भावनीयानि युक्तेन साधकेनेति शिष्यते ॥ (१।०)

प्राणादिवाहिनाडीनां संहारः प्राणसंयमात् ॥ (२।०)

रेचकादिक्रमोत्पादाद् उदानदहनात्मनि ॥ (३।०)

मध्यनाड्यां विलीनत्वापादनं तन्मयत्वतः ॥ (४।०)

भूतानां भूजलादीनां जयो यः स उदीर्यते ॥ (५।०)

वायवी धारणाङ्गुष्ठे आग्नेयी नाभिमध्यतः ॥ (६।०)

माहेयी कण्ठदेशे तु वारुणी घण्टिकाश्रिता ॥ (७।०)

आकाशधारणा मूर्ध्नि सर्वसिद्धिकरी स्मृता ॥ (८।०)

इति स्वच्छन्दशास्त्रोक्तधारणाभिर् वशीकृतिः ॥ (९।०)

भूतेभ्यः किल कैवल्यं चित्तप्रत्याहृतिस् ततः ॥ (१०।०)

पृथक्त्वं तदनालिप्तस्वच्छस्वात्मैकरूपता ॥ (११।०)

भूतसंधान इत्यादिसूत्रोक्तं यत् फलं पुरा ॥ (१२।०)

अप्रयत्नेन साध्यं तच्छाम्भवोपायशालिनः ॥ (१३।०)

आणवोपायसाध्यं तु यत्नेनेति विशिष्यते ॥ (१४।०)

इत्य् एवं देहशुद्ध्याद्यैः समाध्यन्तैश् च या भवेत् ॥ (१५।०)

सिद्धिः सा मोहवरणान् नात्मज्ञानाद् इतीर्यते ॥ (१६।०)