देहवेधक्रमःप्रणम्य शिरसा शम्भुं पप्रच्छ गिरिजात्मजा । (१।१)

श्रीभैरवी । (१।२)

देहवेधस्त्वया पूर्वं संक्षेपात् कथितः प्रभो ॥ (१।३)

तं देहवेधम् आचक्ष्व सम्यक् जानाम्यहं यथा । (२।१)

श्रीभैरवः । (२।२)

देवि प्रवक्ष्यामि देवानामपि दुर्लभम् ॥ (२।३)

योगिनां भोगयुक्तानां देहवेधं सुरेश्वरि । (३।१)

पाचनादि प्रकुर्वीत पञ्चकर्मविधानतः ॥ (३।२)

पञ्चकर्माणि; १। पाचनम्लवणादिसमुत्क्लिष्टान् दोषान् संशोधयेत् क्रमात् । (४।१)

ततो जीर्णरसं चाद्यात् क्रमाद् एवं सुरेश्वरि ॥ (४।२)

लघ्वाहारो दिवा भूत्वा क्षुद्राधान्याकनागरम् । (५।१)

एतत्त्रयं पलोन्मेयम् उदकेष्ववलोडयेत् ॥ (५।२)

अष्टावशिष्टं संक्वाथ्य प्रतिरात्रं पिबेत्त्र्यहम् । (६।१)

अनन्तरं वराक्वाथं पूर्ववत् त्रिदिनं पिबेत् ॥ (६।२)

इति पाचनम् आतन्याद् अथ स्नेहनम् आचरेत् । (७।१)

२। स्नेहनम्घृतौदनं छागरसं दिवा भुञ्जीत मात्रया ॥ (७।२)

आज्यान्नं वा मुद्गरसं लघ्वाशी स्याद्दिने सुधीः । (८।१)

रात्रौ पिबेद्घृतं गव्यं सैन्धवेन समन्वितम् ॥ (८।२)

निष्कमेकं सैन्धवं च घृतं निष्कचतुष्टयम् । (९।१)

भृङ्गामलकतैलेन सर्वाङ्गम् अभिषेचयेत् ॥ (९।२)

एवं सप्तदिनं कुर्यात् स्नेहनं परमं हितम् । (१०।१)

३। स्वेदनम्मत्स्यमांसं माषतिलयवजामलसक्तवः ॥ (१०।२)

सर्वम् एतद् भवेत् प्रस्थम् एकाष्ठीलागरूबला । (११।१)

रास्ना व्याघ्री घनापत्रं कौशिकातिविषा निशा ॥ (११।२)

सर्वमेतद्द्वयपलं तक्रक्षीराम्बुकांजिकम् । (१२।१)

द्व्याढके निक्षिपेत् सर्वं मृत्पात्रे क्वाथयेत् सुधीः ॥ (१२।२)

कुर्यात् तस्योष्मणा गात्रं स्विन्नं द्विघटिकावधि । (१३।१)

एवं सप्तदिनं कुर्यात् स्वेदनं परमं हितम् ॥ (१३।२)

४ वमनम्मदनस्य फलं चैकं पाठा षोडशिकं जलम् । (१४।१)

पादावशिष्टं संक्वाथ्य तज्जले वस्त्रशोधिते ॥ (१४।२)

पिप्पलीन्द्रयवा यष्टिलवणं कर्षमात्रकम् । (१५।१)

निक्षिपेच्च पिबेत् प्रातर् वान्तिः स्यात् सर्वरोगहा ॥ (१५।२)

५। विरेचनम्सूतटङ्कणगन्धाश्म त्रिकटुं त्रिफलां समम् । (१६।१)

एतैः समं तु जेपालं श्लक्ष्णं तत् परिमर्दयेत् ॥ (१६।२)

गुञ्जाद्वितयमात्रं तु गुडेन सह भक्षयेत् । (१७।१)

विरेचनम् इति प्रोक्तं सर्वव्याधिविनाशनम् ॥ (१७।२)

पञ्चकर्मेति कथितं क्रमात् कुर्याद् विरेचने । (१८।१)

