योगसिद्धिदकुटीनिर्माणविधिःश्रीभैरवी । (१।१)

कुटी प्रोक्ता त्वया पूर्वं कथं कार्या च कीदृशी । (१।२)

तत्र कालं कियच्छंभो वस्तव्यं ब्रूहि मे प्रभो ॥ (१।३)

श्रीभैरवः । (२।१)

वक्ष्यामि तां कुटीं सम्यक् शृणु त्रिपुरसुन्दरि । (२।२)

मेदिनीम् उन्नतीकृत्य पुनस्तां सुहृदं प्रिये ॥ (२।३)

स्तंभांश्च क्रमशः षट् षट् पङ्क्तिशः स्थापयेदृजून् । (३।१)

तुला उपरि चारोप्य दारूणि सुदृढानि च ॥ (३।२)

स्थापयेदिष्टकाः पश्चात्सुधया सान्द्रमालिपेत् । (४।१)

परितो वलभिं कृत्वा भित्तिं त्रिवलयां शुभाम् ॥ (४।२)

कुर्यात्कुटीं च तन्मध्ये तृतीयावरणैः पुनः । (५।१)

निखनेच्चतुरश्रं च दशप्रादेशमात्रकम् ॥ (५।२)

पञ्चप्रादेशमात्रे च त्वधोनिम्नं तथोर्ध्वतः । (६।१)

एवं दशवितस्त्याभिर् अचिन्त्यां तां मनोहराम् ॥ (६।२)

प्राग्द्वारं बाह्यवलये द्वितीये वलये शिवे । (७।१)

याम्यद्वारं तृतीये तु प्रत्यग्द्वारं विधीयते ॥ (७।२)

द्वाराणां च प्रमाणं हि वितस्तिद्वयमुच्यते । (८।१)

सकवाटं प्रतिद्वारमच्छिद्रं चार्गलान्वितम् ॥ (८।२)

सुधाप्रलेपितं कुर्याद्भित्तिं श्लक्ष्णतरं स्थलम् । (९।१)

दक्षिणे चोत्तरे चैव कुट्यन्तर्वेदिकाद्वयम् ॥ (९।२)

सार्धत्रयं वितस्तीनां विशालं चायतं दश । (१०।१)

प्रादेशमात्रम् उत्सेधं मध्यं प्रादेशिकत्रयम् ॥ (१०।२)

तत्र गोमयसम्भूतं भस्म वस्त्रेण गालितम् । (११।१)

पूरयेच्च कुटीभित्तौ चित्रं बहु सुविस्तरम् ॥ (११।२)

भैरवं कालमेघाभं ज्वलदूर्ध्वशिरोरुहम् । (१२।१)

फालाक्षं वक्रदंष्ट्रं च नागकुण्डलमण्डितम् ॥ (१२।२)

नागयज्ञोपवीतं च किङ्किणीमुण्डमालिनम् । (१३।१)

दिगम्बरं तु काकोटीभूषिताङ्घ्रिशिरोरुहम् ॥ (१३।२)

हारकेयूरकटकमुद्रिकादिविभूषितम् । (१४।१)

दशहस्तं च डमरुमङ्कुशं खड्गशूलकम् ॥ (१४।२)

वरदं सव्यहस्ताब्जैर् नागं पाशं च घण्टिकाम् । (१५।१)

मधुपत्रं भयहरं बिभ्राणं वामबाहुभिः ॥ (१५।२)

कृष्णाङ्गरागमालाढ्यं सर्वव्याधिविनाशनम् । (१६।१)

व्याधिभूताहिशत्रुघ्नं क्ष्वेलादिभयनाशनम् ॥ (१६।२)

ततो मृत्युञ्जयं शान्तं वटुकं विलिखेत्प्रिये । (१७।१)

पारदेन्दुहिमश्वेतं बालं द्विभुजशोभितम् ॥ (१७।२)

किङ्किणीमालया बद्धकर्णनूपुरशोभितम् । (१८।१)

बालं कुण्डलसच्छोभं त्रिनेत्रं नग्नरूपिणम् ॥ (१८।२)

