यद् यद् दृश्यम् अशेषं तच् छरीरं तस्य योगिनः ॥ (१।०)

अहम् इत्य् अपृथक्त्वेन पतिवत् प्रतिभासनात् ॥ (२।०)

शरीरं देहधीप्राणशून्यरूपं घटादिवत् ॥ (३।०)

दृश्यम् एवास्य पशुवत् द्रष्टृत्वेन न भासते ॥ (४।०)

एवं देहे च बाह्ये च सर्वत्रैवास्य योगिनः ॥ (५।०)

मयूराण्डरसन्यायात् प्रतिपत्तिर् अभेदिनी ॥ (६।०)

दृश्यं शरीरताम् एति शरीरं चापि दृश्यताम् ॥ (७।०)

इत्य् उक्तं योगिनो यत् तन् न दुर्घटम् इतीर्यते ॥ (८।०)

हृदये चित्तसंघट्टाद् दृश्यस्वापदर्शनम् ॥ (९।०)

हृदयं तद् विजानीयाद् विश्वस्यायतनं महत् ॥ (१०।०)

इत्य् उक्तनीत्या हृदयं विश्वविश्रान्तिभित्तिभूः ॥ (११।०)

स्वसंवित् तत्र संघट्टश् चित्तस्य चलतः सतः ॥ (१२।०)

तदैकात्म्यपरामर्शजागरूकस्वभावता ॥ (१३।०)

तस्माद् दृश्यस्य विश्वस्य नीलदेहादिरूपिणः ॥ (१४।०)

स्वापस्यैतदभावस्य शून्यस्यापि च दर्शनम् ॥ (१५।०)

स्वाङ्गरूपेषु भावेषु प्रमाता कथ्यते पतिः ॥ (१६।०)

इति श्रीप्रत्यभिज्ञोक्तनीत्या पत्युर् इव प्रभोः ॥ (१७।०)

स्वाङ्गकल्पतया तस्य यथावत्प्रथनं भवेत् ॥ (१८।०)

उक्ते ऽप्य् एवं प्रमेये ऽस्मिन्न् उपायान्तरम् उच्यते ॥ (१९।०)