दोषशोधकयोगाःकेतकीस्तनजम्बीरं प्रत्यहं कुडुवं पिबेत् ॥ (१८।२)

सप्तवासरपर्यन्तं प्रातर् लवणदोषहृत् । (१९।१)

सलिले षोडशपले त्रिफलैकपलं क्षिपेत् ॥ (१९।२)

क्वाथयेत् पादशेषं तत् तस्मिन् शीते मधोः पलम् । (२०।१)

पिबेत् प्रभाते त्रिदिनं क्षारदोषहरं परम् ॥ (२०।२)

विडङ्गं सवचाकुष्ठं केतकीस्तनसंयुतम् । (२१।१)

क्वथितं त्रिदिनं पीतमम्लदोषहरं पिबेत् ॥ (२१।२)

अथवा तिन्त्रिणीक्षारसलिलं पलमात्रकम् । (२२।१)

यवक्षारसिताकर्षं संयोज्य त्रिदिनं पिबेत् ॥ (२२।२)

अम्लदोषविनाशो ऽयं कथितश्च रसायने । (२३।१)

वचाबिडालपालाशबीजजन्तुघ्नकर्षकम् ॥ (२३।२)

कर्षं गुडं च तत् सर्वं भक्षयेद् उष्णवारि च । (२४।१)

पिबेत् प्रातस्त्रिदिवसं भवेत् तत् क्रिमिपातनम् ॥ (२४।२)

श्यामावह्निविडङ्गानि वाशा त्र्यूषं फलत्रयम् । (२५।१)

सैन्धवं देवदारुं च मुस्ता चैतत्समं समम् ॥ (२५।२)

घृतैः कर्षं लिहेत् प्रातः सप्ताहात् सर्वरोगजित् । (२६।१)

एवं कृत्वा देहशुद्धिं शाल्यन्नं क्षीरभोजनम् ॥ (२६।२)

सम्यग्जातबलो भूत्वा ततः कुर्याद् रसायनम् । (२७।१)

रसायनोपयोगःक्षीराज्यामलकरसक्षौद्रैः सुरतरूद्भवम् ॥ (२७।२)

तैलं निर्मथ्य तत्सर्वं द्विपलं प्रत्यहं पिबेत् । (२८।१)

मासेन कान्तिर्मेधा च भवत्येव न संशयः ॥ (२८।२)

द्वितीयमासि पूर्वोक्तं तत् पिबेत् तच्चतुःपलम् । (२९।१)

तेन शाम्यन्ति दोषाश्च विकारा नेत्रसम्भवाः ॥ (२९।२)

पुनस्तृतीये मासे तु सेव्यं षट्पलमात्रकम् । (३०।१)

तेनामरवपुर् भूयान्महातेजा भवेद् ध्रुवम् ॥ (३०।२)

आरोटरससेवाक्रमःअथारोटरसः सेव्यः क्रमेण परमेश्वरि । (३१।१)

अयःशुल्बाभ्रताप्येभ्यः पातितो मारितः क्रमात् ॥ (३१।२)

अयमारोटकरसो देहसिद्धिकरः परः । (३२।१)

स्वेदनाद्यैश्च संस्कारैः सप्तभिः संस्कृतो रसः ॥ (३२।२)

मूर्छितो रञ्जितो देवि सूतस् त्वारोटकः स्मृतः । (३३।१)

रसायने रोगशान्त्यां श्रेष्ठः सर्वगुणप्रदः ॥ (३३।२)

कान्ताभ्रसत्वारोटाश्च समं गुञ्जाद्वयोन्मितम् । (३४।१)

मध्वाज्यत्रिफलाभिश्च मासमेकं भजेदिति ॥ (३४।२)

एवं क्रमेण संसेव्यं द्वित्रिवेदेषुषट्क्रमात् । (३५।१)

एवं षोडशमासान्तं गुञ्जाषोडशमात्रकम् ॥ (३५।२)

आरोटकरसे चेत्थं कुर्यान्मत्प्राणवल्लभे । (३६।१)

वलीपलितनिर्मुक्तो जीवेच्च शरदः शतम् ॥ (३६।२)

