अपूर्णम् अन्यतारूपं भिन्नवेद्यप्रथात्मकम् ॥ (१।०)

शुभाशुभात्मकाशेषकर्मसंस्कारविग्रहम् ॥ (२।०)

त्रिविधं मलम् उक्तं यत् तद् एव ज्ञानम् उच्यते ॥ (३।०)

न सो ऽस्ति प्रत्ययो लोके यः शब्दानुगमाद् ऋते ॥ (४।०)

अनुविद्धम् इव ज्ञानं सर्वं शब्देन गम्यते ॥ (५।०)

इत्य् उक्तनीत्या ज्ञानस्य विविधस्यास्य मातृका ॥ (६।०)

अकारादिक्षकारान्तपञ्चाशद्वर्णविग्रहा ॥ (७।०)

शिवादिक्षितिपर्यन्ततत्त्वग्रामप्रसूतिभूः ॥ (८।०)

करन्ध्रचितिमध्यस्था ब्रह्मपाशावलम्बिकाः ॥ (९।०)

पीठेश्वर्यो महाघोरा मोहयन्ति मुहुर्मुहुः ॥ (१०।०)

इति श्रीतिमिरोद्घाटप्रोक्तनीत्यनुसारतः ॥ (११।०)

स्वरादिवर्गाधिष्ठातृमातृचक्रपरिष्कृता ॥ (१२।०)

अपूर्णो ऽहम् अहं पूर्णो ऽहं कृशो ऽहं कृशेतरः ॥ (१३।०)

इति शब्दानुवेधेन शोकहर्षादिकारिका ॥ (१४।०)

अधिष्ठानम् अधिष्ठात्री तदधिष्ठानतो नृणाम् ॥ (१५।०)

अलब्धान्तर्मुखस्वात्मविश्रान्तीनि निरन्तरम् ॥ (१६।०)

बहिर्मुखानि ज्ञानानि कथ्यन्ते बन्धहेतवः ॥ (१७।०)

अथेदृग्बन्धसम्बन्धप्रशमोपाय उच्यते ॥ (१८।०)

परमोपेयविश्रान्तिसतत्त्वः परमेष्ठिना ॥ (१९।०)