श्वेतमाल्यानुलेपं च पूर्णपात्रं च वामतः । (१९।१)

दण्डं दक्षिणहस्तेन दधानं मृत्युनाशनम् ॥ (१९।२)

मायाबीजं च वटुकं ह्येनं प्रथममुच्चरेत् । (२०।१)

आपदुद्धारणायेति लिखेत्पञ्चाक्षरद्वयम् ॥ (२०।२)

वटुकायेति मायां च वटुकस्य मनुः स्मृतः । (२१।१)

मूर्तिद्वयोरयं मन्त्रः कथितः सुरवन्दिते ॥ (२१।२)

मन्त्रस्यास्य च यद्यन्त्रं तद्यन्त्रं तत्र संलिखेत् । (२२।१)

रमां च भुवनेशीं च कामं चिन्तामणिं क्रमात् ॥ (२२।२)

कर्णिकायां लिखेत्पूर्वं वटुकायेति वीप्सितम् । (२३।१)

अष्टपत्रे लिखेच्छेषाण्यक्षराण्यष्टपत्रके ॥ (२३।२)

बहिः षोडशपत्रेषु विलिखेत्षोडश स्वरान् । (२४।१)

द्वात्रिंशद्दलके कादिसान्तद्वात्रिंशदक्षरान् ॥ (२४।२)

अन्ये दले हलक्षांश्च विलिखेद्भूपुरं बहिः । (२५।१)

आपदुद्धारणं यन्त्रमपमृत्युनिवारणम् ॥ (२५।२)

रक्षाकरं ग्रहार्तानां सर्वेषां प्राणिनामपि । (२६।१)

स्त्रीवश्यं राजवश्यं च पुंवश्यं पशुवश्यकम् ॥ (२६।२)

नानासिद्धिप्रदं नित्यं सर्वरोगविषापहम् । (२७।१)

हारकेयूररुचिरं कान्त्या विश्वविमोहनम् ॥ (२७।२)

महामृत्युञ्जयं देवं भावयेन्मृत्युजिद्भवेत् । (२८।१)

एवं द्वितीयवर्गस्य तृतीयं पञ्चमेन च ॥ (२८।२)

स्वरेण बिन्दुना युक्तं सोन्तं साध्यपदं ततः । (२९।१)

रक्षशब्दयुगं पश्चात्पूर्वं बीजत्रयं पुनः ॥ (२९।२)

प्रतिलोमं समुच्चार्य मन्त्रं मृत्युञ्जयं जपेत् । (३०।१)

तारं मध्ये ससाध्याख्यं दिग्दले भं समालिखेत् ॥ (३०।२)

आग्नेयादिदलेष्वन्त्यमक्षरं क्रमशो लिखेत् । (३१।१)

बाह्ये भूपुरमालिख्य दिक्षु सान्द्रं समालिखेत् ॥ (३१।२)

चतुष्कोणे ठकारं च यन्त्रं मृत्युञ्जयात्मकम् । (३२।१)

अपमृत्युज्वरव्याधिक्ष्वेलमोहविनाशनम् ॥ (३२।२)

तत्र चिन्तामणिं देवं चिन्तितार्थप्रदं लिखेत् । (३३।१)

नीलप्रवालरुचिरं त्रिणेत्रं रुचिराननम् ॥ (३३।२)

पाशारुणोत्पलं वामे दक्षे शूलकपालकौ । (३४।१)

दधानम् इन्दुमकुटं ध्यायेदर्धाम्बिकेश्वरम् ॥ (३४।२)

वह्निप्रथमवर्गादिषमरेफाः क्रमात्ततः । (३५।१)

प्राणसद्यान्तसहितः षष्ठस्वरसबिन्दुकः ॥ (३५।२)

इदं चिन्तामणेर् मन्त्रं चिन्तितार्थप्रदं शुभम् । (३६।१)

षोडशस्वरसंवीतं चिन्तामणिमभीष्टदम् ॥ (३६।२)