आरोटरसःकान्तसत्त्वाभ्रसत्त्वं च स्वर्णजीर्णरसस्तथा । (३७।१)

सर्वमेतत् समीकृत्य भजेद् आरोटकं तथा ॥ (३७।२)

क्षेत्रीकरणमेतद्धि सहस्रायुष्यकारकम् । (३८।१)

अभूमौ योजितः सूतो न प्ररोहति कुत्रचित् ॥ (३८।२)

तस्मात्क्षेत्रमकृत्वैव योजयेद् यस्तु सूतकम् । (३९।१)

न प्ररोहेदस्य शुभं बीजम् इवोषरे ॥ (३९।२)

खोटबद्धरससेवाक्रमःपूर्वोक्तखोटबद्धस्य सूतस्य विधिम् उत्तमम् । (४०।१)

क्रामणं च क्रमाद्वक्ष्ये तथा विधिनिषेधनम् ॥ (४०।२)

शृणु पार्वति यत्नेन त्वत्प्रीत्या कथयाम्यहम् । (४१।१)

कान्ताभ्रस्वर्णवज्राणि रसस्य क्रामणं परम् ॥ (४१।२)

क्रामणेन विना सूतो न सिध्येद् देहलोहयोः । (४२।१)

गुञ्जामात्रं खोटबद्धं क्रामणक्षौद्रसंयुतम् ॥ (४२।२)

मासमेकं भजेद् इत्थं पुनर् विधिक्रमेण वै । (४३।१)

मासषोडशपर्यन्तं यथारोटरसस्तथा ॥ (४३।२)

स शतायुष्यम् आप्नोति सर्वरोगविवर्जितः । (४४।१)

पलमात्रोपयोगेन व्याधिभिर् नाभिभूयते ॥ (४४।२)

द्वितीये शुक्रवृद्धिः स्यात् तृतीये बलवान् भवेत् । (४५।१)

चतुर्थे पलितं हन्ति वलिं जयति पञ्चमे ॥ (४५।२)

षष्ठे श्रुतिधरो वाग्मी सप्तमे नेत्ररोगहृत् । (४६।१)

अष्टमे तार्क्ष्यदृष्टिः स्याद् ब्रह्मायुर्ब्रह्मविक्रमः ॥ (४६।२)

उपयुञ्ज्यान्नवपलं सिद्धिमेलापकं भवेत् । (४७।१)

विनियुञ्ज्याद् दशपलं द्वितीयः शङ्करो भवेत् ॥ (४७।२)

सहस्रायुष्यकरं सूतं माषमात्रं भजेन्नरः । (४८।१)

अयुतायुष्करं सूतं यवमात्रं भजेत्प्रिये ॥ (४८।२)

लक्षायुष्यकरं सूतं व्रीहिमात्रं भजेत्सुधीः । (४९।१)

कोट्यां भजेत् सूतं खादयन् मुद्गमात्रकम् ॥ (४९।२)

एतत् सर्वं रसानां तु क्रामणं पूर्ववद् भवेत् । (५०।१)

सहस्रायुःप्रदः सूतो ब्रह्मत्वं विदधाति सः ॥ (५०।२)

अयुतायुष्करः सूतो विष्णुतां प्रददाति च । (५१।१)

लक्षायुष्यकरः सूतो रुद्रत्वम् उपपादयेत् ॥ (५१।२)

कोट्यायुष्यप्रदः सूतः शिवत्वं विदधाति च । (५२।१)

माक्षीकजीर्णसूतस्तु धनदत्वं ददाति वै ॥ (५२।२)

इन्द्रत्वं विमलाजीर्णस्त्वभ्रजीर्णोऽर्कतां ददेत् । (५३।१)

ब्रह्मतां शुल्बजीर्णश्च विष्णुतां तारजारितः ॥ (५३।२)

रुद्रता हेमजीर्णे स्यादीशत्वं वज्रजारिते । (५४।१)

सदाशिवत्वं च ददेत्पारदो द्रुतिजारितः ॥ (५४।२)

सच्चिदानन्दरूपत्वं सूतको बीजजारितः । (५५।१)

