त्रिपदं जागरास्वप्नसौषुप्तानाम् अनुक्रमात् ॥ (१।०)

प्रत्येकम् आदिमध्यान्तरूपं भङ्ग्या निरूपितम् ॥ (२।०)

भावौन्मुख्यतदासक्तितदेकीकरणात्मकम् ॥ (३।०)

सृष्टिस्थितिलयाकारं तुर्येणैव तदादिना ॥ (४।०)

तत्त्रयान्तश् चमत्काररसानन्दघनात्मना ॥ (५।०)

माययाच्छादितेनापि तिरोधानस्वरूपया ॥ (६।०)

तत्तद्विषयभोगेषु विद्युद्वत्स्फुरता क्षणम् ॥ (७।०)

अनुप्राणनम् आदध्याद् अवधानेन साधकः ॥ (८।०)

तेनैव जीवितेनापि जीवितस्य निजात्मनः ॥ (९।०)

सम्यगुत्तेजनं कुर्याद् येनासौ तन्मयो भवेत् ॥ (१०।०)

तुर्यानुप्राणनं प्रोक्तं जागरादौ पुरा त्रिषु ॥ (११।०)

चतुर्थम् इति सूत्रेण त्रिपदेत्यादिनामुना ॥ (१२।०)

जागराद्यादिमध्यान्तपर्वस्व् इति विशिष्यते ॥ (१३।०)

अन्तर्मुखस्वरूपायाम् अवस्थायां न केवलम् ॥ (१४।०)

त्रिपदादिप्राणनम् इत्य् एतद् उक्तम् अथापि तु ॥ (१५।०)