ठकारावेष्टितं कुर्याज्ज्वरापस्मृतिमृत्युहम् । (३७।१)

ततश्च शारदादेवीम् आलिखेत् सिद्धिदायिनीम् ॥ (३७।२)

शङ्खकुन्देन्दुधवलां मकुटेन्दुकलाधराम् । (३८।१)

सुधाकुम्भं वराक्षस्रक्संविन्मुद्रां करांबुजैः ॥ (३८।२)

बिभ्राणां श्वेतवसनां मौक्तिकाभरणोज्ज्वलाम् । (३९।१)

वाग्बीजं भुवनेशीं च वदवाक्यद्वयं ततः ॥ (३९।२)

वाग्वादिनीं ससम्बुद्धिम् अग्निपत्नीं समुच्चरेत् । (४०।१)

एष श्रीमातृकामन्त्रः प्रोक्तः सारस्वतप्रदः ॥ (४०।२)

आदिबीजद्वयं हित्वा शेषं पूर्ववद् उच्चरेत् । (४१।१)

दशार्णशारदामन्त्रो वाग्विलासप्रदायकः ॥ (४१।२)

वियद्वर्णसुकारं च सद्यान्तं सविसर्गकम् । (४२।१)

कर्णिकायां लिखेत्पूर्वं किञ्जल्केषु स्वरानपि ॥ (४२।२)

अष्टच्छदेष्व् अष्टवर्गान्य् अशहाद्यैः परैस्त्रिभिः । (४३।१)

काद्यैश्च पञ्चभिर्वर्णैरष्टवर्गाः समीरिताः ॥ (४३।२)

लिखेद्भूपुरकोणेषु ठकारान्दिक्षु विन्यसेत् । (४४।१)

इदं हि मातृकायन्त्रं विषमृत्युगदापहम् ॥ (४४।२)

अघोरं विलिखेद्देवि नीलजीमूतसन्निभम् । (४५।१)

क्रूरदंष्ट्रं त्रिणेत्रं च नागेन्द्राष्टविभूषितम् ॥ (४५।२)

रक्ताङ्गरागवसनं रक्तमालाविराजितम् । (४६।१)

परश्वथुं च डमरुं खड्गं खेटम् इषुं धनुः ॥ (४६।२)

त्रिशूलं पूर्णपात्रं च बिभ्राणं चाष्टबाहुभिः । (४७।१)

भुवनेशीं स्फुरद्वन्द्वं ततः प्रस्फुरवीप्सितम् ॥ (४७।२)

घोरं ततोऽघोरतरं तनुरूपं चटद्वयम् । (४८।१)

प्रकटद्विगुणं चैव कहशब्दयुगं ततः ॥ (४८।२)

वमशब्दद्वयं देवि बन्धशब्दं च वीप्सितम् । (४९।१)

घातयद्वितयं देवि कवचं च फडन्तकम् ॥ (४९।२)

एकोत्तरोऽयं पञ्चाशदर्णो ऽघोरः स्मृतो मनुः । (५०।१)

वश्यार्थं तप्तहेमाभं पूर्वोक्ताकृतिसंयुतम् ॥ (५०।२)

मुक्तौ मृत्युञ्जयार्थे तु श्वेतं पूर्वोक्तविग्रहम् । (५१।१)

सर्वार्थसिद्धिदं शान्तमघोरास्त्रं लिखेत्प्रिये ॥ (५१।२)

मायाबीजं ससाध्यं स्यान्मध्ये च स्वरसंयुतम् । (५२।१)

तद्बहिःकेसरेष्वेवं विलिखेदष्टवर्गकम् ॥ (५२।२)

ततस्त्वष्टदले मन्त्रवर्णान्गुणमितान् लिखेत् । (५३।१)

अग्रशेषेषु तद्वत् तत्षट्कोणे कवचास्त्रकौ ॥ (५३।२)

तद्बहिर्भूपुरं लेख्यम् एनदाघोरयन्त्रकम् । (५४।१)

स्फुरद्वयावृतं मध्ये शक्तिबीजं लिखेत्ततः ॥ (५४।२)