सामान्येन तु तीक्ष्णेन रुद्रत्वं प्राप्नुयान्नरः ॥ (५५।२)

एवं यो लोहजीर्णं तु भक्षयेद् भस्मसूतकम् । (५६।१)

जलेन जलरूपी स्यात्स्थलेन स्थलतां व्रजेत् ॥ (५६।२)

तेजस्त्वं तेजसा देवि वायुना वायुरूपभाक् । (५७।१)

कर्ता हर्ता स्वयं साक्षाच्छापानुग्रहकारकः ॥ (५७।२)

यत्र मूत्रपुरीषं तु साधकस्तु परित्यजेत् । (५८।१)

पाषाणं मृण्मयं तत्र स्पृष्टं भवति काञ्चनम् ॥ (५८।२)

प्रस्वेदात् तस्य गात्रस्य लोहान्यष्टौ च वेधयेत् । (५९।१)

तत्सर्वं कनकं दिव्यं भक्षिते द्वादशे पले ॥ (५९।२)

अथवा तारजीर्णं तु भक्षयेद् भस्मसूतकम् । (६०।१)

शुल्बारं वङ्गघोषं च तत्स्वेदात् तारता भवेत् ॥ (६०।२)

अथवा तीक्ष्णजीर्णं तु भक्षयेद् भस्मसूतकम् । (६१।१)

मूत्रेण तस्य स्पृष्टं तु वङ्गं व्रजति तारताम् ॥ (६१।२)

एकैकेन निषेकेन स्तम्भनं नागवङ्गयोः । (६२।१)

गुञ्जामात्रं रसं देवि हेमजीर्णं तु भक्षयेत् ॥ (६२।२)

द्विगुञ्जं तारजीर्णस्य रविजीर्णस्य च त्रयम् । (६३।१)

तीक्ष्णाभ्रकान्तमाषैकं गुंजैका द्वेऽथवा भवेत् ॥ (६३।२)

वज्रवैक्रान्तजीर्णं तु भक्षयेत् सर्षपोन्मितम् । (६४।१)

नागवङ्गवसाकीटविषोपविषसंयुतम् ॥ (६४।२)

मूत्रयुक्तं हठाद् बद्धं त्यजेत् कल्कं रसायने । (६५।१)

हेमतारप्रवेशेन जातो योऽग्निसहः क्रमात् ॥ (६५।२)

बद्धश्च रसराजोऽयं देहसिद्धिप्रदो भवेत् । (६६।१)

वज्रायस्कान्तमाक्षीकवैक्रान्ताभ्रककाञ्चनम् ॥ (६६।२)

एतैर्जीर्णो यथालाभं रसः शस्तो रसायने । (६७।१)

षड् एवोपरसाश्चैव भक्षणार्थं रसायने ॥ (६७।२)

भस्मनस्तीक्ष्णजीर्णस्य पलम् एकं तु भक्षयेत् । (६८।१)

दशवर्षसहस्राणि वज्रकायः स जीवति ॥ (६८।२)

एवं च द्वादशपलं तीक्ष्णजीर्णस्य भक्षयेत् । (६९।१)

एवं जीवन्महाकल्पं प्रलयान्ते शिवं व्रजेत् ॥ (६९।२)

भस्मनः शुल्बजीर्णस्य पलेन ब्राह्ममायुषम् । (७०।१)

द्विपले वैष्णवायुष्यं रुद्रायुस्त्रिपलेन तु ॥ (७०।२)

चतुर्थे तु पले देवि शिवत्वं प्राप्नुयान्नरः । (७१।१)

हेमजीर्णे भस्मसूते त्रिपले भक्षिते क्रमात् ॥ (७१।२)

अष्टाशीतिसहस्राणि योगिन्यो मददर्पिताः । (७२।१)

तस्य तिष्ठन्ति किंकर्यः कामरूपी भवेन्नरः ॥ (७२।२)

यद् यद् भावयते रूपं तत्तद्रूपधरो भवेत् । (७३।१)

यत्र यत्र विलीयन्ते सिद्धिस्तत्रैव लीयते ॥ (७३।२)

