प्राणे परिणता संवित् प्राग् इति प्रोक्तया दिशा ॥ (१।०)

निसर्गात् सहजात् स्वस्य स्वातन्त्र्याद् अनिवारितात् ॥ (२।०)

चञ्चत्प्रपञ्चवैचित्र्यप्रकर्षकरणेच्छया ॥ (३।०)

संकोचं परिगृह्णाना संविद् भगवती स्वयम् ॥ (४।०)

प्राप्नोति संकुचत्तत्तत्प्राणग्राहकभूमिकाः ॥ (५।०)

उक्तम् अर्थं दृढीकर्तुं संवादः सो ऽयम् अत्र तु ॥ (६।०)

या सा शक्तिः परा सूक्ष्मा व्यापिनी निर्मला शिवा ॥ (७।०)

शक्तिचक्रस्य जननी परानन्दामृतात्मिका ॥ (८।०)

महाघोरेश्वरी चण्डा सृष्टिसंहारकारिका ॥ (९।०)

त्रिवहं त्रिविधं त्रिष्ठं बलात् कालं प्रकर्षति ॥ (१०।०)

इति वाजसनेयायाम् इयम् एव चितिः परा ॥ (११।०)

स्वातन्त्र्येणावरुह्य प्राक् प्राणरूपे प्रमातरि ॥ (१२।०)

चन्द्रभास्करवह्न्यात्मनाडीत्रितयवाहिनम् ॥ (१३।०)

अन्तर्बहिर्विशन्निर्यन्निश्वासोच्छ्वासलक्षणम् ॥ (१४।०)

अतीतवर्तमानादित्रिविधं कालम् आत्मनि ॥ (१५।०)

कर्षन्त्य् अन्तर् बहिश् चेति कथ्यते कालकर्षिणी ॥ (१६।०)

ततो नैसर्गिकस् तस्याः प्राणसम्बन्ध आगतः ॥ (१७।०)

स्थिते ऽपि प्राणसम्बन्धे यस् तदारूढ आन्तरीम् ॥ (१८।०)

संविदं विमृशन्न् आस्ते स लोकोत्तरतां व्रजेत् ॥ (१९।०)

इत्य् उपायोपसंहारमुखेनाह महेश्वरः ॥ (२०।०)