षट्कोणे प्रस्फुरयुगं ततश्चाष्टदले क्रमात् । (५५।१)

षड्भिश्चतुर्भिर्वेदैश्च रसैर्वस्त्रैश्च गोपदैः ॥ (५५।२)

ऋतुभिः शिष्टमन्त्रार्णैर् अमीभिर् विलिखेत्ततः । (५६।१)

षट्कोणे वह्निचास्त्राभ्याम् उद्धृतं वीतकोणकम् ॥ (५६।२)

भूपुरेणावृतं यन्त्रमघोरं विलिखेत्प्रिये । (५७।१)

व्यालारिचोरक्षुद्रापस्मारभूतग्रहापहम् ॥ (५७।२)

अथो महागणपतिं लिखेद्विद्रुमसन्निभम् । (५८।१)

कोटीरचन्द्रशकलं गजास्यं लोचनत्रयम् ॥ (५८।२)

तुन्दिलं रक्तवसनं रक्तमालानुलेपनम् । (५९।१)

दशदोर्दण्डसुभगं वामोरुस्थितयोषितम् ॥ (५९।२)

हारकेयूरकटकमुद्रिकाकुण्डलोज्ज्वलम् । (६०।१)

फलपूरं गदाम् इक्षुकोदण्डं च त्रिशूलकम् ॥ (६०।२)

चक्रं सरसिजं पाशमुत्पलं शालिमञ्जरीम् । (६१।१)

स्वदन्ततुण्डया रत्नकलशं दशभिः करैः ॥ (६१।२)

बिभ्राणं पद्मकरया वामोरुस्थितया श्रिया । (६२।१)

आलिङ्गितं भक्तलोकचिन्तितार्थसुरद्रुमम् ॥ (६२।२)

प्रणवं कमलां मायां कामराजं वसुंधराम् । (६३।१)

क्रमाद्गणपतेर्बीजं महागणपतिं ततः ॥ (६३।२)

चतुर्थ्यन्तं ससंबुद्धिं वरं च वरदं तथा । (६४।१)

ततः सर्वजनं मे च वशमानय शब्दकम् ॥ (६४।२)

अग्निपत्नीं समालिख्य चाष्टाविंशतिवर्णकम् । (६५।१)

मन्त्रं महागणपतेर् मृत्युदारिद्र्यनाशनम् ॥ (६५।२)

त्रिकोणे बीजमालिख्य सतारे च गणेशितुः । (६६।१)

दिक्षु श्रीशक्तिमदनभूबीजानि बहिर्लिखेत् ॥ (६६।२)

षट्कोणे बीजषट्कं च तत्संधिष्वङ्गमन्त्रकम् । (६७।१)

ततोऽष्टदलमध्येषु मन्त्राणि गणशो लिखेत् ॥ (६७।२)

अन्त्याक्षरे चान्त्यदले मातृकामनुलोमतः । (६८।१)

लेखे च प्रतिलोमेनाङ्कुशपाशावृतं ततः ॥ (६८।२)

भूमन्दिरेण सुभगं यन्त्रं गणपतेः शुभम् । (६९।१)

गजान्तं श्रीपदं दिव्यमायुष्यारोग्यवर्धनम् ॥ (६९।२)

एतानि यन्त्रजालानि कुट्यन्तर्देवता लिखेत् । (७०।१)

कुटीभित्तिबहिर्भागे भैरवं वर्णमालिखेत् ॥ (७०।२)

असिताङ्गं रुरुं चण्डं क्रोधमुन्मत्तभैरवम् । (७१।१)

कपालिनं भीषणं च संहारं भैरवं क्रमात् ॥ (७१।२)

द्वितीयावरणस्यान्तर् भित्तावेकादश क्रमात् । (७२।१)

रुद्रांस् त्रिलोचनांश् चन्द्रकलाजूटजटान् लिखेत् ॥ (७२।२)

तद्बाह्ये नव नाथांश्च नव सिद्धांश्च षोडश । (७३।१)

सनत्कुमारसनकसनन्दादीन् लिखेत्ततः ॥ (७३।२)

