विद्येति परमाद्वैतसम्प्रवेदनरूपिणी ॥ (१।०)

शरीरं यस्य भगवान् शब्दराशिः स उच्यते ॥ (२।०)

तस्य सत्ता समस्ताध्वपूर्णाहंतास्वरूपिणी ॥ (३।०)

स्फुरत्ता सैव मन्त्राणां मननत्राणधर्मिणाम् ॥ (४।०)

गुप्तार्थताया जननं रहस्यम् इति कथ्यते ॥ (५।०)

एतच् छ्रीक्षेमराजेन तन्त्रसारात् समुद्धृतैः ॥ (६।०)

संवादैः संमतैः सम्यग्वर्णितं निजवृत्तिगैः ॥ (७।०)

सम्यग् एवंविधं मन्त्रवीर्यं येषां यथातथम् ॥ (८।०)

महाह्रदानुसंधानप्रकारावेदितं त्व् अपि ॥ (९।०)

इच्छयैव महेशस्य हृदयंगमतां दृढम् ॥ (१०।०)

न गच्छत्य् अथ तुच्छायां चित्तं सिद्धौ प्ररोहति ॥ (११।०)

बिन्दुनादादिजातायां तेषां तु मितयोगिनाम् ॥ (१२।०)