मिते पले द्वादशभिर् हेमभस्मनि भक्षिते । (७४।१)

गुंजैकमात्रं देवेशि ज्ञात्वा चाग्निबलं निजम् ॥ (७४।२)

घृतेन मधुना चाद्यात् ताम्बूलं कामिनीं भजेत् । (७५।१)

एको हि दोषः सूक्ष्मोऽपि भक्षिते भस्मसूतके ॥ (७५।२)

त्रिःसप्ताहाद्वरारोहे कामान्धो जायते नरः । (७६।१)

कामिनीनां सहस्रं तु क्षोभयेद् दिवसान्तरे ॥ (७६।२)

नारीसङ्गाद् वरारोहे देहे क्रामति सूतकः । (७७।१)

नारीसङ्गाद् विना देवि ह्यजीर्णं तस्य जीर्यते ॥ (७७।२)

मैथुनाच्चलिते शुक्ले त्रिसप्ताहाद् अधः कृतात् । (७८।१)

जायते प्राणसंदेहस् तावन्मैथुनं त्यजेत् ॥ (७८।२)

युवत्या जल्पनं कार्यं युवत्या चाङ्गमर्दनम् । (७९।१)

यस्याः स्पर्शनमात्रेण रसः क्रामति विग्रहे ॥ (७९।२)

यथा तथा ह्लादयते सुस्त्रीरूपनिरीक्षणम् । (८०।१)

तथा क्रामति देवेशि सूतकोऽसौ ततः क्षणात् ॥ (८०।२)

अश्वत्थसदृशो यस्या आधारश्च समः शुभः । (८१।१)

तादृशस्तु भगो देवि भाजने तु रसायने ॥ (८१।२)

निर्मांसश्चैव दीर्घश्च भगः शुष्कशिरास्तथा । (८२।१)

दुःखदारिद्र्यकर्तारं वर्जयेत्तं रसायने ॥ (८२।२)

पक्षे शुक्ले शुभदिने चन्द्रताराबलान्विते । (८३।१)

सुमुहूर्ते चिन्त्य शिवानलविप्रगुरून्द्विजः ॥ (८३।२)

संतुष्टः सुमना भूत्वा रसं सेवेत सिद्धिदम् । (८४।१)

पयसा हेमशुण्ठीभ्यां नस्यं क्रामणमुत्तमम् ॥ (८४।२)

हेमादि षड्लोहकृतम् अञ्जनं क्रामणं परम् । (८५।१)

रससेवायां पथ्यापथ्यमतः परं प्रवक्ष्यामि रससेवाहिताहितम् ॥ (८५।२)

रक्तशाल्यन्नगोधूमं गव्यं क्षीरं घृतं दधि । (८६।१)

जाङ्गलं पललं मुद्गं शर्करा मधु सैन्धवम् ॥ (८६।२)

हंसोदकं वास्तुकं च मेघनादः पुनर्नवा । (८७।१)

पटोलालाबुकदलीधान्यकेक्षुकदाडिमम् ॥ (८७।२)

नालिकेराम्बु विश्वं च सदा ताम्बूलचर्वणम् । (८८।१)

गन्धसारं कुङ्कुमं च मृगनाभिं विलेपयेत् ॥ (८८।२)

सुरभीणि सुपुष्पाणि मृदुशय्येष्टकामिनीः । (८९।१)

शिवात्मज्ञानकथनं मृदुभाषा सुखासिका ॥ (८९।२)

दिव्याम्बराणि शुद्धानि छाया चाल्पविपर्यटम् । (९०।१)

मृत्युञ्जयजपो हर्षो मन्दहासश्च शुद्धता ॥ (९०।२)

नर्तनालोकनं गीतश्रवणं शिवपूजनम् । (९१।१)

देवाग्निगुरुविप्राणां वन्दनं श्रुतिपालनम् ॥ (९१।२)

समाधिः प्राणिकरुणा सत्यवाक्यं हितं प्रियम् । (९२।१)

वाग्देहमनसा चेष्टा यथा दुःखनिरोधिनी ॥ (९२।२)

एतत्सर्वं रसेन्द्रस्य क्रामणं कथितं प्रिये । (९३।१)