तृतीयावरणस्यान्तर् भित्तौ ब्राह्म्यादिमातरः । (७४।१)

चतुःषष्टिश्च योगिन्यो लेखनीया यथाविधि ॥ (७४।२)

तद्भित्तिबाह्ये देवेन्द्रमुखा दिक्पतयः क्रमात् । (७५।१)

ग्रहाश्च चन्द्रसूर्याद्या अश्विन्याद्याश्च तारकाः ॥ (७५।२)

मेषाद्या राशयो लेख्याः सालङ्काराश्च सायुधाः । (७६।१)

कुटीद्वारविपार्श्वे च गणेशं भैरवं लिखेत् ॥ (७६।२)

द्वितीयावरणद्वारपार्श्वे द्वौ शङ्खपद्मकौ । (७७।१)

गरुत्मन्तं हनूमन्तं तृतीयावरणस्य च ॥ (७७।२)

द्वारस्य पार्श्वयोर्देवि विलिखेद्भयभञ्जनौ । (७८।१)

यस्मिन्देशे कुटी दिव्या कल्पिता योगिसत्तमैः ॥ (७८।२)

देशो धन्यतरः श्लाघ्यः पुण्यक्षेत्रं च पावनम् । (७९।१)

तत्रत्याश्च प्रजा धन्याः स्फीतार्थाः पुण्यकर्मिणः ॥ (७९।२)

राष्ट्रं सुभिक्षम् आरोग्यम् अनामयसुखावहम् । (८०।१)

ईतिहीनं कालवृष्टिसहितं धान्यसङ्कुलम् ॥ (८०।२)

तस्करोपद्रवव्याघ्रसर्पादिभयवर्जितम् । (८१।१)

तत्र तीर्थानि सर्वाणि गङ्गादीनि वसन्ति च ॥ (८१।२)

इन्द्रादयोऽपि विबुधाः सूर्यचन्द्रादयो ग्रहाः । (८२।१)

योगिन्यो भैरवाः सिद्धा गणेशगुहमातरः ॥ (८२।२)

तत्रस्थस्य महीपस्य जयार्थावाप्तिरायुषः । (८३।१)

सम्भवेच्चक्रवर्तित्वं पुनर्नित्योत्सवोज्ज्वलम् ॥ (८३।२)

वन्ध्यानां पुत्रसम्पत्तिः कुटीसंदर्शनाद्भवेत् । (८४।१)

कुष्ठापस्मारभूतादिमहाव्याधिविनाशनम् ॥ (८४।२)

कुटीगता भवेयुस्ते ये सेवन्ते रसायनम् । (८५।१)

सिद्धिं यान्ति सुखेनैव देवानामपि दुर्लभाम् ॥ (८५।२)

अमरीकल्पःदेवि चित्रं प्रवक्ष्यामि दिव्यं गुह्यतमं शिवम् । (८६।१)

अमरीकल्पमनघं सुलभं निजदेहजम् ॥ (८६।२)

अणिमाद्यष्टकैश्वर्यदेहलोहादिसिद्धिदम् । (८७।१)

वमनादिविशुद्धाङ्गो लवणाम्लविवर्जितः ॥ (८७।२)

कुटीगतस्तु देवेशि शिवतोयमुदारधीः । (८८।१)

स्थूलस्य कतकस्यैव दारुणा पानपात्रकम् ॥ (८८।२)

कुर्याच्च त्रिफलां पिष्ट्वा लेपयेच्चषकान्तरे । (८९।१)

कर्षं शिवाम्बुना रात्रौ पात्रं चाधोमुखं प्रिये ॥ (८९।२)

स्थापयित्वा पुनः प्रातराद्यन्तं प्रस्रवं त्यजेत् । (९०।१)

मध्यधाराश्च तत्पात्रे क्षिपेत्तत्त्रिफलां ततः ॥ (९०।२)

लोडयेदमरीयुक्तं पिबेत्प्रागाननः सदा । (९१।१)

इष्टदेवान्गुरून्वृद्धान् नत्वार्चितगणेश्वरः ॥ (९१।२)

