यो ऽयम् उक्तः स्वसंवित्तेर् उद्यमो भैरवात्मकः । (१।१)

अस्यास्ति महती शक्तिर् अतिक्रान्तक्रमाक्रमा ॥ (१।२)

निःशेषनिजचिच्छक्तिचक्राक्रमणलम्पटा । (२।१)

रिक्तारिक्तोभयाकाराप्य् अनेतद्रूपिणी परा ॥ (२।२)

ययैव स्वात्मचिद्भित्तौ प्रमेयोल्लासनादितः । (३।१)

परप्रमातृविश्रान्तिपर्यन्तस्पन्दरूपया ॥ (३।२)

सृष्टिस्थितिलयानाख्याभासशक्तिप्रसारणात् । (४।१)

प्रपञ्चविषयं चञ्चत्पञ्चकृत्यं प्रपञ्चितम् ॥ (४।२)

तया प्रसारितस्यास्य शक्तिचक्रस्य यत् पुनः । (५।१)

संधानम् आन्तराम्नायाम्नातक्रमविमर्शनम् ॥ (५।२)

तस्मिन् सत्य् अस्य विश्वस्य कालाग्न्यादिकलावधेः । (६।१)

संहारः स्यात् स्वसंवित्तिवह्निसद्भावलक्षणः ॥ (६।२)

एवं स्वसंवित्कालाग्निप्लुष्टभेदस्य योगिनः । (७।१)

न स्यात् समाधिव्युत्थानभेदः को ऽपीति कथ्यते ॥ (७।२)

जाग्रत्स्वप्नसुषुप्तभेदे तुर्याभोगसम्भवः । (८।१)

उद्यमो भैरव इति प्रोक्तरूपं स्फुरद्वपुः ॥ (८।२)

तुर्यं नाम परं धाम तदाभोगश् चमत्क्रिया । (९।१)

भेदे ऽपि जाग्रदादीनां योगिनस् तस्य सम्भवः ॥ (९।२)

अनुस्यूतिः परानन्दरूपा स्याद् इति शिष्यते । (१०।१)

जाग्रदादित्रयं सूत्रत्रयेण लक्ष्यते क्रमात् ॥ (१०।२)