मन्त्रमुद्रानुसंधानसंततोद्युक्तचेतसः ॥ (१।०)

भवत्य् उक्तगुरोः प्रीतात् साधकस्येति शिष्यते ॥ (२।०)

अथाद्यास् तिथयः सर्वे स्वरा बिन्द्ववसानगाः ॥ (३।०)

तदन्तः कालयोगेन सोमसूर्यौ प्रकीर्तितौ ॥ (४।०)

पृथिव्यादीनि तत्त्वानि पुरुषान्तानि पञ्चसु ॥ (५।०)

क्रमात् कादिषु वर्गेषु मकारान्तेषु सुव्रते ॥ (६।०)

वाय्वग्निसलिलेन्द्राणां धारणानां चतुष्टयम् ॥ (७।०)

तदूर्ध्वे शादि विख्यातं पुरस्ताद् ब्रह्मपञ्चकम् ॥ (८।०)

अमूला तत्क्रमाज् ज्ञेया क्षान्ता सृष्टिर् उदाहृता ॥ (९।०)

सर्वेषां चैव मन्त्राणां विद्यानां च यशस्विनि ॥ (१०।०)

इयं योनिः समाख्याता सर्वतन्त्रेषु सर्वदा ॥ (११।०)

इति श्रीत्रीशिकाशास्त्रप्रोक्तन्यायेन मातृका ॥ (१२।०)

अकारादिविसर्गान्तस्वरषोडशगर्भिणी ॥ (१३।०)

अत एवादिबिन्द्वन्तदशपञ्चतिथिक्रमा ॥ (१४।०)

तदात्मकतदुत्तीर्णबिन्दुद्वंद्वविभूषिता ॥ (१५।०)

अत एव जगत् सर्वं सृजत्य् अन्तर् अनुत्तरे ॥ (१६।०)

तत् पञ्चदशकस्यान्तरुद्धृतैः पञ्चभिः स्वरैः ॥ (१७।०)

अ इ उ ऋ ﾱ विन्यासैः कादिमान्तं च वाचकम् ॥ (१८।०)

क्षित्यादिपुरुषान्तं च वाच्यं तत्त्वकदम्बकम् ॥ (१९।०)

पञ्चपञ्चकभेदेन पञ्चपञ्चविजृम्भितम् ॥ (२०।०)

बहिश् चानुत्तराद् एव सृजती विश्वम् ईदृशम् ॥ (२१।०)

वाय्वग्निसलिलेन्द्राणां क्रमाद् यरलवात्मनाम् ॥ (२२।०)

अनुत्तरेच्छोन्मेषाख्यत्रितयान्योन्यसंधितः ॥ (२३।०)

किंचानुत्तरषण्ढाख्यद्वयसंधिवशाद् अपि ॥ (२४।०)

उत्थितानां कलाविद्यामायारागाभिधायिनाम् ॥ (२५।०)

स्वरूपगोपनात् सर्वकर्तृत्वाद्यपसारतः ॥ (२६।०)

खण्डितस्य पशोः किंचित्कर्तृत्वादिप्रदायिनाम् ॥ (२७।०)

मायोर्ध्वशुद्धविद्यादितत्त्वारोहनिरोधनात् ॥ (२८।०)

मूलाद् अधो ऽवरोहस्य निरोधाच् च त्रिशङ्कुवत् ॥ (२९।०)

मध्ये संस्थापितस्यास्य धारणाद् धारणात्मनाम् ॥ (३०।०)

यतिस् तु भावाभावानां व्यवस्थोदयदायिनी ॥ (३१।०)

कालो ऽपि तां महामायां स्वतन्त्राम् अनुवर्तते ॥ (३२।०)

इत्युक्त्या कालनियतियुक्तत्वात् षड्विधात्मनाम् ॥ (३३।०)

स्फारयन्ती वपुः पश्चात् तदूर्ध्वं शादिपञ्चकम् ॥ (३४।०)

सद्योजातादिकेशानपर्यन्तब्रह्मविग्रहम् ॥ (३५।०)

सूक्ष्मरूपमहीवारिवह्निवायुनभोमयम् ॥ (३६।०)

क्रमेण शुद्धविद्येशसादशक्तिशिवात्मकम् ॥ (३७।०)

विस्फारयन्ती स्वान्तःस्थं विसर्गकलया बहिः ॥ (३८।०)

कादिसान्ताक्षरान्तस्थः क्षकारो ऽप्य् अन्तिमो यतः ॥ (३९।०)

अतो ऽकारहकाराभ्याम् अहम् इत्य् अपृथक्तया ॥ (४०।०)

प्रपञ्चं शिवशक्तिभ्यां क्रोडीकृत्य प्रकाशते ॥ (४१।०)

अस्यास् त्व् एवंप्रभावायाश् चक्रं यत् तद् इहोदितम् ॥ (४२।०)

अनुत्तरेच्छोन्मेषादिस्पन्दशक्तिकदम्बकम् ॥ (४३।०)

तत्संबोधश् चिदानन्दघनस्वात्मानुसंहितिः ॥ (४४।०)

अथेदृङ्मातृकाचक्रसम्बोधोद्बोधितात्मनः ॥ (४५।०)