नेत्रादिरोमरन्ध्रान्तनाडीनां निविडात्मनाम् ॥ (१।०)

सर्वासां मुख्यभूतेषु सर्वावष्टम्भदायिषु ॥ (२।०)

सव्यापसव्यसौषुम्ननाडीमार्गेषु सर्वदा ॥ (३।०)

नाडीनां नासिका प्राणशक्तिः कुटिलवाहिनी ॥ (४।०)

अन्तर् इत्य् आन्तरी संवित् तत्स्वरूपस्य यत् पुनः ॥ (५।०)

मध्यं सर्वान्तरत्वेन प्रधानं विश्वभित्तिकम् ॥ (६।०)

परामर्शमयं रूपम् उत्तीर्णं तस्य संयमात् ॥ (७।०)

निभालनप्रकर्षोत्थात् स्वात्मबुद्धिविमर्शनात् ॥ (८।०)

किम् अत्र संयमे वाच्यम् इयम् एव समाहितिः ॥ (९।०)

देदीप्यमाना सर्वासु दशास्व् अन्तर्निरन्तरम् ॥ (१०।०)

निर्व्युत्थानावधानेन योगिनैवानुभूयते ॥ (११।०)

मय्य् आवेश्य मनो ये मां नित्ययुक्ता उपासते ॥ (१२।०)

श्रद्धया परयोपेतास् ते मे युक्ततमा मताः ॥ (१३।०)

इति श्रीभगवद्गीताप्रोक्तनीत्यनुसारतः ॥ (१४।०)

विश्वोत्तीर्णनिजाहंतासमावेशितचेतसः ॥ (१५।०)

पर्यन्ते योगिनो योगफलं सम्यक् प्रदर्शयन् ॥ (१६।०)

उपसंहरति श्रीमान् उक्तं प्रकरणं शिवः ॥ (१७।०)