परा भट्टारिका संविदिच्छाशक्तिपुरःसरम् ॥ (१।०)

स्थूलप्रमेयपर्यन्तं वमन्ती विश्वम् आन्तरम् ॥ (२।०)

प्रमात्रन्तर्बहीरूपहृषीकविषयात्मनाम् ॥ (३।०)

खेचर्यादिप्रवाहाणां बाह्याभ्यन्तररूपिणाम् ॥ (४।०)

प्रवर्तकत्वात् स्वच्छत्वगम्भीरत्वादिधर्मतः ॥ (५।०)

महाह्रदो जगद्व्यापी देशकालाद्यगोचरः ॥ (६।०)

अन्तस् तस्यानुसंधानात् तादात्म्यस्यावमर्शनात् ॥ (७।०)

अकारादिक्षकारान्तशब्दराशिप्रथात्मनः ॥ (८।०)

क्षित्यादिशिवपर्यन्ततत्त्वान्तःक्षोभकारिणः ॥ (९।०)

मन्त्रवीर्यस्य सर्वेषां मन्त्राणां प्राणरूपिणः ॥ (१०।०)

पराहंतापरामर्शमयस्यानुभवः स्फुटम् ॥ (११।०)

अखिलं वाचकं वाच्यम् अहम् इत्य् अवमर्शनम् ॥ (१२।०)

योगिनः सावधानस्य भवतीत्य् एव शिष्यते ॥ (१३।०)

स्फुटीकरोमि संक्षेपात् तत् प्रमेयं पुरोदितम् ॥ (१४।०)

महाह्रद इति प्रोक्ता शक्तिर् भगवती परा ॥ (१५।०)

अनुसंधानम् इत्युक्तं तत्तादात्म्यविमर्शनम् ॥ (१६।०)

मन्त्रवीर्यम् इति प्रोक्तं पूर्णाहंताविमर्शनम् ॥ (१७।०)

तदीयो ऽनुभवस् तस्य स्फुरणं स्वात्मनः स्फुटम् ॥ (१८।०)

इति श्रीशाम्भवोपायप्रकाशनपरायणः ॥ (१९।०)

उन्मेषः प्रथमः सम्यक्स्वरूपोन्मेषलक्षणः ॥ (२०।०)