मिताहारो युक्तचेष्टो वातातपविवर्जितः । (९२।१)

एकमण्डलमात्रेण बाह्यान्तः शुचिभाग् भवेत् ॥ (९२।२)

मण्डलेन द्वितीयेन सर्वकुष्ठविनाशनम् । (९३।१)

मण्डलेन तृतीयेन चतुर्विधविषापहम् ॥ (९३।२)

मण्डलेन चतुर्थेन नालिकेराम्बुवद् भवेत् । (९४।१)

आत्मतोयं पञ्चमेन मलदौर्गन्ध्यनाशनम् ॥ (९४।२)

षष्ठमण्डलयोगेन देहदौर्गन्ध्यनाशनम् । (९५।१)

सप्तमण्डलयोगेन भवेदिन्द्रियपाटवम् ॥ (९५।२)

ततोऽष्टमे मण्डले तु रजनीचूर्णकर्षयुक् । (९६।१)

सेवेत शिवतोयं च यावद्द्विः सप्तमण्डलम् ॥ (९६।२)

वलीपलितहीनः स्यान्महाविषभयोज्झितः । (९७।१)

मण्डले पञ्चदशके कर्षांशौ शृङ्गगन्धकौ ॥ (९७।२)

शिवतोयेन सम्मिश्रं प्रपिबेदेकविंशतिम् । (९८।१)

मण्डलं च तदन्ते स्यात्सिद्धिभाग्देहलोहयोः ॥ (९८।२)

द्वाविंशन्मण्डले देवि चाभ्रकं वरया युतम् । (९९।१)

एवं भजेद्यमी यावदष्टाविंशतिमण्डलम् ॥ (९९।२)

मत्तहस्तिबलोपेतो गृध्रदृष्टिरनामयः । (१००।१)

एकोनत्रिंशति प्राप्ते मण्डले वरया युताम् ॥ (१००।२)

सकान्तचूर्णविमलां गोधामपि पिबेत् प्रिये । (१०१।१)

पञ्चत्रिंशन्मण्डलान्तं वज्रकायो भवेन्नरः ॥ (१०१।२)

षट्त्रिंशन्मण्डलादि स्वर्णधात्रीरजोऽन्वितम् । (१०२।१)

आत्मगोधान्वितं पेयं तत्तु यावद्द्व्यधिकम् ॥ (१०२।२)

चत्वारिंशन्मण्डलान्तं सशरीरः खगो भवेत् । (१०३।१)

त्रिचत्वारिंशन्मण्डले तु प्राप्ते पारदसंयुतम् ॥ (१०३।२)

वरायुतं पिबेद् ऊनपञ्चाशन्मण्डलावधिः । (१०४।१)

अणिमादिगुणोपेतो वज्रकायश्च खेचरः ॥ (१०४।२)

सिद्धैर् युक्तो निरातङ्को निरपायो निरञ्जनः । (१०५।१)

यदृच्छया सर्वलोके विहरत्येव सर्वदा ॥ (१०५।२)

आरभ्य प्रथमं देवि मण्डलान्नित्यमाचरेत् । (१०६।१)

आत्मतोयेन धुत्तूररसेन परिलोडयेत् ॥ (१०६।२)

भस्म तेनैव सर्वाङ्गमसकृत्परिमर्दयेत् । (१०७।१)

अन्यकालसमायातम् आत्मतोयं विशेषतः ॥ (१०७।२)

मूर्ध्नि नासापुटे कर्णे दृशि पादकरद्वये । (१०८।१)

शीलयेत्सततं देवि शुद्धदेहो भवेन्नरः ॥ (१०८।२)

कदाचिदप्यात्मगोधां भूमौ न विसृजेत्प्रिये । (१०९।१)

अमरीसेविनः पुंसः शिवतोयेन जायते ॥ (१०९।२)

सर्वलोहं च कनकं दिव्यं मनुजदुर्लभम् । (११०।१)

विजयासहितां गोधां प्रतिवासरमापिबेत् ॥ (११०।२)