अहितं रससेवायाः कथयामि शृणु प्रिये ॥ (९३।२)

अत्यशनं चातिपानम् अतिनिद्रातिजागरम् । (९४।१)

अकाले भोजनं स्त्रीणामतिसङ्गोऽप्यसङ्गिता ॥ (९४।२)

अस्थानमदहासाश्च हर्षः कोपोऽधिकस्पृहा । (९५।१)

बहुजल्पो जलक्रीडा दुःखम् अत्यन्तचिन्तनम् ॥ (९५।२)

कलिङ्गं कारवेल्लं च कूष्माण्डः कर्कटी तथा । (९६।१)

काकमाची कुलत्थं च कार्कोटी च कुसुम्भिका ॥ (९६।२)

तिलातसीतैलमाषकपोतकमसूरकाः । (९७।१)

तक्रभक्तं च सौवीरं तिक्तकट्वम्ललावणम् ॥ (९७।२)

क्षारं क्षौद्रं पिच्छिलं च पित्तलं च परूषकम् । (९८।१)

माहिषीः क्षीरविकृतीर् विदरं सहकारकम् ॥ (९८।२)

नारङ्गबिल्वलिकुचशिग्रुनैवेद्यभोजनम् । (९९।१)

अग्निस्पर्शनम् अङ्घ्रिभ्यां ताडनं गोद्विजन्मनोः ॥ (९९।२)

कुमारीबालतुरगपश्वादीनां च ताडनम् । (१००।१)

पातकं प्राणिहिंसा च छेदनं भूरुहाम् अपि ॥ (१००।२)

अक्षादिसप्तव्यसनं छायाश्वत्थकपित्थयोः । (१०१।१)

लिङ्गस्त्रीनरखट्वानां तथा द्वीपिविभीतयोः ॥ (१०१।२)

चतुष्पथातिनिर्विक्तस्थाने विण्मूत्रमोचनम् । (१०२।१)

शिवद्विजगुरुस्त्रीणां वीरयोनियतात्मनाम् ॥ (१०२।२)

समयश्रुतिसूतानां नदीतीर्थाम्भसां नृणाम् । (१०३।१)

पलाण्डुहिङ्गुलशुनराजिकाबृहतीद्वयम् ॥ (१०३।२)

सुप्तिर् मद्यासवौ ताम्रचूडश्च जलजामिषम् ॥ (१०४।२)

तीक्ष्णोष्णगुरुविष्टम्भिरूक्षशुष्कामिषं मधु । (१०५।१)

कदलीपत्रकांस्येषु भोजनं घर्मसेवनम् ॥ (१०५।२)

एतानि द्रव्यजालानि निषिद्धानि रसायने । (१०६।१)

अपथ्यजनिता रोगाःसेवेत चेत्प्रमादेन विकृतिर्जायते क्षणात् ॥ (१०६।२)

रसाजीर्णे भवेत्कान्ते शोषो मूर्च्छा भ्रमो ज्वरः । (१०७।१)

क्लमः कम्पः शकृन्मूत्ररोधनं शूलवेपथुः ॥ (१०७।२)

अनिद्रालस्यहिक्का च कासश्वासविजृम्भिकाः । (१०८।१)

अरोचकातिसारश्च लिङ्गस्तम्भो ऽक्षिकुक्षिषु ॥ (१०८।२)

वक्षःकर्णोदराङ्घ्रौ च मेढ्रे शिरसि सन्धिषु । (१०९।१)

दाहोऽङ्गभङ्गसर्वेऽन्ये व्याधयः सम्भवन्ति वै ॥ (१०९।२)

रसाजीर्णप्रशान्त्यर्थं योगोऽयं कथ्यते मया । (११०।१)

राजकोशातकी पुङ्खा गरुडी कारवल्लिका ॥ (११०।२)

कार्कोटी काकमाची च देवदाली पराजिता । (१११।१)

सर्वम् एतच्चैकपलं गोमूत्रे तु चतुष्पले ॥ (१११।२)

क्वाथयेत् पादशेषं तु कार्षिकं स्वच्छसैन्धवम् । (११२।१)

