषु धामसु यद् भोग्यं भोक्ता यश् च प्रकीर्तितः ॥ (५।०)

विद्यात् तद् उभयं यस् तु स भुञ्जानो न लिप्यते ॥ (६।०)

इत्य् उक्तनिष्प्रतिद्वन्द्विसंवित्साम्राज्यवैभवः ॥ (७।०)

चिद्घनः स्वात्मविज्ञानपरमानन्दनिर्भरः ॥ (८।०)

वीरेशो येन वीराणां भेदग्रसनकारिणाम् ॥ (९।०)

अन्तर्बहिर्विसरताम् इन्द्रियाणाम् अधीश्वरः ॥ (१०।०)

किम् अस्य परचित्तत्त्वारोहविश्रान्तिसूचिकाः ॥ (११।०)

भूमिकाः सन्त्य् अयं याभिर् याति सर्वोत्तरां स्थितिम् ॥ (१२।०)

इत्य् अन्तेवासिहृच्छङ्काशान्त्यै सन्तीत्य् उदीर्यते ॥ (१३।०)