त्रिष्व् इति प्रोक्तरूपेषु जागरादिषु तैलवत् ॥ (१।०)

चतुर्थम् इति पूर्वोक्तं शुद्धविद्याप्रथात्मकम् ॥ (२।०)

तुर्यं धाम सदासेच्यं यथा स्यात् तन्मयं त्रयम् ॥ (३।०)

यथा तैलं क्रमात् स्वीयम् आश्रयं व्याप्नुयात् तथा ॥ (४।०)

आद्यन्तकोट्योः स्फुरता जागरादेः परिस्फुटम् ॥ (५।०)

तुर्यानन्दरसेनार्द्रीकुर्यान् मध्यदशाम् अपि ॥ (६।०)

जाग्रद् इत्यादिसूत्रेण पूर्वम् उद्यमवत्तया ॥ (७।०)

शक्तिचक्रानुसंधानशालिनः परयोगिनः ॥ (८।०)

स्वरसप्रसरज्जाग्रत्स्वप्नसौषुप्तभूमिषु ॥ (९।०)

उदीरितः स्वतोनिर्यत्तुर्यप्रसरसम्भवः ॥ (१०।०)

त्रितयेत्यादिसूत्रेण शाम्भवोपायसाधितात् ॥ (११।०)

हठपाकक्रमाज् जाग्रत्स्वप्नसौषुप्तसंहृतिः ॥ (१२।०)

दर्शितानेन सूत्रेण त्व् आणवोपाययुक्तितः ॥ (१३।०)

दलकल्पतयास्थायि जाग्रदादिपदत्रयम् ॥ (१४।०)

सिञ्चेत् तुर्यरसेनेति विशेषः समुदीरितः ॥ (१५।०)

अत्रोपायं पुनश् चाह तुर्यामृतनिषेचने ॥ (१६।०)