निक्षिपेत् तत् पिबेत् क्वाथं रसाजीर्णे हितंकरम् ॥ (११२।२)

सुखीभवेत् त्रिदिवसे रसस्य क्रामणं भवेत् । (११३।१)

रसो व्यथयते तत्तदङ्गं संपरिमर्दयेत् ॥ (११३।२)

वा स्तनेन च तन्वङ्ग्या निर्व्यथः क्रमते रसः । (११४।१)

सप्तधातुवेधःत्वग्वेधः प्रथमं देवि रक्तवेधो द्वितीयकः ॥ (११४।२)

तृतीयो मांसवेधः स्यान्मेदोवेधश्चतुर्थकः । (११५।१)

अस्थिवेधः पञ्चमः स्यात्षष्ठो मज्जात्मको भवेत् ॥ (११५।२)

सप्तमः शुक्लवेधः स्यात् नाडीवेधस्तथाष्टमः । (११६।१)

नवमश्चक्षुषो वेधो दशमः सर्ववेधकः ॥ (११६।२)

रसवेधेन भुजगः स्वर्णं स्याद् रक्तवेधतः । (११७।१)

त्रपु स्वर्णं भवेन्मांसवेधात् तीक्ष्णं च काञ्चनम् ॥ (११७।२)

मेदोवेधेन शुल्बं तु स्वर्णं स्यादस्थिवेधतः । (११८।१)

रूप्यं स्वर्णं भवेन्मज्जवेधाल्लोहानि कांचनम् ॥ (११८।२)

शुक्लवेधेन मृत्पात्रं काञ्चनं भवति प्रिये । (११९।१)

वज्रजीर्णो वीर्यवेधी मज्जामभ्रकजारितः ॥ (११९।२)

हेमजीर्णस्त्वस्थिवेधी रूप्यजीर्णो रसं प्रिये । (१२०।१)

मेदोवेधी ताप्यजीर्णो मांसवेधी तु पारदः ॥ (१२०।२)

शुल्बजीर्णो रक्तवेधी कान्तजीर्णो रसात्मकः । (१२१।१)

तीक्ष्णबद्धेन नीलाभस् ताम्रेणारुणसप्रभः ॥ (१२१।२)

रजतेनेन्दुसंकाशो हेम्ना काञ्चनसप्रभः । (१२२।१)

धूमावलोकी वक्त्रस्थो मासात्खेचरतां नयेत् ॥ (१२२।२)

स्पर्शवेधी तु वक्त्रस्थो द्विमासात्सिद्धिदायकः । (१२३।१)

शतकोटिस्त्रिभिर्मासैश् चतुर्भिर् दशकोटिकृत् ॥ (१२३।२)

पञ्चभिः कोटिवेधी स्याद् अष्टभिश्चायुतं पुनः । (१२४।१)

साहस्रं नवभिर्मासैर् दशमासे शतं पुनः ॥ (१२४।२)

तस्य मूत्रपुरीषैस्तु श्लेष्मणाङ्गमलैस् तथा । (१२५।१)

लेपाद्धेमत्वम् आयान्ति यानि लोहानि भूतले ॥ (१२५।२)

चतुःषष्ट्यंशतो वेधी मासम् एकादशस्य तु । (१२६।१)

द्वात्रिंशकवेधी तु वर्षाद् देहं तु वेधयेत् ॥ (१२६।२)

सर्वरोगैर् विनिर्मुक्तो वलीपलितवर्जितः । (१२७।१)

नासौ छिद्येत शस्त्रैश्च पावकेन न दह्यते ॥ (१२७।२)

वायुवेगी महातेजाः कामदेव इवापरः । (१२८।१)

इच्छया जायते दृश्योऽप्यदृश्यचैव जायते ॥ (१२८।२)

यस्य संस्पर्शमात्रेण सर्वलोहानि काञ्चनम् । (१२९।१)

तस्मिन्नेकार्णवे घोरे नष्टे स्थावरजङ्गमे ॥ (१२९।२)

देवा यत्र विलीयन्ते सिद्धस्तत्रैव लीयते ॥ (१३०।१)